Twende kovidio oini

Twende komurya

Ovahongonone vaJehova

Toorora eraka Otjiherero

 EKONDWA 3

Toorora omapanga nga suvera Mukuru

Toorora omapanga nga suvera Mukuru

“Kara puna ozonongo nu mo rire onongo.”​—OMIANO 13:20.

1-3. (a) Matu rihongere ko tjike kOmiano 13:20? (b) Ongwaye tji matu sokutoorora omapanga wetu nounongo?

OVE wa rora okumuna omuano okanatje mu ke tarera ovanene va ko? Nangarire ngunda ake hiya uta okuhungira, ke horera oviṋa mbi make munu nokuzuva. Otja pu make kuru, opu ke uta okuhorera kovanene va ko. Katjikumise kutja ovandu ovanene wina ve uta okuripura nokuritjinda tjimuna ovandu mbu ve kara pamwe tjinene.

2 Omiano 13:20 mari tja: “Kara puna ozonongo nu mo rire onongo.” Okukara pu nomundu tjinene, ku heya kutja twa toorora okukara noupanga kuna ye. Nu ku kamburira mo ovingi pendje yokukara puna ye uriri. Omuhongwa umwe wOmbeibela wa tja ezeva ndi, ri heya okusuvera omundu ngo nokuvanga okukara popezu na ye. Eṱe tu horera kovikaro vyovandu mbu tu kara pamwe tjinene, nu tjinenenene tji twe ve suvera.

3 Omapanga wetu maye yenene okutjita kutja tu tjite oviṋa ovivi poo oviwa. Omiano 13:20 komurungu mari tja: “Tji mo tjiti oupanga novandu omayova mo nyonoka.” Indu tji matu toorora omapanga nga  suvera Mukuru, maye tu vatere okurira ovaṱakame ku ye. Okutuvatera okutoorora omapanga omawa, ngatu tare kutja Jehova u toorora ovangendu okurira omapanga we.

OMAPANGA WA MUKURU OOUṊE?

4. Ongwaye tje ri ondjozikiro onene okurira epanga ra Mukuru? Omena ratjike Jehova tja isana Abraham ‘epanga re’?

4 Jehova, Mukuru wOkombandambanda yevaverwa arihe, ma yenene okurira epanga retu. Indji ondjozikiro onene. Jehova u toorora omapanga we nongengezero. Eye u toorora imba mbe mu suvera nu mbe nongamburiro mu ye. Ripura na Abraham. Eye we rirongerere okutjitira Mukuru otjiṋa ngamwa atjihe. Povikando ovingi, Abraham wa raisa kutja eye wa ri omuṱakame nu wa ri nonḓuviro ku Jehova. Eye wina we riyandjerere okupunguha omuatje we Isak. Abraham wa ri nongamburiro yokutja “Ndjambi u nomasa okupendura Isak movakoke.” (Ovaheberi 11:17-19; Genesis 22:1, 2, 9-13) Abraham wa ri omuṱakame nu wa ri nonḓuviro, kunao Jehova we mu isana kutja ‘epanga re.’​—Jesaja 41:8; Jakobus 2:21-23.

5. Jehova u noumune uṋe ohunga na imba ovaṱakame ku ye?

5 Jehova u vara omapanga we otjovihuze. Omapanga we owomba mbe ripurira kokukara nouṱakame ku ye okukapita otjiṋa ngamwa atjihe. (Lesa 2 Samuel 22:26.) Owo ovaṱakame nu ve nonḓuviro ku ye mena rokutja ve mu suvera. Ombeibela mai tja, Mukuru “u yakura ovasemba nouṱakame.” Ihi matji hee imba mbe nonḓuviro ku ye. (Omiano 3:32) Jehova u ṋanga omapanga we okuvarura ‘Ondjuwo ye ondjapuke.’ Eye u ve ṋanga kutja ve rikotamene ku ye nokukumba ku ye ngamwa oruveze.​—Epsalme 15:1-5.

