Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 78: Omatjangero weke kekuma rondjuwo

Ehungi 78: Omatjangero weke kekuma rondjuwo
Eke romundu mari tjanga kekuma

IMBA mape kayenda tjike? Ovandu ve nomukandi omunene. Ombara yaBabilon ya ṋanga ovandu ovananḓengu omayovi. Owo aave ungurisa ovinwino ovingoldo novinwino ovisilveri noviyaha mbya toorerwe mondjuwo ondjapuke yaJehova moJerusalem. Nungwari, tjimanga otji pa munika eke romundu noro ra uta okutjanga kekuma rondjuwo. Ovandu avehe va urumine.

Belsasar novaenda ve

Belsasar, omuatje womuatje waNebukadnesar, oruveze ndo ongwa ri ombara. Eye wa ravaera kutja ovarumendu ve ovayandjandunge ve kaetwe. Ombara ya tja nai ku wo: ‘Ngamwa auhe ngu ma sora okulesa omatjangwa nga nokundjimangururira ma pewa oviyandjewa ovingi nu ma rire omunane outjatatu omunauvara mouhona.’ Nungwari kapa ri umwe wovayandjandunge ve ngwaa sora okulesa omatjangwa nga nokumangururira ombara omaheero wawo.

Ina yombara wa zuva orurokoho nu e ya ketuwo enene romariro. Neyewa raera kombara na tja: ‘Arikana ouruma nao. Pe nomurumendu mouhona woye ngu nombepo yoomukuru ovayapuke mu ye. Iho mukururume Nebukadnesar tja ri ombara, eye we mu zika otja otjiuru tjovayandjandunge ve avehe. Ena re oDaniel. Hinda omundu me ke mu isane, neye me ku raere kutja oviṋa mbi mavi heye tjike.’

Okutja tjimanga Daniel wa kaetwa. Daniel tja za nokupanḓa okukambura oviyandjewa kangamwa, eye wa uta okuraera ombara Belsasar kutja omena ratjike Jehova tja isako ihe omukururume, Nebukadnesar kotjihavero tjouhona. Daniel wa tja: ‘Eye wa ri omuritongamise watjinene, nu Jehova opa zokumuvera.’

Daniel wa raera Belsasar na tja: ‘Nungwari ove oo tjiwa avihe mbya tjitirwe ku ye, nove ngunda we ritongamisa tjimuna Nebukadnesar the ritongamisire. Ove wa eta ovinwino noviyaha okuza kondembeli yaJehova nu amu nwine mo. Eṋe mwa tanga oomukuru veṋu mba ungurwa pomiti nomawe, nu kamu yozikire Omuute wetu Omunenenene. Mukuru opa hindira eke ndi ri tjange omambo nga.’

Daniel arire tja tja: ‘Omambo nga tjangwa owo nga: MENE, MENE, TEKEL na UFARSIN.’

‘MENE mari heye kutja Mukuru wa vara omayuva wouhona woye nu we ye eta komaandero. TEKEL mari tja ove wa havehwa kotjiviha nu wa munikwa kutja oove omupupu tjinene. UFARSIN, okutja ouhona woye wa hanewa mokati nu wa yandjewa kOvamedi na kOvapersi.’

Nandarire ngunda Daniel ama hungire Ovamedi nOvapersi va uta okuwira Babilon. Owo va huura otjihuro nave zepa Belsasar. Omatjangero weke kekuma ya rira ouatjiri mouṱuku otjingewo! Nungwari kwa tjitwa tjike kOvaisrael? Matu ka konḓononona kombunda kaṱiṱi, nungwari rutenga indjeye tu tare kutja Daniel wa tjitwa vi.

Daniel 5:1-31.



Omapuriro

  • Pa tjitwa tjike indu ombara yaBabilon tji ya ri nomukandi omunene nave ungurisa ovinwino noviyaha mbya toorerwe mondembeli yaJehova muJerusalem?
  • Belsasar wa tja tjike kovarumendu ovayandjandunge ve, nungwari ovikwaye mbye ve urire okutjita?
  • Ina yombara we mu raera kutja nga tjite vi?
  • Otja Daniel pa raera kombara, omena ratjike Jehova tja hinda eke ri tjange kekuma rondjuwo?
  • Daniel wa kahurura vi omaheyero womambo kekuma rondjuwo?
  • Pa tjitwa tjike ngunda Daniel ama hungire?

Omapuriro omaweziwa

  • Lesa Daniel 5:1-31.

    Sasaneka ondira kuMukuru ku nomburuma Belsasar ndja ri nayo indu tja munine omatjangero wekekuma rondjuwo? (Dan. 5:6, 7; Eps. 19:9; Rom. 8: 35-39)

    Daniel wa raisa vi ouvanḓe indu tjaa hungire na Belsasar novarumendu ve ovatengwa? (Dan. 5:17, 18, 22, 26-28; Oviung.4:29)

    Daniel ekondwa 5 mari ṋunisa vi ousemba waJehova womananeno waavihe? (Dan. 4:17, 25; 5:21)