TARA komuengeli ngo ngwa yezurura omuvero wondeko. Ovarumendu eye mbu ma kutura ovaapostele vaJesus. Indjeye tu konḓonone kutja otjikwaye tji tja tjita kutja ve tuwe mondeko.

Omuengeli makutura ovaapostele

Okaruveze okasupi uriri ombepo ondjapuke tji ya za nokutirirwa kovahongewa vaJesus, Petrus na Johanes va ya omutenya umwe kondembeli mu Jerusalem. Ingo, popezu nomuvero, pa ri omurumendu ngwa remanene oure womuinyo we. Ovandu eyuva arihe aave mu eta ngwi kutja me yekuningira ovimariva ku imba mbu mbaave ya kondembeli. Indu eye tja muna Petrus na Johanes, eye we riheka ku wo kutja ve mu pe otjiṋa. Ovaapostele va tjita tjike?

Owo va kurama nave tara komurumendu. Petrus arire tja tja: ‘Ovimariva hi na vyo nungwari me ku pe otjiṋa tji mbi natjo. Mena raJesus, sekama u kawondje!’ Okuzambo Petrus wa kambura omurumendu kokuwoko okunene, nu tjimanga eye wa tuka peyuru na utu okukayenda. Ovandu tji va muna otjiṋa hi, owo va temenwe nu va ri nenyando ohunga notjikumise otjiwa hi.

Petrus arire tja tja: ‘Otjikumise hi eṱe twe tji tjiti nomasa waMukuru, ngwa pendura Jesus movakoke.’ Ngunda eye na Johanes amave hungire, ovanane vozongamburiro ve ya mbo. Owo va pindika mena rokutja Petrus na Johanes aave raere ovandu ohunga na Jesus ngwa pendurwa movakoke. Okutja owo arire tji ve ve kambura nave ve twa mondeko.

Meyuva ekongorerwa ovanane vozongamburiro va ri nombongarero onene. Owo va isanisa Petrus na Johanes na wina omurumendu owo ngu va verukisa. Ovanane vozongamburiro va pura nave tja: ‘Otjiṋa hi mwe tji tjiti nomasa watjike?’

Petrus we ve raera kutja ve tji tjiti nomasa waMukuru, ngwa pendura Jesus movakoke. Ovapristeri kaave tjiwa kutja ngave tjite vi, mena rokutja owo kaave yenene okupataṋa kutja otjikumise otjiwa hi tjiri tja tjitwa. Okutja owo va rakiza ovaapostele kutja ave ha hungire rukwao ohunga na Jesus, nu okuzambo ave ve esa ve yende.

Otja omayuva tjaaye kayenda ovaapostele va kayenda komurungu okuzuvarisa ohunga na Jesus nokuverukisa ovavere. Ombuze ohunga novikumise mbi ya handjauka. Okutja nandarire ovimbumba vyovandu okuza kovihuro ongondoroka na Jerusalem va eta ovavere kovaapostele okuverukisa. Ihi tja tjita kutja ovanane vozongamburiro ve ṱe eruru, okutja owo va kambura ovaapostele nave ve twa mondeko. Nowo kave na puva kara mo oruveze orure.

Mokati kouuku omuengeli waMukuru wa paturura omuvero wondeko, otja tji mo munu mba. Omuengeli arire tja tja: ‘Twendeye nu kakurameye mondembeli, nu mu kayende komurungu okuhungira ku novandu.’ Mependukirwa raindo, ovanane vozongamburiro tji va hinda ovarumendu kondeko okukaeta ovaapostele, owo kave vazere mo omundu. Kombunda ovarumendu ve kevevaza amave hongo mondembeli nave ve eta ketuwo rOtjira tjOvajuda.

Ovanane vozongamburiro arire tji va tja ku wo: ‘Eṱe twe mu rakiza oukukutu kutja amu ha hongo mena ra Jesus rukwao. Nungwari eṋe mwe urisa Jerusalem nomahongero weṋu.’ Ovaapostele va zira nave tja: ‘Eṱe matu sokukara nonḓuviro ku Mukuru komeho wokukara nonḓuviro kovandu.’ Okutja owo va kayenda komurungu okuhonga “ombuze ombwa.” Ihi katjihorera otjiwa nao kweṱe okukongorera?

Oviungura ekondwa 3 ngandu kekondwa 5.



Omapuriro

  • Petrus na Johanes va tjitwa tjike omutenya umwe owo tjaave hiti mondembeli?
  • Petrus wa tja tjike komurumendu ngwa remanene, nu we mu pa tjike tji tja ri nonḓengu kombanda yovimariva?
  • Omena ratjike ovanane vozongamburiro tji va pindikire, nowo va tjita tjike ku Petrus na Johanes?
  • Petrus wa tja tjike kovanane vozongamburiro, nu ovanane vozongamburiro ve ve rakiza kutja ave ha tjiti tjike?
  • Omena ratjike ovanane vozongamburiro tjaave ṱeruru, nungwari pa tjitwa tjike indu ovaapostele tji va tuwa mondeko otjikando otjitjavari?
  • Ovaapostele va zira kutja vi indu tji va etwa ketuwo rOtjira tjOvajuda?

Omapuriro omaweziwa

  • Lesa Oviungura 3:1-10.

    Nandarire kutja eṱe ndino katu ya pewa omasa wokutjita ovikumise, omambo waPetrus mOviungura 3:6 maye tu vatere vi okumuna ounanḓengu wombuze yOuhona? (Joh.17:3; 2 Kor. 5:18-20; Fil.3:8)

  • Lesa Oviungura 4:1-31.

    Indu tji matu munu omapirukiro moviungura vyokuzuvarisa, omomuano uṋe mu matu sokuhorera Ovakriste ovakwetu veserewondo etenga? (Oviung. 4:29, 31; Ef. 6:18-20; 1 Tes. 2:2)

  • Lesa Oviungura 5:17-42.

    Ovandu tjiva mbe he ri Ovahongonone, voruveze orukuru navoruveze rwetu, va raisa vi oumune ouwa ohunga noviungura vyokuzuvarisa? (Oviung. 5: 34-39)