Twende kovidio oini

Twende komurya

Ovahongonone vaJehova

Toorora eraka Otjiherero

 EKONDWA 16

Pirukira Satan

Pirukira Satan

“Pirukireye Satan, neye ma tupuka a zu po pu eṋe.”​—JAKOBUS 4:7.

1, 2. Ovikeṋa mbi tu sokutjiwa nawa ohunga na Satan nozondemone ze?

EHUPO mouye wa Jehova oupe mari rire esemba. Matu kahupa momuano Mukuru mbwe vanga. Posi yokutja, ndino eṱe tu hupa mouye mbu honaparerwa i Satan nozondemone ze. (2 Ovakorinte 4:4) Nandarire kutja katu yenene okuvemuna, eṱe tu tjiwa kutja okuveri nu ve nomasa.

2 Mekondwa ndi, matu katara komiano mbi mavi tu vatere okukara popezu na Jehova nokuritjevera ku Satan. Jehova wa kwizika kutja me tu vatere. Posi yokutja tu sokutjiwa nawa omiano Satan nozondemone ze mbi ve ungurisa okutupukisa nokuturwisa.

“OTJA ONGEYAMA, NDJI MAI TYE OVIMBORO”

3. Satan u vanga okutjita tjike kweṱe?

3 Satan u tja ovandu ve rikotamena ku Jehova mena rouwa mbu ve muna ku ye, nokutja tji twa munu ouzeu matu isa okukarera Jehova. (Lesa Job 2:4, 5.) Satan nozondemone ze tji va munu kutja omundu ma vanga okurihonga ohunga na Jehova, ve kondja okumutjaera. Owo ve pindika omundu tje riyandja ku Jehova na papitisiwa. Ombeibela i sasaneka Satan ‘nongeyama, ndji mai tye ovimboro amai paha ingwi ngu mai vanga  okuteta.’ (1 Petrus 5:8) Satan u vanga okuteya oupanga wetu kuna Jehova.​—Epsalme 7:1, 2; 2 Timoteus 3:12.

Satan u pindika tji me tu munu amatu ungurire Jehova

4, 5. (a) Otjikeṋa Satan tje ha sora okutjita? (b) ‘Okupirukira Satan’ ku heya tjike?

4 Posi yokutja katu sokutira Satan nozondemone ze. Mena rokutja Jehova ke ve yandjere okutjita oviṋa avihe mbi mave vanga. Jehova wa kwizika kutja “otjimbumba otjinene” tjOvakriste vatjiri matji tuurunga ‘ondatumisire ondirise.’ (Omavandururiro 7:9, 14) Satan ke notjiṋa okutjita ohunga notjiṋa ho, mena rokutja Jehova u tjevera ovakarere ve.

 5 Tji twe riṱizire popezu na Jehova, Satan kamaa yenene okuteya oupanga wetu kuna Ye. Embo ra Mukuru mari tja: “Muhona u ri puna eṋe, eṋe ngunda amu ri puna Ye.” (2 Ekuruhungi 15:2; lesa 1 Ovakorinte 10:13.) Ovakazendu novarumendu ovaṱakame ovakuru tjimuna Abel, Henok, Noa, Sara na Moses, va yenena okupirukira Satan mokukara popezu na Jehova. (Ovaheberi 11:4-40) Eṱe matu yenene okutjita nao wina. Embo ra Mukuru ri kwizika nai: “Pirukireye Satan, neye ma tupuka a zu po pu eṋe.”​—Jakobus 4:7.

TU ‘NOTJIRWA NOZOMBEPO OZONAMASA’

6. Satan u tu rwisa momiano viṋe?

6 Nandarire kutja Satan u tjiwa kutja ka yenene okutjita avihe mbi ma vanga, eye u kayenda komurungu okukondjisa okuteya oupanga wetu kuna Mukuru momiano avihe. Ndino, Satan u tu rwisa momiano ovingi, nu eye u ungurisa omiano mbyaa ungurisa rukuru. Hapo omiano viṋe mbi?

