Twende kovidio oini

Ovahongonone vaJehova

Toorora eraka Otjiherero

Ove mo vanga okutjiwa ouatjiri?

Ove mo vanga okutjiwa ouatjiri?

OUATJIRI ohunga na tjike? Ohunga nomapuriro tjiva ovandu ovengi ngu ve pura. Ngahino ove wina oo rikende ohunga nomapuriro otja inga:

  • Mukuru tjiri u rikendera eṱe?

  • Ovita nokumuna ouzeu mape ya avi yanda?

  • Pe tjitwa tjike kweṱe tjitwa koka?

  • Pe na omaundjiro kaaṋi kovaṱi?

  • Me yenene vi okukumba kutja mbi zuvirwe?

  • Ouṋingandu mehupo me u munu vi?

Omaziriro komapuriro nga mo paha pi? Indu tji wa pura kovandu pekepeke mo munu omaziriro pekepeke. Nandarire tji wa pura ku imba mbe hita okereka poo ovahonge, ove mo munu omaziriro ombirukira. Kotjirutenga omaziriro tjiva ye varwa ounanḓengu, nungwari kombunda kaye varwa rukwao poo nandarire ye rundururwa.

Pena embo rimwe porwe ndi na omaziriro omaṱakame. Oro embo rouatjiri. Jesus Kristus wa tjere mongumbiro ye ku Mukuru: “Embo roye oro ouatjiri.” (Johanes 17:17) Ndino Embo ndo tu ri tjiwa kutja Ombeibela. Pomikuma mbi mavi kongorere mba, mo kamuna omaziriro wOmbeibela omakahu nu youatjiri komapuriro nge ri pombanda mba.

 Mukuru tjiri u rikendera eṱe?

EPU NDI ETA EPURIRO OTJA INDI: Eṱe tu hupa mouye mbwe ura novineya nouhasemba. Ozongamburiro ozengi ze honga kutja omauzeu ngu tu muna ombango yaMukuru.

OMBEIBELA MBI I HONGA: Mukuru ka ngu eta ouvi kaparukaze. Job 34:10 mari tja: “Omunamasaaehe ka tjiti ouvi nouhasemba.” Mukuru u na ondando yorusuvero kovandu. Omena ranao Jesus tje tu honga okukumba kutja: “Tate yetu ngu u ri momayuru: . . . ouhona woye ngau ye; ombango yoye ngai tjitwe na kombanda yehi otja meyuru.” (Mateus 6:9, 10) Mukuru u rikendera eṱe tjinene ngandu tja toora omikambo ominene okuyenenisa ombango ye.—Johanes 3:16.

Wina tara muGenesis 1:26-28; Jakobus 1:13; na 1 Petrus 5:6, 7.

Ovita nokumuna ouzeu mape ya avi yanda?

EPU NDI ETA EPURIRO OTJA INDI: Ovita vi kayenda komurungu okuzepa ovandu ovengi. Atuhe tu muna omauzeu.

OMBEIBELA MBI I HONGA: Mukuru wa kwizika oruveze eye ndu ma ka eta ohange mouye auhe. Kehi yOuhona we, ohoromende yeyuru, oviwaṋa kamaavi “rirongerere okurwa ovita rukwao.” Nungwari, mavi “hambura omangaruvyo wavyo ye rire otuvyo twovitaure vyehi.” (Jesaja 2:4) Mukuru ma yandisa omauhasemba aehe nomamunino wouzeu. Ombeibela mai kwizike: “[Mukuru] ma pyoṋa omahoze aehe momeho wawo. Nonḓiro kai tji nakukara po rukwao; noruhoze nomaririro, nomuhihamo kavi tji nakukara po rukwao. Oviṋa ovikuru [tjimuna omauhasemba nomauzeu yakandino] vya kapita.”—Omavandururiro 21:3, 4.

Wina tara mOmapsalme 37:10, 11; 46:9 na Mika 4:1-4.

Pe tjitwa tjike kweṱe tjitwa koka?

EPU NDI ETA EPURIRO OTJA INDI: Ozongamburiro ozengi ze honga kutja pe notjiṋa moukoto womundu tji tji hupa komurungu kombunda omundu tja ṱu. Tjiva ve kambura kutja ovakuru vetu mba ṱa ve yenena okutuvatera poo okutuhihamisa. Varwe ve kambura kutja Mukuru u vera ovarunde mokuvetatumisa nga aruhe motjovasengwa.

OMBEIBELA MBI I HONGA: Ovaṱi kave nomuinyo, kave yenene okuzuva, okumuna, okuhungira poo okuripura otjiṋa. Omuzuvarise 9:5 mari tja: “Ovakoke kave tjiwa otjiṋa.” Mena rokutja ovaṱi kave tjiwa otjiṋa nu kave munu ondjiririra yotjiṋa kangamwa, owo kave yenene okuhihamisa poo okuvatera ovanamuinyo.—Epsalme 146:3, 4.

Wina tara mu Genesis 3:19 nOmuzuvarise 9:6, 10.

 Pe na omaundjiro kaaṋi kovaṱi?

EPU NDI ETA EPURIRO OTJA INDI: Eṱe tu vanga okuhupa nokuyorokera omuinyo kuna ovasuverwa vetu. Katjikumise eṱe tji matu zeri okumuna ovasuverwa vetu mba ṱa rukwao.

