Twende kovidio oini

Twende komurya

Ovahongonone vaJehova

Toorora eraka Otjiherero

 EHONGWA 12

Omusya waPaulus wa raisa ouvanḓe

Omusya waPaulus wa raisa ouvanḓe

Ngatu rihonge ohunga nomuzandona ngwa yama omuinyo wongundwe. Ongundwe yomuzandona ngwi ya ri omuapostele Paulus. Ena romuzandona ngwi kari tamunwa, posi yokutja matu tjiwa kutja eye wa tjita otjiṋa tji tja raisa kutja wa ri ombanḓe. Ove mo vanga okutjiwa kutja otjikeṋa eye tja tjita po?—

Paulus wa ri mondeko moJerusalem. Eye wa kamburwa mena rokutja aa zuvarisa ohunga na Jesus. Ovarumendu tjiva vovikaro ovivi va tondere Paulus, nu otji ve ripura ondunge ombi. Owo va tja: ‘Ngatu raere omuhongore wovita kutja ma raere ovarwe ve okueta Paulus kotjombanguriro. Eṱe matu ṱara meṋe yondjira nu Paulus tji ma kapita mbo, atu mu zepa!’

Omusya waPaulus wa raera Paulus ohunga nondando ombi

Omusya waPaulus wa zuva ohunga nondando yovarumendu mba. Eye nambano ma tjiti vi? Eye wa ya kondeko na karaera Paulus otjiṋa hi. Tjimanga, Paulus we mu raera kutja nga karaere omuhongore wovita ohunga nondando ndji. Mo munu kutja ya ri oupupu komusya waPaulus okukahungira ku nomuhongore po?— Kako, orondu omuhongore wovita wa ri omurumendu omunanḓengu tjinene. Posi yokutja omusya waPaulus wa ri ombanḓe nu wa ya a kahungira ku nomuhongore wovita.

Omuhongore wovita aa tjiwa nawa kutja ma sokutjita vi. Eye wa woronganisa ovarumendu 500 ovarwe vovita kutja ve tjevere Paulus! Eye wa raera ovarumendu mba kutja ve tware Paulus koSesarea ongurova ndjo. Omuinyo waPaulus wa yamwa poo indee?— Ii, ovarumendu mbo kavena pu va yenena okumuzepa! Ondando yawo ombi ndjo kaina pu ya ungura.

Mo rihongere tjike okuza kehungi ndi?— Ove wina mo yenene okurira ombanḓe tjimuna omusya waPaulus. Matu hepa okurira ozombanḓe indu tji matu hungire ku novandu ohunga na Jehova. Ove mo rire ombanḓe nu okayenda komurungu okuhungira ohunga na Jehova poo indee?— Tji wa tjiti nao, mape ya o yama omuinyo womundu.