Twende kovidio oini

Twende komurya

Ovahongonone vaJehova

Toorora eraka Otjiherero

 EKONDWA 12

“Hungireye omambo omawa nomatunge”

“Hungireye omambo omawa nomatunge”

“Ngaamu hungire omambo omatwe novinyo vyeṋu; nungwari hungireye omambo omawa nomatunge.”​—OVAEFESE 4:29.

1-3. (a) Otjiyandjewa tjiṋe otjiwa Jehova tje tu pa? Matu yenene vi okutjiungurisa momuano omuvi? (b) Matu sokuungurisa vi otjiyandjewa tji twa pewa tjokuhungira?

NGATU tje ihe wa yandja okanyeti komuzandona we otjotjiyandjewa. Neye tjiri ma tjaterwa kutja wa yandja otjiyandjewa tjapeke komuzandona we. Nu hapo ma tjiti vi indu omuzandona we tja hingi okanyeti ke momuano omuvi, nga tji kerivete momundu ne mu hihamisa? Ihe ma munu ko vi?

2 Jehova ongu yandja “otjiyandjewa atjihe otjiwa, notjipewa atjihe otjipwe.” (Jakobus 1:17) Otjiyandjewa tjimwe otjiwa tje tu pa, okuyenena okuhungira. Otjiyandjewa hi tji tu yandjera okuraera varwe omeripura noumune wetu. Tu yenena okuhungira oviṋa mbi vatera varwe nokuyorokisa omitima vyawo. Posi yokutja oviṋa mbi matu hungire vi yenena okuhihamisa varwe wina.

3 Omambo ye nomasa tjinene, nu Jehova u tu honga omuano omusemba wokuhungira. Eye ma tja: “Ngaamu hungire omambo omatwe novinyo vyeṋu; nungwari hungireye omambo omawa nomatunge otja pu pe ri ohepero, kokutja inga ngu mamu hungire, ye yandje onyuṋe kovapuratene.” (Ovaefese 4:29) Ngatu tare kutja matu  yenene vi okuungurisa otjiyandjewa hi okuza ku Mukuru momuano mbu mau tjata ku ye nokutunduuza varwe.

ṰAKAMISA OMAMBO WOYE

4, 5. Matu rihongo tjike membo romiano ohunga nomuano omambo mu ye nomasa?

4 Omambo ye nomasa, okutja matu sokukengeza oviṋa mbi matu hungire, nomuano mbu matu hungire. Omiano 15:4 mari tja: “Omambo omapore ye eta omuinyo, nungwari inga omandandi ye koza omutima.” Otja omuti omuwa tji u yandja omuinyo nokuwisa omuinyo womundu pehi, omambo omawa wina ye kovisa omupuratene. Nungwari omambo omavi ye hihamisa varwe.​—Omiano 18:21.

Omambo omapore ye kovisa omuinyo

5 Omiano 12:18 mari tja: “Omambo nge hi nomeripura ye tuvakaṋa tjimuna engaruvyo.” Owo ye yenena okuhihamisa varwe momuinyo nokuteya oupanga. Ngahino mo zemburuka indu omundu tje ku hungira omambo omavi nge ku hihamisa tjinene. Etjangwa romiano ndo wina ra kayenda komurungu nu ra tja: “Omambo nge hungirwa mozondunge ye verukisa.” Omambo nge hungirwa nozondunge ye yenena okuverukisa omutima, nokuṱuna oupanga mbwa zunḓwa i okuhina okuzuvasana. (Lesa Omiano 16:24.) Tji twa tjiwa nawa kutja omambo wetu ye ṱuna ku varwe, matu yeungurisa nongengezero.

6. Ongwaye tje ri ouzeu kweṱe okutjaera omambo wetu?

6 Tu sokutjevera omuano mu matu hungire, mena rokutja kaweṱe ohomonena. ‘Omutima womundu u nomerizerero nombahero ombi,’ nu omambo wetu potuingi ye raisa imbi mbi ri momitima vyetu. (Genesis 8:21; Lukas 6:45) Ku rira ouzeu tjinene okutjaera omambo wetu. (Lesa Jakobus 3:2-4.) Posi yokutja matu sokukondja okuhungira momuano omusemba kuna varwe.

7, 8. Omambo wetu ye ṱuna vi koupanga wetu kuna Jehova?

 7 Eṱe wina tu sokutjevera omuano mu matu hungire, mena rokutja tu nomerizirira komurungu wa Jehova ohunga noviṋa mbi matu hungire nomuano mu matu hungire. Jakobus 1:26 mari tja: “Omundu tji ma tjangovasi u karera Ndjambi nu a ha tjaere eraka re, indino otjiungura tje tjongamburiro opouriri, neye me ripukisa omuini.” Embo nda ungurisiwa okutoroka “opouriri” ri yenena okuheya “omungandjo.” (1 Ovakorinte 15:17) Okutja tji tu hi nokuripurira komuano mu tu hungira, matu yenene okuzunḓa poo okuteya oupanga wetu kuna Jehova.​—Jakobus 3:8-10.

