Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 114: Omaandero wouvi auhe

Ehungi 114: Omaandero wouvi auhe

OVE mo munu tjike mba? Ii, otjimbumba tjovita koukambe ouvapa. Nungwari tara koṋa ku mave zu. Oukambe mau tupuka okuza keyuru movikamba! Meyuru tjiri ku noukambe?

Jesus otjOmbara meyuru

Kako, imbwi kaukambe wakatjiri. Ihi matu tji tjiwa orondu oukambe kau yenene okutupuka kombanda yovikamba, poo mapeya? Nungwari Ombeibela i hungira ohunga noukambe meyuru. Ove mo tjiwa kutja omena ratjike?

Omena rokutja rukuru oukambe aau ungurisiwa tjinene mokurwa ovita. Okutja Ombeibela i hungira ohunga novandu mba kavire oukambe okuza keyuru okuraisa kutja Mukuru ma karwisa ovandu kombanda yehi. Ove mo tjiwa kutja oruveze rovita mbi ru isanewa vi? Orwo ru isanewa Armagedon. Imbi ovita vyokuyandeka omauvi aehe kombanda yehi.

Jesus ongu ma hongorere po mokurwa ovita mbi poArmagedon. Zemburuka kutja Jesus ongwa toororwa i Jehova okurira ombara yohoromende Ye. Okutja Jesus opa zu okuhwikika ekori rouhona. Nu engaruvyo mari urike kutja eye ma zepa ovanavita avehe vaMukuru. Matu sokutemwa kutja Mukuru ma yandeke ovandu avehe ovarunde?

Yaruka ombunda kEhungi 10. Mo munu tjike imbo? Ii, Omupupo omunene mbwa yandeka ovandu avehe ovarunde. Owaṋi ngwa eta Omupupo mbo? OJehova Mukuru. Nambano tara kEhungi 15. Mape kayenda tjike mbo? Sodom na Gomora mavi yandekwa i omuriro Jehova mbwa hinda.

Twende kEhungi 33. Tara ku imbi mbi mavi tjitwa koukambe nomatemba wovita wOvaengipte. Owaṋi ngwa tjita kutja omeva ye randatere kombanda yawo? OJehova. Eye we tji tjitira okuyama otjiwaṋa tje. Tara kEhungi 76. Imbo mo munu kutja Jehova nandarire ma yandjere otjiwaṋa tje, Ovaisrael, ve yandekwe mena rouvi wawo.

Okutja nambano atu temwa Jehova tji ma tumu ovimbumba vye vyeyuru okuyandeka omauvi aehe kombanda yehi. Nambano ripura uriri kutja ihi matji heye tjike! Twende komukuma outjakwao tu tare.

Omavandururiro 16:16; 19:11-16.



Omapuriro

  • Omena ratjike Ombeibela tji i hungira ohunga noukambe meyuru?
  • Ena rovita vyaMukuru kuna ovarunde kombanda yehi ri isanewa vi, nu ondando yovita mbi oyatjike?
  • Tji wa tara motjiperendero, owaṋi ngu ma hongorere po ovita, nu omena ratjike eye tja zara ekori rouhona, nengaruvyo re mari heye tjike?
  • Tji twa yaruka ombunda kEhungi 10 na 15 na 33, omena ratjike ihi tji tji ha sere okurira otjikumise kweṱe kutja Mukuru ma kayandeka ovandu ovarunde?
  • Ehungi 36 nEhungi 76 maye raisa vi kutja Mukuru ma yandeke ovandu ovavi nandarire kutja owo ve ritja ve rikotamena ku ye?

Omapuriro omaweziwa

  • Lesa Omavandururiro 19:11-16.

    Omatjangwa maye raisa vi oukahu kutja Jesus Kristus ongu ri omukavire ngu ri kokakambe okavapa? (Omavan. 1:5; 3:14; 19:11; Jes. 11:4)

    Ombinḓu ndja rimbarerwe kombanda yaJesus mai ṋunisa vi epu rokutja ondoṋeno ye ya tyewa kaparukaze? (Omavan. 14:18-20; 19:13)

    Oowaṋi mbu mape ya ave kara mokati kaimba mbe ri motjimbumba tji matji kongorere Jesus kokakambe ke okavapa? (Omavan. 12:7; 19:14; Mat. 25: 31, 32)