Jesus we ya kombanda yehi kutja ma zuvarise ombuze ombwa yOuhona waMukuru. Okuraisa kutja Jesus tja rire Ombara ma katjita vi, Jehova we mu pa ombepo ondjapuke kutja ma tjite ovihimise. Eye aa yenene okuverura omutjise ngamwa auhe. Akuhe kaa i, ovavere aave ya ku ye kutja me ve vatere, neye we ve verura. Ovapoṱu va uta okumuna, ozomboro za uta okuzuva, ovaremane va uta okukayenda nu imba mba ri nozondemone va kuturwa. Nandarire tji va ṱunu kotjikoro tjombanda yaJesus, aave veruka. Ovandu aave kongorere Jesus koṋa akuhe kaa i. Jesus kena pa ramba ovandu nandarire kutja povikando tjiva aa vanga okukara erike.

Otjikando tjimwe, ovandu va eta omurumendu ngwa remanene pondjuwo Jesus paa kara. Posiya ondjuwo ye urire tjinene, kaave yenene okuhita. Otji va kutjurura omututu kombanda nave pundisa omurumendu ku Jesus. Okuzambo Jesus wa raera komurumendu na tja: ‘Sekama u kayende.’ Indu omurumendu tja tjita nao, ovandu va himinwe.

Otjikando tjarwe Jesus tjaa hiti motjirongo, pa kuramene ovarumendu 10 pomahitiro nu va ravaera nave tja: ‘Jesus tu vatera!’ Momayuva ngo ovandu mba verere ongana kaave yandjerwa okuya popezu novandu varwe. Otja kOmatwako waJehova, Jesus wa raera ovarumendu mba verere ongana kutja ve yende kondjuwo ondjapuke yaMuhona. Ngunda ave ri mondjira okuyenda ngo, owo va veruka. Omurumendu umwe mu imbo tja  muna kutja wa veruka, eye wa yaruka na katja ndangi ku Jesus na tanga Mukuru. Omurumendu umwe uriri mu imba 10, ongwa kotoka okuyekuposa ondangi ku Jesus.

Omukazendu ngwa verere oure wozombura 12 wa ri nonḓero onene yokuveruka. Okutja we ya ku Jesus okuza kongotwe motjimbumba tjovandu ovengi na ṱunu kotjikoro tjombanda ye. Nu tjimanga eye wa veruka. Okuzambo Jesus wa pura na tja: ‘Ouṋe ngwe ndji ṱunu?’ Omukazendu wa urumine tjinene, posiya we ya komurungu na raere Jesus ouatjiri auhe. Jesus we mu huhumiṋa na tja: ‘Muatje wandje, twende mohange.’

Omunene wondjuwo yomaworonganeno wena Jairus we riheka ku Jesus na tja: ‘Indjo koyandje! Okakazona kandje ka vere tjinene.’ Posiya Jesus ngunda ari mondjira okuyenda koyaJairus, okakazona kaṱa. Jesus tja vaza mbo, eye wa muna kutja pa ri novandu ovengi pu neṱunḓu mba ri noruhoze. Jesus wa tja ku wo: ‘Amu riri, okakazona ka rara uriri.’ Okuzambo we kekambura keke na tja: ‘Kakazona, penduka!’ Oko ka yeruruka tjimanga nu Jesus wa raera ovanene vako kutja ngave ke pe ovikurya ke rye. Ripura uriri kutja ovanene vako va ri nondjoroka ndji ṱa pi!

“Mamu tjiwa Jesus waNasaret na indu Ndjambi tje mu twirisa nOmbepo Ondjapuke nomasa. Eye iya ryanga akuhe ama tjiti ouwa nama verukisa avehe mba ri kehi youvara waSatan, Ndjambi tjinga a ri puna Ye.”​—Oviungura 10:38