Kombunda yOpaska, Jesus novahongewa ve va ryanga moSamaria otja tjaave yaruka koGalilea. Popezu notjihuro tjaSikar, Jesus wa ya poruveze ndwaa ru isanewa ondjombo yaJakob. Ngunda ama suva mbo, ovahongewa ve va ya kotjihuro okukaranda ovikurya.

Omukazendu weya kondjombo okuyekuteka omeva. Jesus wa tja ku ye: “Ndji pao omeva.” Omukazendu wa tja: ‘Ongwaye tji mo hungire kuna ami? Owami omukazendu Omusamaria. Ovajuda kave hungire kuna Ovasamaria.’ Jesus wa tja ku ye: ‘Andakuzu mo tjiwa kutja owami uṋe, ove otjo ndji ningira omeva nu Ami e tje kupa omeva omanamuinyo.’ Omukazendu wa pura na tja: ‘Mo hee tjike? Ove nandarire ko notjitjuma.’ Jesus wa tja: ‘Auhe ngu ma nu omeva ngu me mu pe ke nokuṱonyota rukwao.’ Nomukazendu wa tja: ‘Muhona, arikana ndji pao omeva ngo.’

Okuzambo Jesus wa tja ku ye: “Twende u kaisane omurumendu woye, nu u kotoke.” Omukazendu wa tja: “Ami hi nomurumendu.” Jesus wa tja: ‘Ove mo hungire ouatjiri. Ove wa kupirwe povikando vitano, nu nai u kara puna omurumendu ngu mu hi ya kupasana.’ Nomukazendu wa tja: ‘Ami mba munu kutja oove omuprofete. Ovasamaria ve kambura kutja matu yenene okurikotamena ku Mukuru pondundu ndji, posiya Ovajuda ve tja matu yenene okurikotamena ku Mukuru moJerusalem uriri. Ami mbi kambura kutja Messias tje ya me tu raere kutja matu sokurikotamena vi.’ Okuzambo Jesus wa hungira otjiṋa tje ha rora okuraera komundu warwe na tja: ‘Owami ngu mbi ri Messias.’

 Omukazendu wa hakahana okuyenda kotjihuro tje a karaera Ovasamaria na tja: ‘Ami ngahino mba munu Messias. Eye ma tjiwa oviṋa avihe ohunga na ami. Indjeye mu ka tare!’ Owo ve mu kongorera nga pondjombo nave kapuratena komahongero waJesus.

Ovasamaria va ningira Jesus kutja ma kare motjihuro tjawo. Oure womayuva 2, Jesus aa hongo moSamaria, nu ovandu ovengi va kambura mu ye. Owo va raera omukazendu Omusamaria nave tja: ‘Kombunda yokupuratena komurumendu ngwi, eṱe twa tjiwa kutja eye tjiri omukuture wouye.’

“‘Indjo!’ Nu auhe ngu nonyota nge ye; nu auhe ngu ma vanga omeva womuinyo nge ye okukambura uriri!”​—Omavandururiro 22:17