7. Ongwaye Satan tje rwisa ovakarere va Jehova?

7 Omuapostele Johanes wa tja: “Ouye auhe u ri kehi youhonapare waingwi umwe Omunaurunde.” (1 Johanes 5:19) Satan u honaparera ouye mbwa zunḓaka mbwi nu u vanga kutja ovakarere va Jehova ve mu karere wina. (Mika 4:1; Johanes 15:19; Omavandururiro 12:12, 17) Satan u tjiwa kutja u noruveze orusupi, kunao u kondja nomasa okutjita kutja auhe wetu aha rire omuṱakame ku Mukuru. Povikando tjiva Satan u tu wira osemba, nungwari povikando vyarwe u tu wira movineya.

8. Omukriste auhe ma sokutjiwa ye?

8 Ovaefese 6:12 ri tja: “Matu ru nozombepo ozonamasa zouye ourunde mbwi, nomauhona nomauvara nozombara zouye mbwi wonḓorera.” Omukriste auhe  u notjirwa kuna Satan nozondemone ze. Tu sokutjiwa nawa kutja avehe mbe riyandja ku Jehova, ve ri motjirwa hi. Morutuu rwe kOvaefese, omuapostele Paulus wa tunduuza Ovakriste povikando vitatu “okupirukira omatjendje wa Satan.”​—Ovaefese 6:11, 13, 14.

9. Satan nozondemone ze ve kondja okutjita tjike kweṱe?

9 Satan nozondemone ze ve kondja okutupukisa momiano pekepeke. Nu mena rokutja twa tuurunga omarorero wa Satan yemwe, kaku hee kutja kamaatu yenene okupukisiwa i ye otjikando tjarwe. Satan u kondja okutara kutja tu noungundipare waye, kokutja ma yenene okupaha omiano mbi me tu pukisa na vyo. Nungwari katu nokuhepa okupukisiwa i ye, orondu Ombeibela i tu honga ohunga nomiano Satan mbye ungurisa okupukisa na vyo ovandu. (2 Ovakorinte 2:11; lesa Omakahururiro 31.) Omuano umwe mbwe ungurisa, oundjai.

KARA KOKURE NOZONDEMONE

10. (a) Oundjai u kamburira mo tjike? (b) Jehova u noumune uṋe ohunga noundjai?

10 Oundjai u kamburira mo oviṋa vyomasa omahimise mbi waneka ovandu ku nozondemone, tjimuna okuuka, ounganga, okurovasana poo okuhungira ku novaṱi. Ombeibela i tja oundjai oviṋa ‘oviyaukise,’ nokutja kamaatu yenene okukara norupa moviṋa otja imbyo ngunda atu rikotamena ku Jehova. (Deuteronomium 18:10-12; Omavandururiro 21:8) Ovakriste mave sokunakaura omiano ngamwa avihe vyoundjai.​—Ovaroma 12:9.

11. Okuvanga okutjiwa ohunga noviṋa vyomasa omahimise mape ya aku tu twara ku ye?

11 Satan u tjiwa kutja tji tu nanukirwa i oviṋa vyomasa omahimise, ma rire oupupu ku ye okutunanena koundjai.  Omuano ngamwa auhe woundjai mau teya oupanga wetu kuna Jehova.

SATAN U KONDJA OKUTUPUKISA

12. Omomiano viṋe Satan me vanga okuzunḓa omeripura wetu?

12 Satan u kondja okukurungisa ouripura wovandu. Eye u kuna omakeyakeyero movandu kouṱiṱiṱiṱi, ngandu tji va utu okumuna kutja “ouvi owo ouwa, nouwa owo ouvi.” (Jesaja 5:20) Satan u tjita kutja ovandu ve ute okumuna kutja omaronga wOmbeibela kaye vatere, nokutja matu kara nondjoroka indu tji twa nakaura omirari vya Mukuru.

13. Satan wa kondja vi okukuna omakeyakeyero?

13 Okukuna omakeyakeyero omuano umwe Satan mbwe ungurisa okupukisa ovandu nondoṋeno. Eye u ungurisa omuano mbwi okuza ku rukuru. Motjikunino tja Eden, eye wa kuna omakeyakeyero tja pura Eva nai: “Indu Ndjambi otja hee, tjiri, kutja aamu ri komiti ngamwa avihe motjikunino?” (Genesis 3:1) Moruveze rwa Job, Satan wa pura Jehova momurungu wovaengeli ve na tja: “Job itje rikotamena kOve are, andakuzu ke notjiṋa tje muna mo?” (Job 1:9) Nu kombunda Jesus tja za nokupapitisiwa, Satan we mu rora na tja: “Tjinangara oOve Omuna wa Ndjambi, raera omawe nga kutja ye rire ozomboroto.”​—Mateus 4:3.