6. Eṱe matu raisa vi kutja twa suvera Jesus?

 6 Jesus wa tja: “Ingwi ngwe Ndji suvera ma ṱakamisa omahongero wandje. Tate me mu suvere.” (Johanes 14:23) Okutja, tji matu vanga okurira omapanga wa Jehova, matu sokusuvera Jesus nokutjita imbi mbye tu honga. Otjotjihorera, eṱe tu raisa onḓuviro kerakiza ra Jesus rokuzuvarisa ombuze ombwa nokuisa po ovandu ovahongewa. (Mateus 28:19, 20; Johanes 14:15, 21) Mena rokutja twa suvera Jesus, eṱe ‘tu yata mozondambo ze.’ (1 Petrus 2:21) Jehova u tjaterwa tji me tu munu amatu kondjo okuhorera kOmuna we, mu avihe mbi matu hungire na mbi matu tjiti.

7. Ongwaye omapanga wetu tji maye sokurira omapanga wa Jehova?

7 Omapanga wa Jehova, omaṱakame, ve nonḓuviro, nu va suvera Omuna we. Hapo omapanga wetu ye ri tjimuna inga Jehova nge toorora? Omapanga woye tji ye horera ku Jesus nokuhonga varwe ohunga nOuhona wa Mukuru, okutja maye ku vatere okurira omundu omusemba, nokukuvatera okurira omuṱakame ku Jehova.

OKURIHONGERA KOVIHORERA VYOMBEIBELA

8. Otjikwaye tji matji ku tjatere pokati koupanga wa Rut na Naomi?

8 MOmbeibela tu lesa ohunga noupanga, tjimuna imbwi owa Rut na ina mweno Naomi. Ovakazendu mba va zire komahi na kozombazu nḓa pangukire, nu Naomi wa ri omunene tjinene pu Rut mozombura. Posi yokutja va rira omapanga woposengo, mena rokutja owo aveevari va suverere Jehova. Indu Naomi tjaa vanga okupita mehi ra Moab okuyaruka koIsrael, “Rut we rimanga mu ye.” Eye wa raera Naomi a tja:  “Omuhoko woye owo omuhoko wandje; nu Ndjambi woye Eye Ndjambi wandje.” (Rut 1:14, 16) Rut aa tjindi Naomi nongaro ombwa. Owo tji va vaza mu Israel, Rut aa ungura oukukutu okuvatera epanga re. Naomi wa suverere Rut tjinene nu we mu pa ondunge ombwa. Rut wa puratena ku ye, nu mena ranao owo va serwa ozondaya ozengi.​—Rut 3:6.

9. Otjikeṋa tji matji ku tjatere pokati koupanga wa David na Jonatan?

9 David na Jonatan otjihorera tjarwe tjomapanga omawa, nga ri omaṱakame ku Jehova. Jonatan wa ri omunene pu David nozombura ape 30, nu eye ongwaa sokurira ombara ya Israel. (1 Samuel 17:33; 31:2; 2 Samuel 5:4) Posi yokutja eye tja zuva kutja Jehova wa toorora David okurira ombara, eye kakarere neruru nu kena pa rarakana ouvara. Jonatan wa tjita atjihe tjaa yenene okuvatera David. Otjotjihorera, indu David tja ri moumba, Jonatan we “kemuzeuparisa mu Ndjambi.” Eye nandarire wa twa omuinyo we moumba mena ra David. (1 Samuel 23:16, 17) David wina wa ri epanga eṱakame. Eye wa kwizika kutja ma tjevere eṱunḓu ra Jonatan, nu wa yenenisa omakwizikiro we ngo, nandarire Jonatan tja za nokuṱa.​—1 Samuel 18:1; 20:15-17, 30-34; 2 Samuel 9:1-7.

