Ouṱuku umwe Ombara Nebukadnesar ya rotere oruroto oruhimise. Oruroto ndwi rwe mu kurungisire tjinene nga tje ha sorere okurara. Eye wa isanisa ozombetere ze na tja ku wo: ‘Ndji kahururireye oruroto rwandje.’ Owo va tja: ‘Muhona ombara tu raera oruroto rwoye.’ Posiya Nebukadnesar wa tja ku wo: ‘Kako eṋe ndji raereye kutja mba roto ye, poo me mu zepa.’ Owo rukwao va tja ku ye: ‘Tu raera oruroto rwoye, tjazumbo tu ku kahururire.’ Eye wa tja: ‘Eṋe amuhe mamu vanga okundjitjita ovineya. Ndji raereye kutja mba roto ye!’ Owo va tja kombara: ‘Kapena omundu ngu mape ya a tjiti nao. Mbi wa ningire ovizeu.’

Nebukadnesar wa pindikire tjinene nga tja ningira kutja ovarumendu avehe ozombetere mehi ve zepewe. Momazepero ngo aa mu kamburire mo Daniel, Sadrak, Mesak na Abed-Nego. Daniel wa ningira ombara kutja i vepe oruveze oruṱiṱi. Tjazumbo eye nomapanga we va kumba ku Jehova kutja me ve vatere. Jehova wa tjita vi?

Motjirimunikise Jehova wa raisira Daniel oruroto rwaNebukadnesar nemu pe omaheero waro. Eyuva nda kongorera ko, Daniel wa ya komukarere wombara na tja: ‘O zepa ozombetere zombara ami me yenene okukahurura oruroto rwombara.’ Omukarere wa twara Daniel ku Nebukadnesar. Daniel wa raera ombara na tja: ‘Mukuru we ku raere ohunga noruyaveze. Indwi ooruroto rwoye: Ove wa muna otjisanekero tjomundu otjinene tjotjiuru tjongoldo, otjari nomaoko ya ungurwa posilveri, pehuri patjo pa ungurwa pongoporo, omarama watjo ya ungurwa potjitenda, ozombaze zatjo za ungurirwe potjitenda nomunoko. Okuzambo kwa rauka ewe enene okuza kondundu, nari vete ozombaze zotjisanekero hi. Otjisanekero tja nyanyauka natji vingwa i ombepo. Ewe ndo ra rira ondundu onene nu ye urisa ehi.’

 Okuzambo Daniel wa tja: ‘Omaheero woruroto rwoye owonga: Ouhona woye mau kuramenwa po i otjiuru tjongoldo. Osilveri mai kuramene po ouhona mbu mau ya kombunda yoye. Okuzambo maku ya umwe mbu mau sana kongoporo nu mbu mau honaparere ehi arihe. Ouhona outjakwao mau rire ounamasa tjinene tjimuna otjitenda. Korusenina mape kakara ouhona mbwa haṋika, wotupa tjiva tu matu rire otunamasa tjimuna otjitenda nu otupa twarwe matu rire otungundi tjimuna omunoko. Ewe nda karira ondundu mari kuramene po Ouhona waMukuru. Owo mau yandeke omauhona aehe nga, nau karerere nga aruhe.’

Nebukadnesar wa wira pehi komurungu waDaniel nomurungu mbwa tara mehi. Eye wa tja: ‘Muhona woye wa tjiukisa oruroto ndwi kove. Kapena Muhona tjimuna ye.’ Moruveze rwokuzepa Daniel, Nebukadnesar we mu zika otjomuhona wozonongo azehe nomuhona worukondwa rwaBabilon. Mo munu kutja Jehova wa zira vi ongumbiro yaDaniel?