Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 104: Jesus ma yaruka keyuru

Ehungi 104: Jesus ma yaruka keyuru

OTJA omayuva tjaaye kapita, Jesus we rimunikisa kovahongewa ve povikando ovingi. Otjikando tjimwe ovahongewa ve ape 500 ve mu muna. Ove mo tjiwa kutja Jesus wa hungira ohunga na tjike kuna wo indu tje rimunikisa ku wo? Eye wa hungira ohunga nouhona waMukuru. Jehova wa hinda Jesus kombanda yehi kutja me yekuhonga ovandu ohunga nOuhona. Neye wa kayenda komurungu okutjita nao nandarire kombunda yaindu eye tja za nokupendurwa movakoke.

Jesus ma yaruka keyuru

Ove mo zemburuka kutja ouhona waMukuru otjikeṋa? Ouhona owo ohoromende yakatjiri yaMukuru ndji ri meyuru, nu Jesus ongwa toororwa i Mukuru okurira ombara. Otja tji twe rihonga, Jesus tja ri kombanda yehi we tu raisira kutja eye ma karira ombara ombwa orondu eye wa hira ovanandjara, a verukisa ovavere, na wina a pendura ovaṱi komuinyo!

Ehi mari kara vi indu Jesus tji ma kahonapara otjombara meyuru oure wozombura eyovi? Ehi arihe mari ririsiwa oparadisa ombwa. Kaku nokukara ovita, poo ovitjitwa vyoutwe, poo omitjise, poo nandarire onḓiro. Eṱe matu tjiwa kutja ihi ouatjiri mena rokutja Mukuru wa ungura ehi kutja ri rire oparadisa ovandu mu mave kara nonyuṋe okuhupa mo. Mena ranao eye opa zokuungura otjikunino tjaEden kombutiro. Nu Jesus ma tjiti kutja avihe Mukuru mbi ma vanga kutja vi tjitwe, vi yenenisiwe.

Okutja oruveze arire tji rwa yenena ku Jesus okuyaruka keyuru. Oure womayuva 40 Jesus ee rimunikisa kovahongewa ve. Okutja owo va ri nongamburiro kutja eye tjiri u nomuinyo. Nungwari eye ngunda ee hiya zapo povahongewa ve eye we ve raera na tja: ‘Kareye mu Jerusalem nga tji mwa munu ombepo ondjapuke.’ Ombepo ondjapuke oyo omasa waMukuru omaungure, tjimuna ombepo ndji hinga, ndji mai vatere ovahongewa ve okutjita ombango yaMukuru. Korusenina, Jesus arire tja tja: ‘Eṋe mamu sokuzuvarisa ohunga na ami motupa atuhe twehi.’

Jesus tja za nokuhungira nai, pa tjitwa otjiṋa otjihimise. Eye wa uta okuronda okuyenda keyuru, otja tji mo munu imba. Okuzambo otjikamba tje mu horeka kutja a ha munika, nu ovahongewa kaave yenene okumuna Jesus rukwao. Jesus wa ya keyuru, neye wa uta okuhonaparera ovahongewa ve mbe ri kombanda yehi okuza ngo.

Ovahongewa mave tara meyuru

1 Ovakorinte 15:3-8; Omavandururiro 21:3, 4; Oviungura 1:1-11.



Omapuriro

  • Ovahongewa vengapi mba muna Jesus potjikando tjimwe, neye wa hungira tjike kuna wo?
  • Ouhona waMukuru otjikeṋa, nu ongaro yehupo kombanda yehi mai sana pi indu Jesus tji ma kahonapara otja Ombara oure wozombura eyovi?
  • Jesus we rimunikisa oure womayuva yengapi kovahongewa ve, nungwari okuzambo ya ri oruveze ku ye okuungura tjike?
  • Jesus wa raera kovahongewa ve kutja ngave tjite tjike, komurungu wokuzapo pu wo?
  • Motjiperendero hi mape tjitwa tjike, nu Jesus wa horekwa vi kutja a ha munika kovahongewa ve?

Omapuriro omaweziwa

  • Lesa 1 Ovakorinte 15:3-8.

    Omena ratjike omuapostele Paulus tjaa hungire ohunga nombendukiro yaJesus nouatjiri mbu ṱa mbo, nu ohunga noviṋa viṋe Ovakriste ndino mu mave yenene okuhungira nouatjiri? (1 Kor. 15:4, 7, 8; Jes. 2:2, 3; Mat. 24:14; 2 Tim. 3:1-5)

  • Lesa Oviungura 1:1-11

    Oviungura vyokuzuvarisa vya handjaukire pupe ṱa pi, otja tji pa hunganekwa mOviungura 1:8? (Oviung. 6:7; 9:31; 11:19-21; Kol. 1:23)