10. Otjihorera tjOvaheberi vetatu mba, matji tu hongo tjike ohunga noupanga?

10 Sadrak, Mesak na Abed-Nego va ri omapanga yetatu Ovaheberi, mba huurwa okuza kozoyawo ngunda ave ri ovanatje. Ngunda ave ri kokure novanene vawo, owo aave vaterasana okuṱakama mu Jehova. Kombunda tji va rira ovanene, ongamburiro yawo ya rorwa, indu Ombara Nebukadnesar tji ye ve rakiza okurikotamena kotjiserekarera tjongoldo. Sadrak, Mesak  na Abed-Nego va paṋda okurikotamena kotjiserekarera. Nowo va tja nai kombara: “Eṱe kamaatu rikotamene komukuru woye, nu kamaatu u onḓurumika kotjiserekarera tjongoldo tji wa zika.” Indu ongamburiro yawo tji ya rorwa, omapanga yetatu nga ya kara nouṱakame ku Mukuru wawo.​—Daniel 1:1-17; 3:12, 16-28.

11. Matu tjiwa vi kutja Paulus na Timoteus va ri omapanga omawa?

11 Omuapostele Paulus tja hakaena kuna Timoteus, eye wa yenena okumuna kutja Timoteus wa suverere Jehova, nokutja ee rikendere kombongo tjinene. Kunao Paulus wa rongerisa Timoteus okuvatera ovakambure ovakwao movirongo ovingi pekepeke. (Oviungura 16:1-8; 17:10-14) Timoteus wa ungura oukukutu ngandu Paulus tja tja nai: “Twa ungura pamwe okuzuvarisa indji Ombuze Ombwa.” Paulus aa tjiwa kutja Timoteus ongu ma yenene ‘okurikendera’ kovakambure ovakwao. Nu otja Paulus na Timoteus paave ungura pamwe oukukutu okukarera Jehova, opu va ririra ko omapanga omawa.​—Ovafilipi 2:20-22; 1 Ovakorinte 4:17.

MATU YENENE VI OKUTOORORA OMAPANGA WETU?

12, 13. (a) Ongwaye tji matu hepa okutoorora omapanga wetu nawa nandarire mombongo? (b) Ongwaye omuapostele Paulus tja yandja erakiza ndi ri 1 Ovakorinte 15:33?

12 Mombongo matu yenene okurihongera kovakambure ovakwetu, nokuvaterasana okukara ovaṱakame. (Lesa Ovaroma 1:11, 12.) Nungwari mombongo wina, tu hepa okukengeza tji matu toorora omapanga wetu wopopezu. Tu novakambure ovakwetu ovengi mba za mozombazu pekepeke nu mbe kurira mozongaro nḓa panguka. Tjiva vawo ovape mombongo,  ngunda varwe ava karera Jehova ozombura ozengi. Pe kambura oruveze oruingi komundu okukurisa oupanga we kuna Jehova, tjimuna tji pe kambura oruveze oruingi kotjihape okuhora. Kunao, matu hepa okuraisa omuretima norusuvero ku varwe, nu aruhe amatu toorora omapanga wetu nounongo.​—Ovaroma 14:1; 15:1; Ovaheberi 5:12–6:3.

13 Povikando tjiva, mape ya ape kara ongaro onḓeu mombongo, nu tji pa kara nao matu hepa okukengeza  tjinene. Mape ya omukambure omukwetu a tjiti oviṋa Ombeibela mbi i tjaera. Poo mape ya warwe a utu ongaro yokuunauna ndji mai yenene okuhaṋa ombongo. Ihi katjikumise kweṱe, mena rokutja nandarire meserewondo etenga, povikando tjiva mwa ri omauzeu mombongo. Kunao omuapostele Paulus wa rakiza Ovakriste voruveze ndo, na tja: “Amu pukisiwa! Otjikaro tjovandu ovavi tji zunḓa omihingo omiwa.” (1 Ovakorinte 15:12, 33) Paulus wina wa rakiza Timoteus ma kare nongengezero tji ma toorora omapanga we wopopezu. Eṱe wina matu sokutjita nao ndino.​—Lesa 2 Timoteus 2:20-22.

