Twende kovidio oini

Twende komurya

Ovahongonone vaJehova

Toorora eraka Otjiherero

 EHONGWA 10

Jesus aa raisa onḓuviro aruhe

Jesus aa raisa onḓuviro aruhe

Oupupu kove okukara nonḓuviro kovanene voye?— Povikando tjiva ouzeu okukara nonḓuviro. Ove hapo oo tjiwa kutja Jesus wa ri nonḓuviro ku Jehova na kovanene ve?— Otjihorera tje matji ku vatere okukara nonḓuviro kovanene voye nandarire tje ri ouzeu okutjita nao. Indjo tu rihonge ovingi ohunga na ye.

Ngunda Jesus ee hiye ya kombanda yehi, eye wa ri puna Ihe, Jehova, meyuru. Posi yokutja Jesus wina wa ri novanene kombanda yehi. Omana wawo ya ri ooJosef na Maria. Ove mo tjiwa kutja pe ya vi ve rire ovanene ve?—

Jehova wa tanaurira omuinyo waJesus okuza keyuru mezumo raMaria kutja Jesus ma yenene okukwatwa nokuhupa kombanda yehi. Ihi tja ri otjihimise! Jesus we kura mezumo raMaria tjimuna okanatje akehe tji ke kura mezumo raina. Kombunda yomieze ngahino muvyu nao, Jesus otja kwatwa. Imbwi oomuano Maria nomurumendu we Josef, mu va rira ovanene vaJesus kombanda yehi.

Indu Jesus tja ri nozombura 12, eye wa tjita otjiṋa tji tja raisa kutja wa suvera Ihe, Jehova. Otjiṋa hi tja tjitwa indu Jesus neṱunḓu re tji va toorere ouyenda oure okuyenda koJerusalem koPaska. Tji va ri mondjira okuyaruka konganda, Josef na Maria va muna kutja Jesus kepo. Ove mo tjiwa kutja eye wa ri pi?—

Ongwaye Jesus tja ri pondjuwo ondjapuke yaMuhona?

Josef na Maria va hakahana okuyaruka koJerusalem okukapaha Jesus. Owo aave rikende tjinene, orondu kaave yenene okumumuna. Nungwari kombunda yomayuva yetatu, ve kemuvaza pondjuwo ondjapuke yaMuhona! Ove mo tjiwa kutja ongwaye Jesus tja ri mbo?— Omena rokutja poruveze ndwo eye aa yenene okurihonga ohunga na Ihe, Jehova. Eye wa suverere Jehova nu aa vanga okutjiwa kutja ma sokutjita vi kutja ma yorokise omutima we. Nandarire tja rira omunene, Jesus aruhe wa ri nonḓuviro ku Jehova. Jesus wa ri nonḓuviro nandarire indu tja ri ouzeu ku ye okutjita nao nu aape hepa kutja ma mune ouzeu. Jesus wina wa ri nonḓuviro ku Josef na Maria po?— Ii, Ombeibela i tja nao.

Matu rihongere tjike kotjihorera tjaJesus?— Ove mo sokukara nonḓuviro kovanene voye, nandarire indu tje ri ouzeu okutjita nao. Mo tjiti nao poo indee?—