Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 79: Daniel motjitoto tjozongeyama

Ehungi 79: Daniel motjitoto tjozongeyama

OWEE! Mape munika tjimuna Daniel u ri moumba ounene. Nungwari ozongeyama kaze nokumutjita otjipo! Ove mo tjiwa kutja omena ratjike? Owaṋi ngwa twa Daniel pu nozongeyama azehe nḓa? Indjeye tu konḓonone.

Ombara yaBabilon nambano omurumendu wena Darius. Eye wa suverere Daniel tjinene mena rokutja wa ri omundu omuwa nu onongo. Darius wa toorora Daniel kutja ma rire omunane omunene mouhona we. Ihi tja tjita kutja ovarumendu varwe mouhona ve tire Daniel eruru. Indjo tu tare kutja va tjita tjike.

Darius

Owo va ya ku Darius nave tja: ‘Eṱe twa zuvasana, muhona ombara, kutja ove mo sokuzikamisa etwako rokutja oure womayuva 30 kape nokuyandjerwa omundu okukumba ku mukuru warwe poo komundu kangamwa warwe pendje na ove, muhona ombara. Auhe ngu ma teya omarakiza nga ma sokuyumbwa motjitoto tji tje ura nozongeyama.’ Darius kaa tjiwa kutja omena ratjike ovarumendu mba tjaave vanga etwako ndi ri zikamisiwe. Nungwari eyewa muna kutja ondunge ombwa, okutja eye otja tjangisa etwako ndi. Okutja etwako ndo kaari yenene okurundururwa.

Indu Daniel tja zuva ohunga netwako ndi, eye wa ya konganda na kakumba tjimuna tjaa tjiti aruhe. Ovarumendu ovarunde mbo aave tjiwa kutja Daniel kamaa isa okukumba ku Jehova. Owo va ri nenyando mena rokutja aape munika tjimuna ondando yawo yokuisapo Daniel mai ungura.

Indu ombara Darius tja tjiwa kutja omena ratjike ovarumendu mba tji va vanga etwako ndi ri zikamisiwe, eye wa ri noruhoze tjinene. Nungwari eye kaa yenene okurundurura etwako ndi, okutja eye aa sokuyandja erakiza rokutja Daniel ma yumbwe motjitoto tjozongeyama. Nombara ya tja nai ku Daniel: ‘Ami me zeri kutja Mukuru woye ngu u karera, me ku yama.’

Darius wa kurungisirwe tjinene ngandu tje hina wa rara ouṱuku mbo. Menyunguhuka ombara ya tupuka kotjitoto tjozongeyama. Ove mo mu munu mbena. Eye wa ravaera na tja: ‘Daniel mukarere waMukuru omunamuinyo! Mukuru ove ngu u karera wa yenene okukuyama kozongeyama are?’

Daniel motjitoto tjozongeyama

Daniel we mu zira na tja: ‘Mukuru wa hindi omuengeli we neya okupata ovinyo vyozongeyama kutja aze he ndji tjiti otjipo.’

Ombara ya yoroka tjinene. Nu ai rakiza kutja Daniel ma pitisiwe motjitoto tjozongeyama. Okuzambo eye wa rakiza kutja ovarumendu ovarunde mba vanga okuzepaisisa Daniel ve yumbwe motjitoto tjozongeyama. Owo ngunda ave hiya punda motjitoto, ozongeyama ze ve hakana naze teya omatupa wawo ayehe.

Okutja ombara Darius ya tjanga orutuu kovandu avehe mouhona wayo nai tja: ‘Ami me rakiza kutja omundu auhe ma sokuyozika Mukuru wa Daniel. Eye u tjita ovihimise ovinene. Eye wa yama Daniel kutja a ha tu i ozongeyama.’

Daniel 6:1-28.



Omapuriro

  • Darius wa ri omungendu, neye wa ri noumune uṋe ohunga na Daniel?
  • Ovarumendu tjiva mba ri neruru na Daniel va tjita kutja Darius ma tjite tjike?
  • Daniel wa tjita tjike indu tja zuva ohunga netwako epe?
  • Omena ratjike Darius tja kurungisirwe tjinene nao nga tje hina aa sora okurara, neye wa tjita tjike menyunguhuka?
  • Daniel wa zira Darius vi?
  • Ovarumendu ovarunde mba kondjisa okuzepa Daniel va tjitwa tjike, nu Darius wa tjanga orutuu ndu maru tja vi kovandu avehe vouhona we?

Omapuriro omaweziwa

  • Lesa Daniel 6:1-28.

    Ozongondjero zokupirukira Daniel maze tu zemburukisa vi ohunga na imbi ovapirukire vOvahongonone vaJehova moruveze rwanambano mbi va tjita mokukondjisa okuyandisa oviungura vyawo? (Dan. 6:7; Eps. 94:20; Jes. 10:1; Rom. 8:31)

    Ovakarere vaMukuru ndino mave yenene vi okuhorera ku Daniel mokukara overiwise vokehi “youhonapare”? (Dan. 6:5, 10; Rom. 13:1; Oviung. 5:29)

    Matu yenene vi okuhorera otjihorera tjaDaniel tjokukarera Jehova “nouṱakame”? (Dan. 6:16, 20; Fil. 3:16; Omavan. 7:15)