OMBEIBELA MBI I HONGA: Ovandu ovengi mba ṱa mave pendurwa. Jesus wa kwizika kutja ‘ovaṱi mave piti momayendo wawo.’ (Johanes 5:28, 29) Otja kondando yaMukuru okuza kombutiro, imba mbu mave pendurwa mave munu oruveze rwokuhupa moparadisa kombanda yehi. (Jesaja 65:21-25) Omakwizikiro woruyaveze nga wina maye kamburire mo ouveruke ouwa nomuinyo waaruhe kovananḓuviro. Ombeibela mai tja: “Ovasemba mave rumata ehi, nu mave tura mu ro nga aruhe.”—Epsalme 37:29.

Wina tara mu Job 14:14, 15; Lukas 7:11-17 nOviungura 24:15.

Me yenene vi okukumba kutja mbi zuvirwe?

EPU NDI ETA EPURIRO OTJA INDI: Ovandu ape mozongamburiro azehe ve kumba. Nungwari, ovengi ve muna kutja ozongumbiro zawo ka ze zirwa.

OMBEIBELA MBI I HONGA: Jesus we tu honga kutja atu ha wondjorora ozongumbiro zetu. Jesus wa tjere: “Tji mamu kumbu, amu wondjorora.” (Mateus 6:7) Indu tji matu vanga kutja Mukuru ma puratene kozongumbiro zetu eṱe matu sokukumba momuano eye mbu ma yakura. Kutja tu yenene okutjita nao, eṱe matu sokurihonga kutja ombango yaMukuru ooiṋe nu atu kumbu otja kombango ye. Mu 1 Johanes 5:14 matu lese kutja: “Eye tjinga ama zuvire ozongumbiro zetu tji matu ningire ngamwa otjiṋa otja kombango ye.”

Wina tara mEpsalme 65:2; Johanes 14:6, 14 na 1 Johanes 3:22.

Ouṋingandu mehupo me u munu vi?

EPU NDI ETA EPURIRO OTJA INDI: Ovandu ovengi ve kambura kutja otjimariva, okutjiukwa nouwa mau ve etere ouṋingandu. Mena ranao opu ve nanukirwa i oviṋa otja imbyo, nungwari ouṋingandu kave u munu.

OMBEIBELA MBI I HONGA: Jesus wa raisa otjipaturure tjouṋingandu indu tja tjere: “Ovaṋingandu komeho imba mbe zuva embo [raMukuru, EEP] nave ṱakamisa ro!” (Lukas 11:28) Ouṋingandu watjiri matu u munu porwe tji matu toora omikambo vyokuyenenisa otjihepwa tjetu otjinenenene—okutja onḓero yetu yokutjiwa ouatjiri ohunga na Mukuru nondando ye kweṱe. Ouatjiri mbwi u munika mOmbeibela. Okumuna ondjiviro youatjiri ndjo maku tu vatere okuhaṋa pokati koviṋa ovinanḓengu na mbi he ri ovinanḓengu. Indu tji matu yandjere ouatjiri wOmbeibela okutuhongorera mozondyero na movitjitwa vyetu ku tu etera ehupo ewa.

Wina tara mOmiano 3:5, 6, 13-18 na 1 Timoteus 6:9, 10.

 Inga omaziriro omasupi uriri wOmbeibela komapuriro hamboumwe. Mo vanga okutjiwa ovingi? Tji u ri umwe wa imba mbu mave paha ouatjiri, okutja mo zeri okutjiwa ovingi. Mape ya o ripura ohunga nomapuriro yarwe otja inga: ‘Ndovazu Mukuru u rikendera eṱe, omena ratjike tja yandjera omauvi omengi nomauzeu nga ku nai? Me yenene vi okuṱuna ongaro yeṱunḓu randje? Ombeibela i tu pa omaziriro omawa nomakovise komapuriro nga nomengi warwe.

Nungwari ovengi ndino ve keyakeya okutara mOmbeibela. Owo ve i muna otja embo enene nu ezeu okuzuva. Mo vanga ombatero okumuna omaziriro mOmbeibela? Ovahongonone vaJehova ve yandja oviungurisiwa vivari okukuvatera.

Rutenga, embo ndi Ombeibela tjiri i honga tjike? nda tjangerwa okuvatera ovandu mbe noviungura ovingi okukonḓonona omaziriro wOmbeibela omakahu komapuriro omananḓengu. Otjiungurisiwa otjitjavari omakonḓononeno wOmbeibela woponganda wotjari. Nokuhina otjisuta umwe wOvahongonone vaJehova ngu kara popezu na ove ma yenene okuya ponganda yoye poo poruveze rwarwe ndwa pu kove nu ma yenene okukara puna ove okaruveze okasupi otjivike atjihe okukonḓonona Ombeibela puna ove. Omangete yovandu mouye auhe va muna mo ouwa momahongero nga. Ovengi korusenina va itavera nonyuṋe nave tja: “Ami mba munu ouatjiri!”

Kape notjihuze tjarwe pouatjiri wOmbeibela. Owo u tu kutura kovizerika, ombambaukire nondira. Owo u tu pa omaundjiro, ondando nondjoroka. Jesus wa tjere: “Neṋe mamu tjiwa ouatjiri, nouatjiri mau mu kutura.”—Johanes 8:32.