Twende kovidio oini

Twende komurya

Ovahongonone vaJehova

Toorora eraka Otjiherero

 EKONDWA 6

Matu yenene vi okutoorora omanyando omasemba?

Matu yenene vi okutoorora omanyando omasemba?

“Avihe, mbi mamu tjiti, . . . vi tjiteye kohiviro ya Ndjambi.”​—1 OVAKORINTE 10:31.

1, 2. Ongwaye tji tu sokutoorora omanyando wetu noviṋa vyokurikuturisa ouruvi nongengezero?

NGATU tje u ri pokurya otjihape, nu tjimanga omunu kutja tja ora munda umwe. Mo tjiti vi? Mo ri uriri, poo mo imbirahi? Poo mo kondo munda mbwa ora oimbirahi, okuzambo ori munda mbu ri nawa?

2 Omanyando noviṋa mbi tu tarera morungovi poo motiivii vi ri tjimuna otjihape ho. Oviṋa tjiva mbi tu tarera mape ya avi rire ovitjate, nungwari otjingi tjavyo vya ora, mena rokutja vye ura novitjitwa vyotukatuko, novitjitwa  vyoutwe, poo vyozombepo ozohakohoke. Okutja tji mo toorora oviṋa okutarera, hapo u ripura kutja, “Me yenene okutarera oviṋa ngamwa mbi me vanga? Kavi notjiṋa nomundu warwe”? Poo u ripura kutja, “Omanyando noviṋa avihe vyokurikuturisa ouruvi ovivi”? Poo u toorora nongengezero, mokunakaura imbi ovivi nokutoorora imbi oviwa?

3. Matu sokuripurira ku ye tji matu toorora omanyando poo oviṋa vyokurikuturisa ouruvi?

3 Atuhe tu hepa ovitjitwa vyokurikuturisa orutu novitjitwa vyokurikuturisa ouruvi, nu matu sokuvitoorora nawa. Kunao, matu sokuripura oveni kutja, omanyando poo oviṋa vyokurikuturisa ouruvi mbi matu toorora, mavi ṱunu vi komerikotameneno wetu ku Jehova.

‘AVIHE VI TJITEYE KOHIVIRO YA NDJAMBI’

4. Omurari uṋe wOmbeibela mbu mau yenene okutuvatera okutoorora omanyando wetu poo oviṋa vyokurikuturisa ouruvi?

4 Tji matu riyandja ku Jehova mongumbiro, tu mu kwizikira kutja matu ungurisa omuinyo wetu okumukarera. (Lesa Omuzuvarise 5:4.) Tu kwizika kutja matu tjiti ‘avihe kohiviro ya Ndjambi.’ (1 Ovakorinte 10:31) Ihi matji hee kutja oweṱe ovandu mbu twe riyandja ku Mukuru, nandarire indu tji matu rikuturisa orutu poo tji matu tarere oviṋa vyokurikuturisa ouruvi, nungwari karondu tji tu ri pozombongarero zombongo poo motjiungura tjokuzuvarisa uriri.

5. Omerikotameneno yeṋe ngu matu sokuyandja ku Jehova?

5 Oviṋa avihe mbi matu tjiti mehupo retu, vi ṱuna komerikotameneno wetu ku Jehova. Paulus wa kahurura otjiṋa hi, indu tja tja: “Riyandjeye oveni ku Ndjambi kutja mu rire ombunguhiro onamuinyo nondjapuke Eye me nonyuṋe.” (Ovaroma 12:1) Jesus wa tja: “Nu suvera Muhona Ndjambi woye nomutima woye auhe, nomuinyo woye auhe, nozondunge zoye azehe, nomasa woye aehe!” (Markus 12:30) Aruhe matu sokukara nonḓero yokuyandja imbi ovisembasemba  ku Jehova. Mu Israel otjikuru, ovandu tjaave punguhire Jehova ovinamuinyo, aave undjirwa ko okuyandja ovinamuinyo oviveruke. Nu tji va eta otjinamuinyo tji tji notjipo, Mukuru kaa yakura. (Levitikus 22:18-20) Momuano otjingewo, Jehova mape ya a ha yakura omerikotameneno wetu ku ye. Nu hapo otjikeṋa tji mape ya atji tjiti kutja Jehova a ha yakura omerikotameneno wetu?

6, 7. Omanyando poo omiano vyokurikuturisa ouruvi mbi matu toorora, mavi yenene vi okuṱuna komerikotameneno wetu ku Jehova?

