Twende kovidio oini

Twende komurya

Ovahongonone vaJehova

Toorora eraka Otjiherero

 EHONGWA 64

Daniel motjitoto tjozongeyama

Daniel motjitoto tjozongeyama

Ombara yarwe yaBabilon ya ri Darius waMedi. Darius wa muna kutja Daniel wa ri omundu wapeke. Eye wa zika Daniel kombanda yovarumendu ovananḓengu tjinene mehi arihe. Ovarumendu mba va ri neruru na Daniel nu aave vanga okumuzepa. Owo aave tjiwa kutja Daniel aa kumbu ku Jehova ovikando 3 meyuva, okutja otji va raera Darius nave tja: ‘Muhona ombara, mape sokukara etwako ndi mari tja ovandu avehe mave sokurikotamena kove erike. Nu ngamwa auhe ngu hina okuraisa onḓuviro ku ro ma sokuyumbwa motjitoto tjozongeyama.’ Darius wa yakura ondunge ndji na twa ko ena re ketwako ndi.

Tjimanga Daniel tja zuva ohunga netwako epe ndi, eye wa ya koye. Neye wa wora ozongoro momurungu woruiho ndwa paturuka na kumbu ku Jehova. Ovarumendu veruru mbo va purukutira mondjuwo ye nave mu vaza ama kumbu. Owo va tupuka ku Darius nave ka tja: ‘Daniel ka raisire onḓuviro kove. Eye u kumba ku Mukuru we ovikando vitatu meyuva.’ Darius wa suverere Daniel nu kaa vanga kutja ma ṱe. Eyuva arihe wa kondja okuripura nondunge yokuyama Daniel. Posiya nandarire ombara kaai yenene okurundurura etwako nda twako ena re rukuru. Eye aa sokurakiza ovakarere ve kutja ve yumbe Daniel motjitoto tjozongeyama ovindandi.

 Ouṱuku mbo, Darius ee ripurire tjinene ku Daniel nga tjee hina aa yenene okurara. Omuhuka omunene, eye wa tupuka kotjitoto na karavaera ku Daniel a tja: ‘Mukuru woye we ku yama?’

Darius wa zuva eraka. Oro rari eraka raDaniel! Eye wa ravaera ku Darius na tja: ‘Omuengeli waMuhona wa pata ovinyo vyozongeyama. Ozo kaze ye ndji hihamisa.’ Darius wa tjaterwa tjinene! Eye wa rakiza kutja Daniel ma pitisiwe motjitoto. Daniel kari notjipo. Tjazumbo ombara ya tja: ‘Yumbeye ovarumendu mba kuminine Daniel motjitoto.’ Indu ovarumendu mba tji va yumbwa motjitoto, ozongeyama ze ve rya.

Darius wa hinda erakiza ndi kovandu na tja: ‘Omundu auhe nga tire Mukuru waDaniel. Eye wa yama Daniel kozongeyama.’

Ove hapo u kumba ku Jehova eyuva arihe, tjimuna Daniel tjaa tjiti?

“Muhona otji ma tjiwa kutja imba mbe nondira ku Ye me ve yama vi momarorero wawo.”​—2 Petrus 2:9