8 Oukahu kutja tu nomapu omengi ngu matu sokukarera nongengezero ohunga noviṋa mbi matu hungire nomuano mu matu hungire. Tu sokutjiwa kutja omuano uṋe wokuhungira mbu matu sokunakaura, kokutja tu yenene okuungurisa otjiyandjewa tjetu tjokuhungira momuano Jehova mbwe vanga.

 OMAMBO NGE HA TUNGU

9, 10. (a) Omuano uṋe wokuhungira mbu u ungurisiwa tjinene mouye? (b) Ongwaye tji tu nakaura okuungurisa omambo omavi nomahahu?

9 Ovandu ovengi ndino ve ungurisa omambo omayaukise nomahakohoke. Ovengi ve muna kutja ve sokutukana nokuungurisa omambo omahazendu kokutja ve zuvake. Ovanyande vomiṱuka potuingi ve ungurisa omambo omayaukise neraka ehazendu okuyorokisa ovandu. Posi yokutja omuapostele Paulus wa tja: “Tweye pehi oviṋa avihe mbi: Omazenge nomapindi nonyengo nomayambururiro. Nu ngaamu piti omambo wouhahu movinyo vyeṋu.” (Ovakolose 3:8) Eye wina wa weza kutja, “omambo omavi nomahahu nowehanḓu aye ha zuvaka mu eṋe.”​—Ovaefese 5:3, 4.

10 Jehova na imba mbe mu suvera, kave yakura omambo omavi nomahahu. Owo kamakohoke. MOmbeibela, ‘ouhakohoke’ itjimwe ‘tjoviungura vyongaro youndu.’ (Ovagalate 5:19-21) ‘Ouhakohoke’ u kamburira mo ouvi pekepeke, nu ongaro imwe ohakohoke i twara ku yarwe. Omundu tje kayenda komurungu okuungurisa eraka ehakohoke, nomambo omavi nomahahu, otjiraisiro tjokutja omundu ngo kasokurira orupa rwombongo rukwao.​—2 Ovakorinte 12:21; Ovaefese 4:19; lesa Omakahururiro 23.

11, 12. (a) Okuyamba ku kamburira mo tjike? (b) Ongwaye tji matu sokunakaura okuyamburura ovandu varwe?

11 Eṱe wina tu sokunakaura okuyamba. Otjovandu tu vanga okuraisa kutja tu nonḓero mu varwe, nu tu tjaterwa okuhaṋasana ozombuze ohunga nomapanga noveṱunḓu retu. Nandarire meserewondo etenga, Ovakriste voruveze orukuru aave vanga okutjiwa kutja ovakambure ovakwao ve ri mongaro iṋe, nu omomuano uṋe mu mave yenene okuvevatera. (Ovaefese 6:21, 22; Ovakolose 4:8, 9)  Posi yokutja, oupupu kehungi ewa ohunga novandu varwe okutanaukira moruyambo. Tji twa kaserekarera otuyambo, mape ya atu hungire oviṋa mbi he ri ouatjiri, poo mbi sokukara poo okuṱiziwa oviundikwa. Tji tu hina okukengeza, omahungi otja ingo mape ya aye tjiti kutja tu ute okukuminina varwe poo okuveyamburura. Ovafarisei va yamburura Jesus indu tji ve mu kuminina kutja wa tjita oviṋa mbye hina wa tjita. (Mateus 9:32-34; 12:22-24) Okuyamburura omundu ku zunḓa ena romundu, ku eta oviposa nomihihamo, nu ku teya oupanga.​—Omiano 26:20.

12 Jehova u vanga kutja tu ungurise omambo wetu okuvatera nokutunduuza varwe, nungwari kavanga kutja tu yeungurise okueta ohaṋi. Jehova wa tonda imba mbe “hohiza oviposa pokati kovazamumwe.” (Omiano 6:16-19) Omuyamburure omutenga ngwa yamburura Mukuru, wa ri Satan Omudiaboli. (Omavandururiro 12:9, 10) Mouye ndino, tu muna ovandu ovengi mbe hungira ovizeze ohunga novakwao. Posi yokutja ihi otjiṋa tji tji ha sokutjitwa mombongo. (Ovagalate 5:19-21) Okutja tu sokutjevera imbi mbi matu hungire, nu tu sokuripura ngunda atu hiya hungira. Ngunda au hiya serekarera otjiṋa ohunga nomundu warwe, rutenga ripura omuini kutja, ‘Hapo oviṋa mbi me vanga okuserekarera ouatjiri, poo indee? Otjiṋa otjiwa okutjita nao? Mavi vatere omundu ngo? Etje vanga kutja omundu ngo ma zuve oviṋa mbi me serekarere ohunga na ye? Me munu ko vi indu omundu tja serekarere oviṋa otja imbi ohunga na ami?’​—Lesa 1 Ovatesalonika 4:11.

