Twende kovidio oini

Twende komurya

Ovahongonone vaJehova

Toorora eraka Otjiherero

 EHONGWA 80

Jesus ma toorora ovaapostele omurongo na vevari

Jesus ma toorora ovaapostele omurongo na vevari

Kombunda yokuzuvarisa oure wombura nohinga nao, Jesus wa ri nondando onanḓengu okutjita. Hapo eye atja toorora oouṋe okuungura puna ye? Ma hongo oouṋe mbu mave yenene okuhongorera po ombongo yOvakriste? Okutjita ozondando nḓa, Jesus aa hepa omuhunga okuza ku Jehova. Kunao, eye wa ya kondundu pu ma kakara erike, nu wa kumba ouṱuku auhe. Omuhuka omunene, Jesus wa isana ovahongewa ve na toorora ovaapostele ve 12. Oouṋe mu wo mbu mo zemburuka? Omana wawo ya ri Petrus, Andreas, Jakobus, Johanes, Filipus, Bartolomeus, Tomas, Mateus, Jakobus omuzandu waAlfeus, Tadeus, Simon na Judas Iskariot.

Andreas, Petrus, Filipus, Jakobus

Ovaapostele 12 mba aave ryanga puna Jesus. Tja za nokuverongerisa, eye we ve hinda okukazuvarisa aveyerike. Jehova we ve pa omasa wokupitisa ozondemone movandu nokuverura ovavere.

Johanes, Mateus, Bartolomeus, Tomas

Jesus aa isana ovaapostele ve 12 omapanga we nu wa ri nongamburiro mu wo. Ovafarisei aave munu kutja ovaapostele va ri  ovandu mbe ha hongerwe nu va kauriri. Posiya Jesus we ve honga omuano mbu mave sokuungura. Owo va ri puna Jesus moruveze orunanḓengu tjinene mehupo re, tjimuna komurungu wonḓiro ye na kombunda yombendukiro ye. Otjingi tjovaapostele va zire koGalilea tjimuna Jesus. Tjiva vawo va ri ovandu mba kupa.

Jakobus omuzandu waAlfeus, Judas Iskariot, Tadeus, Simon

Ovaapostele va ri ovarumendu ovahahomonena mbaave tjiti ozondataiziro. Povikando tjiva aave hungire nokuhina okuripura nu aave tjiti ozondando ozombi. Nu povikando vyarwe kaave raisa omuretima. Owo nandarire aave pose ohunga nokutja ouṋe ngu ri omunanḓengu tjinene. Posiya owo vari ovandu ovawa mba suverere Jehova. Owo ombatja ve uta ombongo yOvakriste Jesus tja yaruka keyuru.

“Ami me mu tja oweṋe omapanga wandje tjinga ambe mu raera omambo aehe ngu mba zuva mu Tate.”​—Johanes 15:15