6 Jehova ma tja nai kweṱe: “Rireye ovayapuke, Ami tjinga ambi ri omuyapuke.” (1 Petrus 1:14-16; 2 Petrus 3:11) Jehova kamaa yakura omerikotameneno wetu indu tji ye he ri omayapuke, poo omakohoke. (Deuteronomium 15:21) Omerikotameneno wetu kamaaye rire omakohoke indu tji matu tjiti oviṋa Jehova mbya tonda. Nu wina Jehova kamaa kara nonyuṋe indu tji matu tjaterwa okutarera oviṋa tjimuna otukatuko, ozondjito zoutwe poo oviṋa ngamwa avihe mbi notjiṋa nozombepo ozohakohoke. (Ovaroma 6:12-14; 8:13) Okutjita nao maku tjiti kutja omerikotameneno wetu aye ha rire omakohoke poo omayakurwa ku Jehova, nu maku yenene okuzunḓa oupanga wetu kuna ye.

7 Nu hapo matu yenene vi okutoorora omanyando wetu poo oviṋa vyokurikuturisa ouruvi nounongo? Omirari viṋe mbi mavi tu vatere okutjiwa kutja omanyando yeṋe poo omiano viṋe vyokurikuturisa ouruvi mbi ri oviyakurwa, nu ooviṋe mbi he ri oviyakurwa?

TONDA OUVI

8, 9. Omanyando nomiano viṋe vyokurikuturisa ouruvi mbi matu sokunakaura? Nu omena ratjike?

8 Mouye ndino mu nomiano omingi pekepeke vyokurikuturisa ouruvi. Tjiva oviyakurwa kOvakriste, posi yokutja ovingi vyavyo kaviyakurwa. Rutenga, ngatu tare kutja omiano viṋe vyokurikuturisa ouruvi mbi matu sokunakaura.

 9 Ozomuvi ozengi, notungovi, nozoprograma zotiivii, nomanyando wozovidio, nomaimburiro omengi ndino, vi tjama novitjitwa vyotukatuko, nozondjito zoutwe poo ozombepo ozohakohoke. Oviṋa ovivi potuingi vi munikisiwa otjoviṋa mbi ha eta ouvi, poo nandarire otjoviṋa oviyorise. Nungwari Ovakriste mave sokukondja okunakaura omanyando poo omiano vyokurikuturisa ouruvi mbi ha hitasana nomirari vya Jehova ohunga noukohoke. (Oviungura 15:28, 29; 1 Ovakorinte 6:9, 10) Tji matu nakaura oviṋa otja imbyo, tu raisira Jehova kutja twa tonda ouvi.​—Epsalme 34:14; Ovaroma 12:9.

10. Maku kongorere ko tjike indu tji twa toorora omanyando poo omiano omivi vyokurikuturisa ouruvi?

10 Posi yokutja ovandu tjiva ve muna kutja omanyando poo oviṋa vyokurikuturisa ouruvi mbi nozondjito zoutwe notuvakiro, poo ozombepo ozohakohoke kavi nouvi mbi vi eta. Owo ve ripura kutja, ‘Vi noumba waye? Ami himee roro okutjita oviṋa mbyo.’ Tji matu ripura nao, matu riwovisa oveni. Orondu Ombeibela mai tja: “Owaṋi ngu ma tjiwa omutima womundu? Kape notjiṋa tjarwe otjiwovise nai otja wo; owo wa zunḓaka nga tji u hi nomaverukisiro.” (Jeremia 17:9) Tji matu munu ondjoroka moviṋa Jehova mbye ha yakura, hapo matu yenene vi okutja twa tonda imbi Jehova mbya tonda? Otja pu matu yorokisiwa i oviṋa otja imbyo, opu matu utu okuyakura kutja kavi nouvi mbu vi eta. Nu otja oruveze tji maru kayenda, omeritjiviro wetu womomutima maye utu okungundipara nu aye isa okuturakiza indu tji tu ri pokutoora omukambo omuvi.​—Epsalme 119:70; 1 Timoteus 4:1, 2.

11. Etjangwa rOvagalate 6:7, mari tu vatere vi okutoorora omiano omisemba vyokurikuturisa ouruvi?

11 Embo ra Mukuru mari tja: “Ihi omundu tji ma kunu, wina otji ma kondo.” (Ovagalate 6:7) Ouatjiri owombwi wokutja, tji twe riyandjere okuyorokisiwa i oviṋa ovivi,  kombunda mape ya atu ke vi tjita. Otjotjihorera, Ovakriste tjiva va ṱunwa i oviṋa vyokurikuturisa ouruvi mbi raisa ozondjito zotukatuko tjinene, nga owo oveni tji va katjita orukatuko. Nungwari Jehova u tu pa ombatero ndji matu hepa kutja tu toorore omiano omisemba vyokurikuturisa ouruvi.