13, 14. (a) Ondjambu i ṱuna vi ku varwe? (b) Ondjambu ovikeṋa, nu ongwaye Ovakriste tji ve sokunakaura okuyamburura varwe?

13 Povikando tjiva, atuhe tu hungira oviṋa mbi tu pa omuhihamwatima kombunda. Posi yokutja katu nokuvanga okuiririra okupangura ovakwetu poo okuhungira  oviṋa ovivi ohunga na wo. Omambo omayamburure kaye sokupita movinyo vyetu. Paulus wa tja: “Iseye ongore ngamwa aihe, nomapindi nomazenge. Amu rokoha nokuyamburura ovakweṋu.” (Ovaefese 4:31) OzOmbeibela zarwe za toroka embo ndi ‘okuyamburura’ otja “omambo omavi,” “eraka ehihamise,” “neraka ehazendu.” Okuyamburura varwe ku wisa onḓengu yawo, nu ku tjita kutja ve ute okurivara otjovandu oviporoporo. Nu tjinenenene, ovanatje ve hakahana okuhihamisiwa i omambo omavi. Kunao matu sokutjevera kutja atu he ve teya nomambo wetu.​—Ovakolose 3:21.

14 Ombeibela i tu rakiza oukukutu ohunga nondjambu. Ondjambu, orondu tji tu kayenda komurungu okuhungira oviṋa ovivi ohunga na varwe nondando yokuvehihamisa. Tjiri otjihihamise okutjinda omukweṋu morukupo poo ovanatje voye momuano mbwo! Omundu ngu ha vanga okuisa okuyamburura varwe, kamaa yandjerwa okukara mombongo rukwao. (1 Ovakorinte 5:11-13; 6:9, 10) Otja tji twa munu, tji twa hungire oviṋa ovivi nu vyouhahu, mbi vi hi nouatjiri, poo mbi hihamisa varwe, matu zunḓa oupanga wetu kuna Jehova na kuna varwe.

OMAMBO OMATUNGE

15. Omambo yeṋe nge kurisa oupanga?

15 Matu yenene vi okuungurisa otjiyandjewa tjokuhungira Jehova tje tu pa, momuano mbwe vanga? Nandarire kutja Ombeibela kai tu raere oukahu kutja ovikeṋa mbi matu sokuhungira nokutja ovikeṋa mbi tu ha sere, oyo i tja ngatu hungire “omambo omawa nomatunge.” (Ovaefese 4:29) Omambo omatunge, owonga omakohoke, nomawa nu nge nouatjiri. Jehova u vanga kutja tu ungurise omambo wetu okutunduuzasana nokuvaterasana. Okutjita nao mape ya aku rire ouzeu. Orondu ku hepa ozongondjero  okuhungira oviṋa oviwa. (Titus 2:8) Ngatu tare komiano tjiva mu matu yenene okutunga varwe nomambo wetu.

16, 17. (a) Ongwaye tji tu sokutanga varwe? (b) Oouṋe mbu matu yenene okutanga?

16 Jehova na Jesus ve tanga varwe. Eṱe wina matu sokuhorera ku wo. (Mateus 3:17; 25:19-23; Johanes 1:47) Tji tu rikendera ku varwe nokuraisa onḓero mu wo, maku tu vatere okuvetanga momuano mbu mau ve tunduuza. Omiano 15:23 mari tja: “Eziriro ndi zirwa moruveze orusemba ri yandja ohange.” Indu omundu warwe tji me tu tanga mena roviungura vyetu oviwa poo oviṋa mbi twa tjita, ku tu tunduuza tjinene.​—Lesa Mateus 7:12; lesa Omakahururiro 27.

17 Tji wa iririra okupaha ouwa mu varwe, ma rire oupupu kove okuvetanga. Otjotjihorera, tji wa munu omundu mombongo ngu rirongerisa nawa komahungi we poo ngu tjita ozongondjero okuyandja omaziriro pozombongarero zombongo, mu tanga. Tji mo tjiwa omutanda ngu raisa ouṱakame ku Jehova ngunda e ri poskole, poo omukurundu ngu kondja okukara norupa motjiungura tjokuzuvarisa aruhe, mu tanga wina. Omambo woye wondangi, mape ya ootjiṋa tji mave hepa. Wina otjiṋa otjinanḓengu tjinene komurumendu okuraera omukazendu we kutja we mu suvera nokutja eye omundu omunahepero tjinene ku ye. (Omiano 31:10, 28) Tjimuna ovimbloma tji vi hepa ondjerera nomeva, ovandu wina ve hepa okuvarwa otjovanahepero. Ovanatje tjinenenene ve hepa okuvarwa otjovandu ovanahepero. Paha omiano vyokuvetanga mena rovikaro vyawo oviwa nozongondjero nḓu ve tjita. Ovanatje tji mave tangwa ve hara ouvanḓe nongamburiro mu wo oveni, nu ihi tji tjita kutja ve kondje nomasa okutjita imbi ovisemba.

