Kombunda yombapitisimo yaJesus, ombepo ondjapuke ye mu twara mokuti onguza. Eye kena pa rya oure womayuva 40, nu eye wa ṱire ondjara tjinene. Okuzambo Satan we ya okuyekurora Jesus na tja ku ye: ‘Ove tji u ri Omuna waMukuru raera omawe nga kutja ye rire omboroto.’ Posiya Jesus we mu zira na tja: ‘Omatjangwa maye tja ove kohepa ovikurya uriri kokutja u hupe. Ove mo sokupuratena kembo arihe Muhona nda hungire.’

Rukwao, Satan wa rora Jesus na tja: ‘Tji u ri Omuna waMukuru tjiri, rurumina pehi okuza kombandambanda yOndjuwo Ondjapuke yaMuhona. Omatjangwa maye tja Muhona ma tumu ovaengeli ve okukuyakura.’ Posiya Jesus rukwao wa tja: ‘Omatjangwa maye tja ko nakurora ko Muhona.’

Okuzambo, Satan wa raisira Jesus omauhona aehe wouye nomautumbe nounene wayo na tja: ‘Ami me ku pe omauhona nga aehe nomaunene wawo indu tji we rikotamene ku ami rumwe uriri.’ Posiya Jesus wa zira na tja: ‘Za po, Satan! Omatjangwa maye tja rikotamena ku Muhona erike.’

Okuzambo Satan wa ya, nu ovaengeli ve ya nave yandja ovikurya ku Jesus kutja ma rye. Okuzambo, Jesus wa zuvarisa ombuze ombwa yOuhona. Imbyo ooviungura mbya hindirwa kombanda yehi. Ovandu va suverere oviṋa Jesus mbyee ve hongo, nu aave mu kongorere koṋa akuhe eye kaa i.

“Tji ma kora ovizeze, u tjita imbi porwavyo mbye mu pwira, tjinga e ri omunavizeze ne ri ihe yovizeze avihe.”​—Johanes 8:44