UNGURISA OMIRARI VYOMBEIBELA TJI MO TOORA OMIKAMBO

12. Ovikeṋa mbi mavi tu vatere okutoora omikambo omisemba ohunga nomanyando nomiano vyokurikuturisa ouruvi?

12 Otja tji twa munu, omanyando nomiano tjiva vyokurikuturisa ouruvi kavi yakurwa oparukaze ku Jehova, nu matu tjiwa kutja matu sokuvinakaura. Nu hapo matu yenene okutjita vi indu tji tu hi nokutjiwa nawa kutja omanyando nomiano tjiva vyokurikuturisa ouruvi oviyakurwa poo indee? Jehova ke tu pe ozoveta ohunga nokutja oviṋa viṋe mbi tu sokutarera, okupuratena ko, poo okulesa. Nungwari u vanga kutja tu ungurise omeritjiviro wetu womomutima nge hongorerwa i omirari vyOmbeibela. (Lesa Ovagalate 6:5.) Jehova u tu pa omirari, poo ouatjiri mbu tu honga kutja eye u noumune uṋe ohunga noviṋa. Omirari mbi vi tu vatera okurongerisa omeritjiviro wetu womomutima. Wina vi tu vatera okutjiwa ‘imbi Muhona mbi ma vanga kutja tu tjite,’ kutja tu yenene okutjita oviṋa mbi tjata ku ye.​—Ovaefese 5:17.

Omirari vyOmbeibela vi tu vatera okutoorora omanyando poo omiano omisemba vyokurikuturisa ouruvi

13. Ongwaye Ovakriste tji ve toora omikambo mbya panguka ohunga noviṋa vyokurikuturisa ouruvi? Nu otjiṋa otjinanḓengu tjinene kOvakriste avehe otjikeṋa?

13 Potuingi, Ovakriste kave toorora oviṋa vyokurikuturisa ouruvi mbya sana. Omena ratjike? Omena rokutja katu ya suvera oviṋa vimwe. Nu wina, otjiṋa tji mape ya atji rire otjiyakurwa komundu umwe, mape ya atji ha rire otjiyakurwa ku warwe. Nu nandarire kutja pe ri nao, Ovakriste avehe mave sokuhongorerwa i omirari vyOmbeibela. (Ovafilipi  1:9) Ovyo mavi tu vatere okutoorora oviṋa mbi ri oviyakurwa ku Mukuru.​—Epsalme 119:11, 129; 1 Petrus 2:16.

14. (a) Otjikeṋa otjinanḓengu tji matu sokuripurira ko ohunga nomuano mbu tu ungurisa oruveze rwetu? (b) Paulus wa yandja eronga riṋe kOvakriste?

14 Otjiṋa tjarwe tji matu sokuripurira ko, oruveze ndu matu ungurisa momanyando noviṋa vyokurikuturisa ouruvi. Ihi tji yenena okuturaisira kutja oviṋa mbyo ovinanḓengu pu pe ṱa pi kweṱe. OtjOvakriste, otjiungura tjetu ku Jehova ootjiṋa otjinanḓengu tjinene mehupo retu. (Lesa Mateus 6:33.) Nungwari nokuhina okuundjira ko, mape ya atu yandjere omanyando noviṋa vyokurikuturisa ouruvi okukambura oruveze rwetu oruingi. Paulus wa yandja eronga ndi kOvakriste: “Ṱakamiseye kutja mamu kara nongarero ndja sana pi. Amu kara otja ovandu mbe hi nozondunge,  nungwari kareye otja ovanazondunge. Unguriseye oruveze ndu mu na rwo momuhingo omusemba.” (Ovaefese 5:15, 16) Okutja matu sokutwapo oruveze ndu matu hepa okuungurisa momanyando noviṋa vyokurikuturisa ouruvi, nu aruhe matu sokukondja kutja otjiungura tjetu ku Mukuru tji rire otjiṋa otjitenga mehupo retu.​—Ovafilipi 1:10.