14. Omapanga ngu matu toorora ye ṱuna vi koupanga wetu na Jehova?

14 Eṱe twa sokutjevera oupanga wetu kuna Jehova. Otjo ootjiṋa otjihuze tjinene tji tu na tjo. Kunao, opu twa sokutjevera okutjita oupanga ku nomundu ngu ma yenene okungundiparisa ongamburiro yetu nokuteya oupanga mbo. Otjiperi kutja komoo twamo otjiṋa otjikohoke momeva wondova, okuzambo oundjire ko kutja tji pite oukohoke. Momuano otjingewo konoo kara nomapanga omavi, okuzambo oundjire ko okutjita ouwa. Eṱe tu hepa okutoorora omapanga wetu wopopezu nongengezero.​—1 Ovakorinte 5:6; 2 Ovatesalonika 3:6, 7, 14.

Mo yenene okumuna omapanga omasemba nga suvera Jehova

15. Ove mo yenene okutjita vi kutja u kare nomapanga omawa mombongo?

15 Mombongo mu novandu mba suvera Jehova tjiri. Owo mave yenene okurira omapanga woye wopopezu. (Epsalme 133:1) O paha omapanga movandu wotjiwondo tjoye poo wombazu yoye uriri. Zemburuka kutja Jonatan wa ri omunene tjinene pu David, nu Rut wa ri  omuṱiṱi tjinene pu Naomi. Matu vanga okuṱakamisa eronga rOmbeibela ndi tja: “Omitima vyeṋu wina ngavi kare kamwaha!” (2 Ovakorinte 6:13; lesa 1 Petrus 2:17.) Otja pu mo horere ku Jehova, opu mo nanene varwe kove, nowo opu mave vanga okurira omapanga woye.

TU SOKUTJITA VI TJI TU NOUZEU NOMUKAMBURE OMUKWETU?

16, 17. Indu omundu mombongo tje tu pindikisa, otjikeṋa tji tu ha sokutjita?

16 Meṱunḓu arihe, mu nozongaro noumune mbwa panguka, nomuano wokutjita oviṋa. Imbi tu vi muna mombongo wina. Ozongaro noumune mbwa panguka mbwi, vi tjita kutja ehupo retu ri kare nonyuṋe, nu eṱe matu yenene okurihongera ko ovingi okuza ku varwe. Posi yokutja povikando tjiva oviṋa otja imbi vi tjita kutja atu ha zuvasana novakambure ovakwetu, nu vi tjita kutja tu pitasane oumune. Mape ya atu pindike poo atu hihamwa tjinene momuinyo. (Omiano 12:18) Hapo matu sokuyandjera ozongaro otja inḓa okutupora kombongo?

17 Kako. Nandarire tji twa hihamisiwa momuano umwe poo omukwao, eṱe kamaatu sokupoka kombongo. Jehova kangwe tu hihamisa. Eye wetu pa omuinyo, noviṋa vyarwe avihe. Eye wa pwa okupewa orusuvero nouṱakame wetu. (Omavandururiro 4:11) Ombongo otjiyandjewa okuza ku Jehova, tji tji tu vatera okukurisa ongamburiro yetu. (Ovaheberi 13:17) Eṱe kamaatu vanga okunakaura otjiyandjewa tje hi, mena romundu umwe ngwe tu hihamisa.​—Lesa Epsalme 119:165.

18. (a) Otjikeṋa tji matji tu vatere kutja tu zuvasane ku novakambure ovakwetu? (b) Ongwaye tji tu sokuisira varwe?

