INDJEYE tu yaruke ozombura ozonḓiṱi kombunda, ngunda Esra ee hi ya ya ku Jerusalem. Mordekai na Ester va ri Ovaisrael ovananḓengu tjinene mouhona waPersie. Ester wa ri ombara oserekaze nu omuramwe Mordekai wa ri omurumendu omunanḓengu omutjavari kombara. Indjeye tu tare kutja pe ya vi?

Ovanene vaEster va ṱa ngunda eye e ri omuṱiṱi, okutja Mordekai ongwe mu kurisa. Ahasveros ngu tjiukwa otja Kerkes, ombara yaPersie, wa ri nondjuwo youhona motjihuro tjaSusa, nu Mordekai wa ri umwe wovakarere ve. Okutja eyuva rimwe omukazendu wombara, Vasti, ka ri nonḓuviro ku ye, okutja ombara ye ritoororera omukazendu warwe okurira oserekaze ye. Omukazendu eye ngwa toorora ove mo mu tjiwa? Ii, eye omusukona omuwa Ester.

Haman wa pindikire Mordekai

Omurumendu omuritongamise ngwi ovandu ku mave ripetere ove mo mu munu? Eye oHaman. Eye wa ri omurumendu omunanḓengu tjinene mu Persie. Haman aa vanga kutja Mordekai ove ngu mo mu munu a haama mba me ripetere ku ye wina. Nungwari Mordekai wa panḓa. Eye kaa munu kutja otjiṋa otjiwa okuraisa ondengero komurumendu omurunde otja ingo. Ihi tja pindikisa Haman tjinene. Okutja eye wa tjita nai.

Haman wa hungira ovizeze kombara ohunga nOvaisrael na tja: ‘Owo ovandu ovavi mbe ha puratene komatwako woye. Owo mave sokuzepewa.’ Kerkes kaa tjiwa kutja omukazendu we Ester Omuisrael. Okutja eye wapuratena ku Haman, neye wa tjita kutja pe zikamisiwe etwako rokutja meyuva rorive Ovaisrael avehe mave sokuzepewa.

Indu Mordekai tja zuva ohunga netwako ndi, eye wa pindikire tjinene. Eye wa hinda ombuze ku Ester ndji mai tja: ‘Ove raera kombara, nu riheka ku ye kutja me tu yame.’ Otjo tja ri pendje yomatwako mu Persie okuyenda kombara indu tji u ha ṋangerwe. Nungwari Ester wa ya kombara eye ngunda ee hi ya ṋangwa. Ombara ye mu urika nokati kayo kongoldo, tji matji heye kutja eye ke nakuzepewa. Ester wa ṋanga ombara na Haman keriro enene. Imbo ombara ya pura Ester kutja ombatero yatjike eye ndji ma vanga ku ye. Ester wa raera ombara kutja eye me muraere indu eye na Haman tji ve ya keriro rarwe eyuva oritjakwao.

Periro ndo Ester wa raera kombara na tja: ‘Ami novandu vandje matu zepwa.’ Ombara ya pindika nai pura: ‘Owaṋi ngu mape ya a tjiti otjiṋa otjivi otja iho?’

Ester we mu zira na tja: ‘Omurumendu omurunde nomunavita ngwi, oHaman!’

Ombara oserekaze Ester ma horora Haman[LT1]

Okutja ombara tjiri ya pindika. Eye wa rakiza kutja Haman ma zepewe. Kombunda yanao, ombara ya twa Mordekai ma rire omutjavari mouvara okuza ku ye omuini. Okutja Mordekai wa tjita kutja pe zikamisiwe etwako ndi mari yandjere Ovaisrael okurwira omiinyo vyawo meyuva ndi mave sokuzepewa. Mena rokutja Mordekai wa rira omurumendu omunanḓengu, ovandu ovengi va vatera Ovaisrael, nowo va yamwa kovanavita vawo.

Embo rOmbeibela raEster.



Omapuriro

  • Mordekai na Ester oowaṋi?
  • Omena ratjike ombara Ahasveros (Kerkes) tjaai vanga omukazendu omupe, nu oyo ya toorora uṋe?
  • Haman wa ri omungendu, nu otjikwaye tji tje mu pindikisa?
  • Etwako riṋe nda zikamisiwa, nu Ester wa tjita tjike tja za nokumuna ombuze okuza ku Mordekai?
  • Haman wa tjitwa tjike, nu Mordekai wa tjitwa vi?
  • Ovaisrael va yamwa vi kovanavita nawo?

Omapuriro omaweziwa

  • Lesa Ester 2:12-18.

    Ester wa raisa vi ounanḓengu wokukara “nombepo ondarazu ndja pora”? (Ester 2:15; 1 Petr.3:1-5)

  • Lesa Ester 4:1-17.

    Otja Ester tja pewa oruveze rokukuramena po ongamburiro youatjiri, oruveze ruṋe ndino eṱe ndu twa pewa okuraisa omeriyandjero nouṱakame wetu ku Jehova? (Ester 4:13,14; Mat. 5:14-16; 24:14)

  • Lesa Ester 7:1-6.

    Otjingi tjovandu vaJehova ndino va twa vi omiinyo vyawo moumba mena rokukongorerwa, otja Ester tja tjita? (Ester 7:4; Mat. 10:16-22; 1 Petr. 2:12)