15. Matu ritjevere vi komanyando poo oviṋa vyokurikuturisa ouruvi mbi mavi yenene okuzunḓa oupanga wetu kuna Jehova?

15 Oukahu kutja, matu sokunakaura omanyando noviṋa vyokurikuturisa ouruvi mbi matu tjiwa kutja kaviyakurwa ku Jehova. Nu hapo matu sokutjita vi ohunga noviṋa mbi mape ya atu keyakeya kutja ovisemba poo indee? Hapo matu hepa okukara nongengezero ohunga na vyo? Ripurira ku imbi. Ngatu tje mo kayenda mozondundu. Mape ya okayenda pomukuro wa zo? Kako komoo roro. Tji wa suvera omuinyo woye, mo kara kokure noumba. Otjiperi nao wina ohunga nomanyando poo oviṋa vyokurikuturisa ouruvi mbi matu toorora. Embo ra Mukuru ri tja: “Isa ouvi nu u kayende osemba.” (Omiano 4:25-27) Okutja tu nakaura oviṋa mbi matu tjiwa kutja ovivi, nu tu kara kokure na ngamwa mbi matu munu kutja mape ya avi ha rire oviwa kweṱe. Nu wina tu kara kokure na imbi mbi mape ya avi zunḓa oupanga wetu kuna Jehova.

OKUHARA OUMUNE WA JEHOVA

16. (a) Ovikeṋa tjiva Jehova mbya tonda? (b) Matu raisa vi kutja twa tonda imbi Jehova mbya tonda?

16 Omutjange wEpsalme wa tja: “Eṋe mbu mwa suvera Muhona, tondeye ouvi!” (Epsalme 97:10) Ombeibela i tu honga ohunga noumune wa Jehova nomuano mbwe ripura. Ripura omuini kutja, oviṋa mbi mo rihongo mavi yenene vi okukuvatera okuhara oumune tjimuna owa Jehova. Otjotjihorera, twe rihonga kutja Jehova wa tonda “eraka rovizeze, omake nge zepa ovandu ovehinandjo, ondunge ndji ripura ourunde, ozombaze nḓe hakahana okukatjita ourunde.”  (Omiano 6:16-19) Twe rihonga kutja matu sokunakaura “oruvakiro, . . . okurikotamena kovisenginina, oundjai, . . . omazenge, . . . eruru, okupurukisiwa i omanuwa omazeu, evyaro noviṋa avihe ohamukwao na imbyo.” (Ovagalate 5:19-21) Wa munu kutja omirari vyOmbeibela mbi, mavi yenene okukuvatera vi tji mo toorora omanyando poo omiano vyokurikuturisa ouruvi? Matu vanga okukongorera omirari vya Jehova moviṋa avihe mehupo retu, tji tu ri puna varwe, na tji tu ri atuyerike. (2 Ovakorinte 3:18) Ouatjiri owombwi wokutja, oviṋa mbi tu tjita tji tu ri atuyerike, potuingi vi raisa kutja tjiri oweṱe ovangendu.​—Epsalme 11:4; 16:8.

17. Ngunda atu hiya toorora omanyando poo oviṋa vyokurikuturisa ouruvi, omapuriro yeṋe ngu matu sokuripura oveni?

17 Okutja, tji mo toorora omanyando poo oviṋa vyokurikuturisa ouruvi, ripura omuini kutja, ‘Oviṋa mbi me toorora mavi ṱunu vi koupanga wandje na Jehova? Mavi ṱunu vi komeritjiviro wandje womomutima?’ Ngatu tare komirari vyarwe mbi mavi yenene okutuvatera tji matu toorora omanyando poo oviṋa vyokurikuturisa ouruvi.

18, 19. (a) Paulus wa yandja eronga riṋe kOvakriste? (b) Omirari viṋe mbi mavi tu vatere okutoorora omanyando poo oviṋa vyokurikuturisa ouruvi?

18 Oviṋa mbi mo toorora okutarera otjomuano wokurikuturisa ouruvi, ombi mo utu okuripurira ko. Paulus wa tja: “Rizemburukeye noviṋa oviwa nu mbya pwa ondangero, okutja oviṋa vyouatjiri noupukurukwe nousemba noukohoke nouwa nondangu ombwa.” (Ovafilipi 4:8) Tji matu urisa ouripura wetu noviṋa oviwa otja imbyo, otji matu yenene okutja nai ku Jehova: “Omambo nomeripura wandje ngaye yakurwe i Ove, Muhona.”​—Epsalme 19:14.