 18 Eṱe twa suvera ovakambure ovakwetu, nu tu vanga kutja tu zuvasane. Jehova kaundjire ko ku ngamwa omundu okurira ohomonena, eṱe wina otji tu ha sere okutjita nao. (Omiano 17:9; 1 Petrus 4:8) Eṱe atuhe tu tataiza, posi yokutja orusuvero maru tu vatere kutja tu “isirasane.” (Ovakolose 3:13) Orusuvero maru tjiti kutja atu ha neneparisa ondataiziro onḓiṱi. Otjiperi kutja, omundu tje tu pindikisa ma rire ouzeu okuhina okuripurira kotjiṋa ho. Nu ma rire oupupu okupindika nokukara nongore ku nomundu ngo. Posi yokutja ihi matji tjiti kutja atu ha kara nondjoroka, nokutja tu raise onyengo. Nu tji twa isire omundu ngwe tu pindikisa matu yenene okukara nohange momuinyo, nombwaneno mombongo, nu tjinenenene, matu kara noupanga ouwa kuna Jehova.​—Mateus 6:14, 15; Lukas 17:3, 4; Ovaroma 14:19.

OMUNDU TJA KONDWA KOMBONGO

19. Oruṋe tji matu sokuteya oupanga ku nomundu mombongo?

19 Meṱunḓu rorusuvero, omundu auhe u kondja kutja pe kare ohange. Posi yokutja ngatu tje pena umwe meṱunḓu ngwa rire omupirukire. Nu rumwe ovandu avehe meṱunḓu va kondja povikando ovingi okumuvatera, posi yokutja ka roro okupuratena. Mape ya a tye okuzapo ponganda, poo mape ya otjiuru tjeṱunḓu atji mu raere kutja nga ze po ponganda. Otjiṋa tjimuna ho tji yenena okutjitwa mombongo. Omundu mape ya a toorora okutjita oviṋa mbi ha tjata ku Jehova na zunḓa na vyo ombongo. Eye mape ya a nakaura ombatero nu movitjitwa vye a raisa kutja ke  nokuvanga okurira okaṋepo kombongo rukwao. Mape ya e riisako omuini kombongo, poo nandarire a kondwa kombongo. Otjiṋa hi tji tja tjitwa, Ombeibela i hungira oukahu kutja atu “ha wana” nomundu ngo. (Lesa 1 Ovakorinte 5:11-13; 2 Johanes 9-11) Mape ya a rire ouzeu tjinene okuteya oupanga ku nomundu ngwa ri epanga retu poo okaṋepo keṱunḓu retu. Posi yokutja mongaro otja indjo, ouṱakame wetu ku Jehova ootjiṋa otjinanḓengu kombanda yokuraisa ouṱakame komundu ngamwa auhe.​—Lesa Omakahururiro 8.

20, 21. (a) Ondyero yomakondero wovandu kombongo i raisa vi orusuvero? (b) Ongwaye tje ri ohepero kweṱe okutoorora omapanga wetu nounongo?

20 Omakondero wovandu kombongo, omuano Jehova mbwe raisa orusuvero rwe kweṱe. Okwo ku tjevera ombongo ku imba mbe hi nakonatja nomirari vya Jehova. (1 Ovakorinte 5:7; Ovaheberi 12:15, 16) Nu wina ku tu vatera okuraisa orusuvero kena ra Jehova eyapuke, komirari vye, na ku Jehova omuini. (1 Petrus 1:15, 16) Okukondwa kombongo wina ku raisa orusuvero komundu ngwa kondwa kombongo. Omavyuriro omakukutu nga, mape ya aye mu vatere okumuna kutja oviṋa mbi ma tjiti ovivi, nu maku mu vatere kutja me ritanaure. Ovengi mba konderwe kombongo va kotoka ku Jehova, nu ave yakurwa norusuvero mombongo.​—Ovaheberi 12:11.

21 Ovikaro vyomapanga wetu vi yenena okuṱuna kongaro yetu wina. Kunao, otje ri ohepero okutoorora omapanga wetu nongengezero. Eṱe tji twa suvere imba Jehova mba suvera, matu kara pu novandu mbu mave tu vatere okukara nouṱakame ku Ye nga aruhe.