Katjisupi kombunda yombapitisimo ye, Jesus wa uta okuzuvarisa na tja: ‘Ouhona waMukuru wa tumbuka.’ Ovahongewa aave mu kongorere otja tjaa ryanga moGalilea na Judea. Indu Jesus tja yaruka kotjihuro tje Nasaret, wa kahita mozondjuwo mu mu wongarera ombongo, a paturura embo emangwa raJesaja na rire tja lese neraka enene a tja: ‘Muhona we ndji pa ombepo ondjapuke kokutja mbi zuvarise ombuze ombwa.’ Omambo ngo aaye hee tjike nao? Oyo aaye hee kutja nandarire kutja ovandu aave vanga okumuna Jesus ama tjiti ovihimise, otjiṋa otjinene tja perwa ombepo ondjapuke ya ri kutja ma zuvarise ombuze ombwa. Okuzambo wa raera kovapuratene ve na tja: ‘Omaprofetero ngo ya yenenisiwa ndino.’

Jesus tja za mbo wa ya kOkuvare kwaGalilea, ka kahakaenena ku novahongewa ve 4 mba ri ovapate vomahundju. Eye we ve isana na tja ku wo: “Ndji kongorereye, nAmi me mu hongo okurira ovapate vovandu.” Owo vari Petrus, Andreas, Jakobus na Johanes. Tjimanga va isa oviungura vyawo vyokupata omahundju nave mu kongorere. Owo aave ryanga moGalilea atjihe amave zuvarisa ombuze ohunga nOuhona waJehova. Aave zuvarisa mozondjuwo zomawongarero wombongo, potuveze twomarandero na momivanda vyotjihuro. Otjimbumba otjinene tjovandu aatji ve kongorere akuhe kaave i. Ombuze ohunga na Jesus ya handjauka akuhe, nandarire mehi raSirie arihe.

Otja oruveze tjaaru kayenda, Jesus wa yandja omasa kovahongewa ve tjiva wokuverukisa ovandu nokupitisa ozondemone movandu. Imbo varwe va ya puna ye otja tjaa zuvarisa okuza kotjihuro nga kotjihuro na kovirongo nga kovirongo. Ovakazendu ovengi ovaṱakame tjimuna Maria Magdalena, Johana, Susana novakwao varwe aave vatere Jesus novahongewa ve.

Kombunda yokurongerisa ovahongewa ve nawa, Jesus we ve hinda kutja ve kazuvarise. Otja tjaave ryanga moGalilea, ovandu varwe ovengi va rira ovahongewa nave papitisiwa. Jesus wa sasaneka ovandu ovengi mba ku nehi romakunino ndaari sokukondwa, orondu owo aave vanga okurira ovahongewa. Eye wa tja: ‘Kumbeye ku  Muhona kokutja ma hinde ovakonde vovikunwa.’ Eye kombunda wa toorora ovahongewa ve 70 ne ve hindi okukazuvarisa kovevarivevari mozondendera zaJudea azehe. Owo va honga ovandu voviwaṋa avihe ohunga nOuhona waMukuru. Ovahongewa tji va kotoka va ri nonḓero yokuraera Jesus ondjoroka ndji va ri na yo. Satan kaa yenene okutjaera otjiungura tjokuzuvarisa hi okukayenda komurungu.

Jesus wa rongerisa ovahongewa ve mba nawa kokutja ve ungure otjiungura otjinanḓengu hi kombunda ye. Eye wa tja ku wo: ‘Zuvariseye ombuze ombwa mouye auhe. Hongeye ovandu Embo raMukuru, nu mu ve papitise.’