Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 105: Ovahongewa vaJesus mave undjire mu Jerusalem

Ehungi 105: Ovahongewa vaJesus mave undjire mu Jerusalem

OVANDU mbe ri mba ovahongewa vaJesus. Owo va puratena ku ye nave kara mu Jerusalem. Nowo ngunda amave undju pamwe, mondjuwo aihe arire tji mwe ura orurokoho orunene. Orwo aaru pose otja ombepo onamasa ndjaai hingi. Okuzambo omaraka womuriro ya uta okumunika kombanda yoviuru vyaauhe wovahongewa. Ove mo munu omuriro kombanda yaauhe wawo? Ihi matji heye tjike?

Ombepo ondjapuke kovahongewa veserewondo etenga

Otjo otjikumise! Jesus wa yaruka keyuru ku Ihe, neye wa tirira ombepo ondjapuke yaMukuru kombanda yovahongewa ve. Ove mo tjiwa kutja ombepo ndji ya tjita kutja ve tjite tjike? Owo avehe va uta okuhungira momaraka pekepeke.

Ovandu ovengi mu Jerusalem va zuva orurokoho ndwaa rupose otja otjivepo otjinamasa, nowo ve ya okutara imbi mbyaavi tjitwa. Ovandu tjiva va za koviwaṋa vyarwe mbi vye ya komukandi waIsrael waPentekoste. Ovayenda mba tjiri va temenwe tjinene indu tjaave zuu ovahongewa amave hungire momaraka wawo oveni ohunga noviṋa oviwa Mukuru mbya tjita!

Ovayenda arire tji va tja: ‘Ovandu mba avehe va za koGalilea. Nu hapo pe ya vi, owo ve hungire momaraka pekepeke inga nge hungirwa komahi eṱe ku twa za?’

Okutja Petrus arire tja sekama okuvekahururira. Neraka enene eye wa raera ovandu omuano Jesus mbwa zepewa nokutja Jehova we mu pendura movakoke. Okuzambo Petrus arire tja tja: ‘Nambano Jesus u ri meyuru kokunene kwaMukuru. Neye we tu tiririre ombepo ondjapuke otja pa kwizika. Okutja eṋe opu mwa zokumuna nokuzuva ovikumise mbi.’

Okutja, indu Petrus tjaa hungire oviṋa mbi, ovandu ovengi va hihamwa omitima ohunga noviṋa mbya tjitwa ku Jesus. Owo va pura nave tja: ‘Ngatu tjite vi?’ Petrus arire tja tja ku wo: ‘Rivingurureye omitima nu mu papitisiwe.’ Okutja meyuva otjingero ndo ovandu ape 3 000 va papitisiwa nave rire ovakongorere vaJesus.

Oviungura 2:1-47.



Omapuriro

  • Otja otjiperendero tji matji raisa, pa tjitwa tjike kovahongewa vaJesus mbaave undjire mu Jerusalem?
  • Otjikeṋa tji tja kumisa ovaryange mbe ere koJerusalem?
  • Ovikwaye Petrus mbya kahururira ovandu?
  • Indu ovandu tji vaza nokupuratena ku Petrus, omambo we ye ve ṱuna vi, neye we ve raera kutja ngave tjite vi?
  • Ovandu vengapi mba papitisiwa meyuva ndo raPentekoste, 33 O.Z?

Omapuriro omaweziwa

  • Lesa Oviungura 2:1-47.

    Omambo waPetrus nge ri mOviungura 2:23, 36 maye raisa vi kutja otjiwaṋa atjihe tjOvajuda tja ri nondjo momazepero waJesus? (1 Tes. 2:14, 15)

    Petrus wa raisa vi otjihorera otjiwa tjokuzira okuza mOmatjangwa? (Oviung. 2:16, 17, 29, 31, 36, 39; Kol. 4:6)

    Omomuano uṋe omutenga Petrus mbwa ungurisa ‘ovipaturure vyouhona womayuru,’ imbi Jesus mbya kwizika kutja me mu pe? (Oviung. 2:14, 22-24, 37, 38; Mat. 16:19, EEP)