Matu yenene okutunduuza nokuhuhumiṋa varwe nomambo wetu, nomuano mbu matu tu hungire

18, 19. Ongwaye tji tu sokukondja nomasa okutunduuza nokuhuhumiṋa varwe? Omomiano viṋe mu matu yenene okutjita nao?

 18 Tji matu tunduuza nokuhuhumiṋa varwe, tu horera ku Jehova. Eye u rikendera tjinene ku “imba mba ningisa ondjenda na imba overisusuparise.” (Jesaja 57:15) Jehova u vanga kutja eṱe tu ‘pandiparisasane’ nokutja tu “yanḓiparise imba vomitima omitarazu.” (1 Ovatesalonika 5:11, 14) Tji matu kondjo okutjita nao, eye u muna, nu u tjaterwa i ozongondjero zetu.

19 Mape ya omunu kutja omundu mombongo wau momuinyo poo u nombameno. Mo yenene okutja vi ku ye tji mape ya atji mu vatere? Otjiperi kutja komoo yenene okuisapo ouzeu we, posi yokutja mo yenene okumuraisira kutja u nakonatja na ye. Otjotjihorera, mo yenene  okutwapo oruveze rwokukemuryangera. Mo yenene okumulesera etjangwa eyanḓiparise poo nandarire okukumba puna ye. (Epsalme 34:18; Mateus 10:29-31) Mu pa ongamburiro yokutja ovakambure ovakwao mombongo ve mu suvera. (1 Ovakorinte 12:12-26; Jakobus 5:14, 15) Nu hungira momuano mbu mau mu raisire kutja oviṋa mbi mo hungire tjiri ouatjiri, nokutja ove u nongamburiro mu imbi mbi mo hungire.​—Lesa Omiano 12:25.

20, 21. Otjikeṋa tji tji tjita kutja ku rire oupupu kovandu okuyakura ondunge okuza ku varwe?

20 Eṱe wina tu tunduuza varwe indu tji matu ve pe ondunge osemba. Mena rokutja kaweṱe ohomonena, tu hepa ondunge okuza ku varwe povikando tjiva. Omiano 19:20 ri tja: “Tji mo puratene komaronga no  yakura omavyuriro, indino eyuva rimwe mo karira onongo.” Kavanene vombongo aveerike mbu mave yenene okuyandja ondunge poo omaronga ku varwe. Ovanene ve sokuhongorera ovanatje vawo. (Ovaefese 6:4) Nu ovakazendu ovakambure ve yenena okupasana ondunge osemba. (Titus 2:3-5) Mena rokutja eṱe twa suvera ovakambure ovakwetu, tu sokukondja okuyandja ondunge momuano mbu u hina okuvehihamisa. Otjikeṋa tji matji tu vatere okutjita nao?

21 Mape ya o zemburuka oruveze omundu tje kupa ondunge osemba momuano mbwa tjita kutja ku rire oupupu kove okuiyakura. Hapo otjikeṋa tji tja tjita kutja u yakure ondunge ndjo? Mape ya wa muna kutja omundu ngo tjiri u rikendera kove, poo ngahino wa hungira kuna ove momuano omuwa nu worusuvero. (Ovakolose 4:6) Nu mape ya kutja ondunge ndje ku pa ya zikamena kOmbeibela. (2 Timoteus 3:16) Kutja matu ungurisa omatjangwa osemba okuza mOmbeibela poo indee, ondunge ngamwa aihe ndji matu yandja mai sokuzikamena kOmatjangwa. Ape ningi omundu ngu ma ṋiṋikiza varwe okuyakura oumune we, poo okuungurisa omatjangwa momuano woposyo otjomuano wokuryamisa oumune we komurungu. Okuzemburuka omuano mu wa pewa ondunge, maku yenene okukuvatera indu tji mo yandja ondunge ku varwe wina.

22. Mo vanga okuungurisa otjiyandjewa tjoye tjokuhungira momuano uṋe?

22 Okuyenena okuhungira, otjiyandjewa okuza ku Mukuru. Orusuvero rwetu ku Mukuru maru sokutuhinga okuungurisa otjiyandjewa hi momuano omusemba. Tjiwa kutja omambo ye nomasa wokutunga poo okuteya omundu. Mena ranao, ngatu kondje okuungurisa omambo wetu okutunduuza nokuyanḓiparisa varwe.