Ester wa ri omusuko Omujuda ngwaa kara motjihuro Persie tjehi raSusa. Ozombura ozengi komurungu wanao, eṱunḓu re ra huurwa okuza koJerusalem i Nebukadnaser. Eye we kurisiwa i omuramwe Mordekai, omukarere wOmbara Kerkes yaPersie.

Ombara Kerkes aai vanga ombara oserekaze ombe. Ovakarere ve ve mu etera ovakazendu ovawavawa mehi, na Ester wina. Mokati kovakazendu avehe mbo, ombara ya toorora Ester okurira ombara oserekaze. Mordekai wa raera Ester kutja e rihorora kutja eye Omujuda.

Omurumendu umwe omuritongamise wena Haman wari omuhona wovakarere avehe vombara. Eye aa vanga kutja ovandu avehe ve rikotamene ku ye. Mordekai wa panḓa okutjita nao, nu Haman we mu pindikira nu aa vanga okumuzepa. Haman tja zuva kutja Mordekai Omujuda, eye we ripura ondunge yokuzepa Ovajuda avehe mehi. Eye wa raera ombara a tja: ‘Ovajuda ovandu ovanaumba, mo sokuveyandeka.’ Kerkes wa tja: ‘Tjita atjihe tji mo vanga,’ nu we mu pa ouyara wokuzikamisa etwako epe. Haman wa zikamisa etwako nda raera ovandu okuzepa Ovajuda avehe meyuva oritjamurongo nandatu romueze Adar. Jehova aa tarere.

Ester kaa tjiwa ohunga netwako ndo. Okutja Mordekai we mu tumina otjiherengururwa tjaro na tja: ‘Kayende u kahungire ku nombara.’ Ester wa tja: ‘Auhe ngu mai kombara eha isanenwe ma zepewa. Ombara kai ye ndji isana oure womayuva 30 nga kapita! Posiya me i. Eye tja roporora okati ke kongoldo, ami me hupu. Tje ha tjitire nao, me ṱu.’

Ester wa ya korumbo rwombara. Ombara tji ye mu muna, oyo ya roporora okati kayo kongoldo. Eye wa ya ku ye, nombara ai pura nai tja: ‘Hi ku tjitire tjike, Ester?’ Eye wa tja: ‘Me vanga okukuṋanga komukandi puna Haman.’ Pomukandi  mbo, Ester we ve ṋanga komukandi warwe. Pomukandi outjavari, ombara ya pura rukwao nai tja: ‘Hi ku tjitire tjike?’ Eye wa tja: ‘Omundu umwe me ndji zepa novandu vandje. Arikana tu yama.’ Ombara ya pura nai tja: ‘Ouṋe ngu ma vanga okumuzepa?’ Eye a tja: ‘Omurumendu omurunde ngwi Haman.’ Kerkes wa pindika tjinene nga tja rakiza kutja Haman ma zepewe.

Posiya kapari omundu ngwaa yenene okurundurura etwako raHaman, nandarire ombara. Okutja ombara ya zika Mordekai okurira otjiuru tjovakarere vombara nai mu pe omasa wokuzikamisa etwako rarwe epe. Mordekai wa tjanga etwako epe nda yandjera Ovajuda okuriyama tji mave rwisiwa. Meyuva oritjamurongo na yetatu komueze Adar, Ovajuda va taara ovanavita na wo. Okuzambo owo aave kara nomukandi ombura aihe wokuzemburuka eyuva rondoṋeno ndo.

“Eṋe mamu eterwa Ami kotjombanguriro komurungu wovanane nozombara okuyekuhongonona Ombuze Ombwa ku wo na komihoko vyarwe.”​—Mateus 10:18