Twende kovidio oini

Twende komurya

Ovahongonone vaJehova

Toorora eraka Otjiherero

 EHONGWA 11

Owo va tjanga ohunga na Jesus

Owo va tjanga ohunga na Jesus

Ovarumendu mbe ri motjiperendero mo ve munu?— Owo ooMateus, Markus, Lukas, Johanes, Petrus, Jakobus, Judas na Paulus. Ovarumendu mba va hupire moruveze indu Jesus tja ri kombanda yehi, nu va tjanga ohunga na Jesus. Indjo tu rihonge ovingi ohunga na wo.

Mo tjiwa tjike ohunga novarumendu mba?

Ovarumendu vetatu mu imba mba va ri ovaapostele mbaave zuvarisa puna Jesus. Ove mo tjiwa kutja ooveṋe?— OoMateus, Johanes na Petrus. Omuapostele Mateus  na Johanes aave tjiwa Jesus nawa, nu auhe wawo wa tjanga embo ohunga nehupo raJesus. Omuapostele Johanes wina wa tjanga embo ndi isanewa Omavandururiro notutuu tutatu tu tu isanewa Johanes omutenga, Johanes omutjavari na Johanes omutjatatu. Omuapostele Petrus wa tjanga otutuu tuvari tu tu ri mOmbeibela. Otwo tu isanewa Petrus omutenga na Petrus omutjavari. Morutuu rwe orutjavari, Petrus wa tjanga ohunga noruveze indu Jehova tja hungira okuza keyuru na tja ohunga na Jesus: ‘Ingwi omuatje wandje. Ami mbe mu suvera, nu mbi nonyuṋe mu ye.’

Ovarumendu imba ovarwe motjiperendero wina ve tu honga ohunga na Jesus momambo ngu va tjanga. Umwe wawo oMarkus. Eye ngahino opa ri indu Jesus tja kamburwa nu wa muna oviṋa avihe mbya tjitwa. Omurumendu warwe wa ri Lukas. Eye wa ri onganga nu ngahino wa rira Omukriste kombunda onḓiro yaJesus.

Ovatjange vevari vOmbeibela mbu mo munu motjiperendero va ri ovangu vaJesus. Omana wawo mo ye tjiwa?— Omana wawo ooJakobus na Judas. Kotjirutenga owo kaave kambura mu Jesus. Nu nandarire aave munu kutja wa vera oviyoze. Nungwari kombunda va uta okukambura mu Jesus nu ave rire Ovakriste.

Omutjange wOmbeibela omusenina ngu mo munu motjiperendero oPaulus. Eye ngunda e hiya rira Omukriste ena re ra ri Saulus. Eye wa tondere Ovakriste nu ee ve tumbu navi. Mo tjiwa kutja otjikeṋa tji tja tjita kutja Paulus ma vange okurira Omukriste?— Eyuva rimwe, Paulus wa ri mouyenda nu tjimanga wa zuva omundu ngu me mu hungirisa okuza keyuru. Omundu ngo wa ri Jesus! Eye wa pura Paulus kutja: ‘Ongwaye tji mo tatumisa ovandu mbe kambura mu ami?’ Kombunda yanao, Paulus wa rundurura ongaro ye na rire Omukriste. Paulus wa tjanga omambo wOmbeibela 14, okuza kOvaroma nga kOvaheberi.

Tu lesa Ombeibela eyuva arihe nu, katjiperi?— Tji twa lese Ombeibela, matu rihongo oviṋa ovingi ohunga na Jesus. Ove mo vanga okurihonga ovingi ohunga na Jesus?—

Mo tjiwa tjike ohunga novarumendu mba?