Ovafarisei va tondere Jesus nu aave paha omiano vyokumukambura. Owo va tja kasere okuverura ovandu mEsabata. MEsabata rimwe Jesus wa vaza omurumendu omupoṱu momuvanda wotjihuro ama ningire ombatero kovandu. Jesus wa raera kovahongewa ve na tja: ‘Tara komuano ombepo yaMukuru mu mai vatere omundu ngwi.’ Jesus wa runga omate we omuini ku nomunoko na twa komeho womurumendu. Okuzambo wa raera omurumendu na tja: ‘Twende u kakohe omeho woye mOtjizeva tjaSiloam.’ Omurumendu wa tjita nao, nu otjikando otjitenga momuinyo we eye wa uta okumuna.

Ovandu va himinwe. Owo va tja: ‘Omurumendu ngwi hapo eyengwi ngwaa haama nokuningira ombatero kovandu poo va sana uriri?’ Omurumendu wa tja: ‘Owami ngu mbi ri ye!’ Ovandu ve mu pura nave tja: ‘Ongwaye tji u heri omupoṱu rukwao?’ Indu tje ve raera oviṋa avihe mbya tjitwa, owo ve mu twara kOvafarisei.

Omurumendu wa raera kOvafarisei na tja: ‘Jesus wa twa omunoko komeho wandje nendji raere kutja mbi kerikohe. Ami mba tjita nao nu nai me yenene okumuna.’ Ovafarisei va tja: ‘Tjinangara Jesus u verura ovandu mEsabata okutja omasa we kaye zu ku Mukuru.’ Posiya varwe va tja: ‘Tjinangara omasa we kaye zire ku Mukuru, eye katja yenena okuverura ovandu oparukaze.’

 Ovafarisei va isanisa ovanene vomurumendu ngwi nave ve pura ave tja: ‘Pe ya vi omuzandu weṋu ngwi ma ute okumuna?’ Ovanene ve aave tira orondu Ovafarisei va tja omundu auhe ngu ma kambura mu Jesus ma rambwa mondjuwo yomaworonganeno wombongo. Okutja otji va zira nave tja: ‘Katu nakutjiwa. Mu pureye omuini.’ Ovafarisei va pura omurumendu omapuriro omengi nga tje ve zira a tja: ‘Ami mbe mu raere rukuru oviṋa avihe mbi me tjiwa. Ongwaye tji mamu ndji pangura hapo?’ Ovafarisei va pindikire tjinene nave mu ramba.

Jesus wa ya komurumendu ne mu pura a tja: ‘Ove u nongamburiro mu Messias?’ Omurumendu wa tja: ‘Etje kambura mu ye andakuzu me mu tjiwa.’ Jesus wa tja: ‘OwAmi Messias.’ Katjiṋa otjiwa nao Jesus tja tjita? Eye wa verura omurumendu ngwi okuzambo e mu vatere kutja ma kare nongamburiro.