TARA komiti omire mbyo, ozongara ozombwa nozondundu ozonde. Karuveze oruwa ndwi? Tara okawindja tji make ri okuza meke rokazandona. Nu wina tara kozongeyama noukambe mbwa kurama mokuti ngwina. Ove mape ya o vanga okukara mondjuwo namoruveze otja indwi?

Mukuru u vanga kutja ove u kare moparadisa kombanda yehi nga aruhe. Neye ka vanga kutja ove u kare nomitjise nomihihamo ovandu mbi ve muna ndino. Inga omakwizikiro wOmbeibela ku imba mbu mave kakara moparadisa ombe: ‘Mukuru ma kara puna wo. Kaku nokukakara onḓiro poo omaririro poo omuhihamo. Oviṋa ovikuru vya kapita.’

Jesus ma tjiti kutja oviṋa oviwa mbi vi tjitwe. Ove mo tjiwa kutja mavi katjitwa ruṋe? Ii, kombunda yaindu tja zu nokukohorora ehi kouvi auhe novandu ovarunde. Zemburuka, indu Jesus tja ri kombanda yehi eye wa verukisa ovavere komitjise avihe, neye nandarire wa pendura ovaṱi. Ovikumise mbi Jesus we vi tjitira okuraisa imbi mbi ma katjita kombanda yehi arihe indu tji ma karira Ombara youhona waMukuru.

Ripura uriri kutja oparadisa ombe kombanda yehi ma rire oruveze oruwa pu pe ṱeki pi! Jesus, puna tjiva vaimba eye mbu ma toorora, mave kahonapara meyuru. Ovahonapare mba mave kaṱakamisa ovandu avehe kombanda yehi nu mave katjita kutja ve kare nenyando. Indjeye tu tare kutja matu sokutjita vi kokutja Mukuru me tu pe omuinyo waaruhe moparadisa ye ombe.

Omavandururiro 21:3, 4; 5:9, 10; 14:1-3.

Otjiperendero tjoparadisa


Omapuriro

  • Ombeibela i raisa kutja matu kavyarera ozongaro nḓa sana pi mOparadisa kombanda yehi?
  • Ombeibela mai hunganeke tjike ku imba mbu mave katura mOparadisa?
  • Oruṋe Jesus tji ma tjiti kutja oviṋa oviwa mbi vi yenenisiwe?
  • Indu Jesus tja ri kombanda yehi, ovikwaye mbya tjita mbi vi raisa imbi mbi ma katjita indu tji ma rire Ombara yOuhona waMukuru?
  • Ovikwaye Jesus novahonapare va puna ye vomeyuru mbi mave katjita indu tji mave kahonaparera ehi okuza meyuru?

Omapuriro omaweziwa

  • Lesa Omavandururiro 5:9, 10.

    Omena ratjike tji matu yenene okukara nongamburiro kutja imba mbu mave kahonapara mozombura indo eyovi mave karira ovapristeri nozombara zotjari novanandjenda? (Ef. 4:20-24; 1 Petr. 1:7; 3:8; 5: 6-10)

  • Lesa Omavandururiro 14:1-3.

    Epu indi rokutja ena raIhe nena rOndjona ra tjangwa kovipara vyaimba 144 000, ri heya tjike? (1 Kor. 3:23; 2 Tim. 2:19; Omavan. 3:12)