Timoteus wa ri omuzandona ngwa suverere okuvatera ovandu tjinene. Eye aai kotuveze pekepeke okukavatera ovandu. Mena rotjiṋa hi, eye wa ri nehupo ewa tjinene. Mo vanga okurihonga ovingi ohunga na ye po?—

Ina yaTimoteus na ina omunene ve mu honga ohunga na Jehova

Timoteus we kurira motjihuro tjena Listra. Indu tja ri omuṱiṱi, ina omunene Lois na ina Eunike va uta okumuhonga ohunga na Jehova. Otja Timoteus tjee kuru, eye aa vanga okuvatera varwe kutja ve rihonge ohunga na Jehova.

Indu Timoteus tja ri omutanda, Paulus we mu ningira kutja ma yende puna ye ve kazuvarise pamwe kovirongo vyarwe. Timoteus wa tja: ‘Ii, mei puna ove!’ Eye wa ri e rirongere okuyenda kutja ma kavatere ovandu varwe.

 Timoteus wa ya kuna Paulus kotjihuro tji tja ri moMakedonia tjaatji isanewa Tesalonika. Owo aave sokukayenda ondjira onde okuzambo ave karonda mokayaha kutja ve kavaze ngo. Korusenina tji va kavaza ngo, owo va vatera ovandu ovengi okurihonga ohunga na Jehova. Posi yokutja ovandu tjiva va pindikire tjinene nu aave vanga okuvehihamisa. Okutja Paulus na Timoteus aave sokuyenda kwarwe ve kazuvarise ngo.

Timoteus wa ri nehupo ewa nu eṋingandu

Omieze omiṱiṱi kombunda yanao, Paulus wa ningira Timoteus kutja ma yaruke koTesalonika ma katare kutja ovakambure ovakwao ve ri vi. Aape hepa ouvanḓe tjinene ku ye okuyaruka kotjihuro tjovandu ovanautwe ho! Posi yokutja Timoteus wa ya, orondu eye ee rikendere kovakambure ovakwao. Eye wa kotoka ku Paulus nombuze ombwa. Ovakambure ovakwao mba ri moTesalonika va ri nawa tjinene.

Timoteus wa ungura puna Paulus ozombura ozengi. Otjikando tjimwe, Paulus wa tjanga kutja Timoteus ongwa ri omundu omusemba eye ngwaa yenene okuhinda kutja ma kavatere ozombongo. Timoteus wa suverere Jehova novandu.

Ove wa suvera ovandu nu u vanga okuvevatera kutja ve rihonge ohunga na Jehova?— Ndovazu pe ri nao, ove mo kara nehupo ewa nu eṋingandu tjimuna indi oraTimoteus!