Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 81: Omeriyamekero kombatero yaMukuru

Ehungi 81: Omeriyamekero kombatero yaMukuru

OMAYOVI omengi wOvaisrael va toora ouyenda oure okuza ku Babilon okuyenda ku Jerusalem. Nungwari owo tji va vaza mu Jerusalem, otjo tja ri atja nyonwa tjinene. Kape nomundu ngwa turire mu tjo. Ovaisrael aave sokutungurura oviṋa avihe koupe rukwao.

Otjiṋa otjitenga tji va tunga tja ri otjipunguhiro. Otjipunguhiro oruveze pu pe punguhirwa ovinamuinyo poo oviyandjewa ku Jehova. Omieze oviṱiṱi kombunda yanao Ovaisrael va uta okutungurura ondembeli. Nungwari ovanavita nawo mba turire momahi wopopezu nawo, kaave vanga kutja Ovaisrael ve tunge ondembeli. Okutja owo va kondjisa okuvetirisa kutja ve ise okutunga. Korusenina, ovanavita nawo mba va toṋa okupopa ombara ombe yaPersi kutja i zikamise etwako rokuyandisa oviungura vyawo vyokutunga.

Pa kapita ozombura 17 okuza ku indu Ovaisrael tji va kotoka okuza ku Babilon. Jehova wa hinda ovaprofete ve Hagai na Sakarja okukaraera ovandu kutja ve ute okutunga rukwao. Ovandu va ri nongamburiro mu Mukuru nowo va puratena kovaprofete. Owo va uta okutunga rukwao nandarire kutja etwako ra tja ave tungu ko.

Okutja omuhongore omunene waPersi wena Tatenai wa ya kOvaisrael na pura kutja ousemba wokutunga ondembeli va isa pi. Ovaisrael ve mu raera kutja indu tji va ri mu Babilon, ombara Kirus ye ve raera kutja: ‘Twendeye nambano ku Jerusalem nu katungeye ondembeli yaJehova Mukuru weṋu.’

Tatenai wa tuma orutuu ku Babilon na pura kutja Kirus, ngwa ri a ṱa oruveze ndo, tjiri otja heya. Tjimanga orutuu rwa kotoka okuza kombara ombe yaPersi. Oro rwa hungira kutja Kirus tjiri otja heya. Okutja ombara ya tjanga nu ai tja: ‘Veseye Ovaisrael ve tunge ondembeli yaMukuru wawo. Nu ami me mu rakiza kutja ve vatereye.’ Ondembeli ya manuka mozombura ape ine, nu Ovaisrael va ri nenyando tjinene.

Pa kapita ozombura ozengi, ngambeno 48 okuza kondembeli tji ya manuka okutungururwa. Ovandu mu Jerusalem va ri ovasyona, nuotjihuro nondembeli kaavi munika nawa. Mu Babilon, Omuisrael wena Esra wa zuva ohunga nounahepero wokuṱuna ondembeli. Ove mo tjiwa kutja eye wa tjita tjike?

Esra wa ya ku Artakerkes, ombara yaPersi, nu ombara ombwa ndji ya yandja oviyandjewa ovingi ku Esra kutja ma twaerere ku Jerusalem. Esra wa ningira Ovaisrael mba ri mu Babilon kutja ve mu vatere okutwara oviyandjewa mbi ku Jerusalem. Ovandu ape 6 000 va itavera kutja mave i. Owo va ri novisilveri novingoldo ovingi noviṋa vyarwe ovihuze okutwaerera.

Esra ee rikende mena rokutja mwa ri novandu ovavi mondjira. Ovarumendu mba mape ya ave kambura ovisilveri novingoldo vyawo nave ve zepa. Okutja Esra wa woronganisa ovandu pamwe, otja tji mo munu motjiperendero. Okuzambo va kumba ku Jehova kutja me ve tjevere mouyenda wawo oure okuyaruka ku Jerusalem.

Esra novandu mave kumbu

Jehova we ve vatera. Nu kombunda yomieze viṋe vyouyenda wawo, owo va vaza nokuhi notjipo mu Jerusalem. Ihi matji raisa kutja Jehova u ṱakamisa imba mbe riyameka ku ye, katjiperi?

Esra ekondwa 2 ngandu 8.



Omapuriro

  • Ovandu vengapi mba toora ouyenda oure okuza ku Babilon okuyenda ku Jerusalem, nungwari owo va kamuna tjike indu tji va kavaza?
  • Ovaisrael tji va vaza va uta okutunga tjike, nu ovanavita nawo va tjita tjike?
  • Hagai na Sakarja va ri ovangendu, nowo va raera tjike kovandu?
  • Omena ratjike Tatenai tja tuma orutuu ku Babilon, neye wa pewa eziriro riṋe?
  • Indu Esra tja zuva ohunga nounahepero wokuṱuna ondembeli, eye wa tjita vi?
  • Otja tji matu munu motjiperendero mba, Esra ma kumbire tjike nu ongumbiro ndjo ya zirwa vi, nu ihi matji tu hongo tjike?

Omapuriro omaweziwa

  • Lesa Esra 3:1-13.

    Indu tji twa i kotuveze ku ku hina ombongo yovandu vaMukuru, matu sokukayenda komurungu okutjita tjike? (Esra 3:3, 6; Oviung. 17:16, 17; Hebr. 13:15)

  • Lesa Esra 4:1-7.

    Otjihorera tjiṋe Serubabel tja twa po kovandu vaJehova ohunga nokurikuta kuna ozongamburiro zarwe? (Eks. 34:12; 1 Kor. 15:33; 2 Kor. 6:14-17)

  • Lesa Esra 5:1-5, 17 nekondwa 6:1-22.

    Omena ratjike ovapirukire tji ve hina va ṱona okuyandisa oviungura vyokutunga ondembeli? (Esra 5:5; Jes. 54:17)

    Omikambo mbya toorwa i ovarumendu ovanene vOvajuda mavi tunduza vi ovanene vombongo okupaha ombatero yaJehova indu tji mave munu omapirukiro? (Esra 6:14; Eps. 32:8; Rom. 8:31; Jak. 1:5)

  • Lesa Esra 8:21-23, 28-36.

    Otjihorera tjiṋe tjaEsra tji matji rire otjiṋa otjiwa kweṱe okuhorera indu eṱe tji matu ripurire kokutoora omukambo ohunga notjiṋa kangamwa atjihe? (Esra 8:23; Eps. 127:1; Omiano 10:22; Jak. 4:13-15)