14. Satan ma yenene vi okutjita kutja ovandu ve ute okukeyakeya kutja oundjai otjiṋa tji tji eta oumba?

14 Ndino, Satan u kayenda komurungu okukuna omakeyakeyero. Eye u kondja okutjita kutja ovandu ave ha munu kutja oundjai otjiṋa otjivi, mokuumunikisa otjotjiṋa otjiwa. Ovakriste tjiva nandarire va wira mongwehe ndji, nu kave munu ouvi movitjitwa vyoundjai. (2 Ovakorinte 11:3) Nu hapo matu yenene vi okuriṱizira  kokure noviṋa mbyo? Matu yenene vi okurivatera kutja atu ha pukisiwa i Satan novineya vye? Ngatu konḓonone oviṋa vivari Satan mbye ungurisa okutupukisa: oviṋa vyokurikuturisa ouruvi nomapangero.

SATAN U UNGURISA OZONḒUMA ZETU OKUTUPUKISA

15. Oviṋa vyokurikuturisa ouruvi vi yenena vi okutuwaneka ku nozondemone?

15 Kundino ozomuvi, nozovidio, nozoprograma zotiivii, nomanyando wokombiuta, notungovi otuingi tu raisa oviṋa vyozondemone, noundjai noviṋa vyomasa omahimise. Ovengi ve muna oviṋa mbi otjoviṋa vyokurikuturisa ouruvi uriri, nu kave munu kutja mokutarera oviṋa mbi ve yandjera ozondemone mehupo rawo. Omundu wina ma yenene okuwana nozondemone okupitira moviṋa tjimuna ozonyose nḓe kara momambo nḓe tjivisa oruyaveze, okuuka mokutara omaheero womikoka mbi ri momake wetu, noviṋa vyarwe mbi ungurisiwa momaukiro. Satan u horeka oumba mbu za moviṋa mbi, nu u tjita kutja oviṋa otja imbyo vi munike otjovihimise, oviyorokise novinanambango tjinene. Omundu u yenena okuripura kutja, okutara oviṋa mbi notjiṋa nozondemone poo omasa omahimise kaku noumba, opuwo indu tje hi nokuvitjita. Ongwaye okuripura nao tji maku ku etere oumba?​—1 Ovakorinte 10:12.

16. Ongwaye tji matu sokunakaura ozomuvi, omisiki poo omambo woviṋa vyozondemone?

16 Satan nozondemone ze kave yenene okutjiwa ouripura wetu. Posi yokutja momikambo mbi tu toora kourike wetu na pu neṱunḓu retu, ve yenena okutjiwa kutja tu zera tjike, nokutja tu ripura tjike, poo twa suvera omanyando yeṋe. Tji matu toorora ozomuvi, omisiki poo omambo nge tjama nozondjai, omarovero, omakamburiro wozondemone, ovaroi, oviruru mbi sepa ovandu  ombinḓu (vampires), poo oviṋa otja imbyo, okutja Satan nozondemone ze mave munu kutja tu vanga okutjiwa ohunga na wo. Mena ranao, mape ya ave kondjo okututwa moviṋa otja imbyo tjinene.​—Lesa Ovagalate 6:7.

17. Satan ma yenene vi okuungurisa onḓero yetu yokuvanga okuveruka okutupukisa?

17 Satan wina u yenena okuungurisa ouvere wetu okutupukisa. Ovandu ovengi ndino va vera. Omundu mape ya wa kondjisa omiano omingi pekepeke vyomapangero, nokuhina ondoṋeno. (Markus 5:25, 26) Eye mape ya a kara nonḓero yokuveruka tjinene, nga tja utu okuritwa momuano ngamwa auhe womapangero.  Nungwari otjOvakriste, matu sokukengeza kutja atu ha toorora omiano vyomapangero mbi notjiṋa “noundjai.”​—Levitikus 19:26.