19 Ripura omuini kutja, ‘Mbi urisa ouripura wandje novikwaye? Tji mba zu nokutarera omuvi poo oprograma yorive, mbi sewa nomeripura omawa poo indee? Mbi sewa  nohange momuinyo nomeritjiviro omawa womomutima? (Ovaefese 5:5; 1 Timoteus 1:5, 19) Mbi kara noupukurukwe wokukumba ku Jehova? Poo mbi kara nomuhihamwatima? Oviṋa mbi mba zu nokutarera mavi tjiti kutja mbi ripurire kozondjito zoutwe poo zotuvakiro? (Mateus 12:33; Markus 7:20-23) Omanyando poo oviṋa vyokurikuturisa ouruvi mbi mbi toorora, vi tjita kutja mbi “horere komihingo vyouye mbwi”?’ (Ovaroma 12:2) Omaziriro watjiri ngu matu yandja komapuriro nga, maye yenene okutuvatera okumuna kutja matu sokutjita vi kutja tu yanḓiparise oupanga wetu kuna Jehova. Matu vanga okukumba otja omutjange wEpsalme tja kumba, indu tja tja: “Ndji tjaera kutja e ha kara nonyuṋe moviṋa vyomungandjo.” *​—Epsalme 119:37.

OMIKAMBO MBI MATU TOORA VI ṰUNA KU VARWE

20, 21. Tji matu toorora omanyando poo oviṋa vyokurikuturisa ouruvi, ongwaye tji matu sokuyandja ombango koumune wovakwetu?

20 Omurari warwe omunanḓengu mbu matu sokuripurira ko owombwi: “Avihe vi ri mouvara wetu! Nungwari kakutja avihe otji vi tunga ombongo. Ape ha kara omundu ngu me ripahere ombwiro ye porwayo, nungwari auhe nga pahe ombwiro yomukwao.” (1 Ovakorinte 10:23, 24) Kape nakuheya kutja tji tu nouyara wokutjita atjihe tji matu vanga, okutja matu sokutjita nao. Matu sokuripura nawa ohunga nokutja omikambo mbi matu toora mavi ṱunu vi kovakambure ovakwetu.

21 Omeritjiviro wovandu womomutima ya panguka. Otjotjihorera, omeritjiviro woye womomutima mape ya aye ku yandjere okutara oprograma yorive motiivii. Posi yokutja, okuzambo okazuva kutja oprograma otjingeyo mai  zunḓa omeritjiviro womomutima womukambure omukweṋu. Mo tjiti vi? Nandarire kutja u nousemba wokutarera oprograma ndjo, mape ya arire nawa tji wa tye okuhina okuitarera. Omena ratjike? Mena rokutja komoo vanga ‘okutura ondjo kovakambure ovakweṋu’​—poo nandarire ‘okutura ondjo ku Kristus.’ (1 Ovakorinte 8:12) Kamaatu vanga okutjita otjiṋa ngamwa atjihe tji matji putarisa ovakambure ovakwetu.​—Ovaroma 14:1; 15:1; 1 Ovakorinte 10:32.

22. Matu raisa vi ondengero indu omukambure omukwetu tja toora omukambo mbwa panguka ku imbwi owetu ohunga nomanyando poo omiano vyokurikuturisa ouruvi?

22 Indu omeritjiviro woye womomutima tji ye hi nokukuyandjera okutarera, okulesa poo okutjita otjiṋa omukambure omukweṋu tji ma munu kutja katji noumba, mo yenene okutjita vi? Mena rokutja wa suvera omukambure omukweṋu nu we mu tenga, komoo vanga okumuṋiṋikiza kutja ma toore omikambo tjimuna ovyoye. Omuhinge wotjihauto ma tjiwa kutja ovahinge varwe mape ya ave hingi tjinene poo kaṱiṱi kombanda ye. Ihi katji nakuheya kutja owo kavahinge ovasemba. Momuano otjingewo, ove nomukambure omukweṋu mape ya amu kongorere omirari vyOmbeibela, posi yokutja oumune weṋu au panguka kaṱiṱi ohunga nomanyando poo omiano vyokurikuturisa ouruvi mbi ri oviyakurwa.​—Omuzuvarise 7:16; Ovafilipi 4:5.

23. Otjikeṋa tji matji tu vatere okutoorora omanyando wetu poo omiano vyokurikuturisa ouruvi nawa?

23 Nambano otjikeṋa tji matji tu vatere okutoorora omanyando wetu poo omiano vyokurikuturisa ouruvi nawa? Tji twa ungurisa omeritjiviro wetu womomutima nge hongorerwa i omirari vyOmbeibela, na tji twa suvera ovakambure ovakwetu, maku tu vatere okutoorora omanyando poo omiano omisemba vyokurikuturisa ouruvi. Kunao matu kara nenyando ndi za mokutjita ‘avihe kohiviro ya Ndjambi.’

^ par. 19 Matu yenene okumuna omirari vyarwe mbi mavi tu vatere okutoorora omanyando poo oviṋa vyokurikuturisa ouruvi mOmiano 3:31; 13:20; mOvaefese 5:3, 4; na mOvakolose 3:5, 8, 20.