Ṱaṱera ku Jehova tji wa vere

18. Omiano viṋe vyomapangero Omukriste mbye sokunakaura?

18 Mu Israel otjikuru, mwa ri ovandu tjiva mbaave ungurisa ‘oundjai.’ Jehova wa tja nai ku wo: “Tji mamu yere omake weṋu mokukumba, ami hi nokutara ko ku eṋe. Nandi mwa kumbu tjinene pu pe ṱeki pi, Ami hi nakupuratena ko.” (Jesaja 1:15) Jehova kaa vanga okupuratena kozongumbiro zawo oparukaze! Kamaatu vanga okutjita otjiṋa tji matji zunḓa oupanga wetu kuna Jehova, nokutjaera kutja e he tu vatere, nu tjinenenene indu tji twa vere. (Epsalme 41:3) Kunao matu sokukonḓonona nawa kutja omuano womapangero mbu matu toorora, u notjiṋa nozondemone poo omasa omahimise. (Mateus 6:13) Nu omapangero ngo tji ye notjiṋa noviṋa otja imbyo momuano ngamwa auhe, matu sokuyenakaura!​—Lesa Omakahururiro 32.

OMAHUNGI OHUNGA NOZONDEMONE

19. Satan wa kuna vi emuma movandu ovengi?

19 Ngunda ovandu tjiva ave muna kutja Satan nozondemone kave ko, varwe ve tjiwa kutja owo ovandu vakatjiri mena roviṋa mbi va tuurunga mo. Ovandu ovengi ve tira ozombepo ozohakohoke nu va rira ovakarere votuzo twovizerika. Varwe ve kuna emuma rozondemone, mokuserekarera omahungi ohunga noviṋa ovivi mbi ze tjita kovandu. Omahungi otja inga potuingi ye nana ombango yovandu, nu ovandu ve tjaterwa okukeyeserekarera komurungu. Omahungi otja ingo potuingi ye tjita kutja ovandu ve ute okutira Satan.

20. Omomuano uṋe mu mape ya atu handjaura ovizeze vya Satan?

20 Ripurira ku imbi: Satan u vanga kutja ovandu ve  mu tire. (2 Ovatesalonika 2:9, 10) Eye omunavizeze nu u tjiwa kutja ma yenene vi okuṱuna kouripura wa imba mbe nanukirwa i oviṋa vyozondemone, nokutjita kutja ve kambure moviṋa mbi he ri ouatjiri. Ovandu otja imbo mape ya ave serekarere omahungi woviṋa mbi ve nangarasi va muna poo va zuva. Otja ovandu mba pu ve serekarera omahungi nga, omahungi nga opu ye neneparisiwa. Eṱe kamaatu vanga okuvatera Satan okukuna emuma movandu, mokuserekarera omahungi otja ingo.​—Johanes 8:44; 2 Timoteus 2:16.

21. Moruveze rwokuserekarera omahungi ohunga nozondemone, matu sokuhungira ohunga natjike?

21 Tjinangara pe nomukarere wa Jehova ngwa rorwa i ozondemone, eye kamaa serekarere omahungi ngo otjomuano wokuyorokisa varwe. Ovakarere va Jehova kave nokuhepa okutira otjiṋa Satan nozondemone ze tji mave yenene okutjita. Nungwari tu sokuyandja ombango ku Jesus nomasa nga pewa i Jehova. (Ovaheberi 12:2) Jesus kena pa yorokisa ovahongewa ve nomahungi ohunga nozondemone. Eye aa yandja ombango kombuze yOuhona na ‘koviungura ovihimise vya Ndjambi.’​—Oviungura 2:11; Lukas 8:1; Ovaroma 1:11, 12.

22. Ove wa tya okutjita vi?

22 Atu zembi kutja ondando ya Satan oyokuteya oupanga wetu kuna Jehova. Eye ma tjiti atjihe tji ma yenene okutjita, kutja tu pandjare oupanga mbo. Nungwari, tu tjiwa omiano Satan mbye ungurisa okutupukisa, neṱe twa tya okupirukira omiano avihe vyoundjai. ‘Satan katu nokumupa oruveze’ kutja a ha ngundiparise ongamburiro yetu. (Lesa Ovaefese 4:27.) Tji twa pirukire Satan, kamaatu pukisiwa i ye, nu matu kara mondjeverero ya Jehova.​—Ovaefese 6:11.