Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 77: Owo va panḓa okurikotamena kotjiserekarera

Ehungi 77: Owo va panḓa okurikotamena kotjiserekarera

OVARUMENDU vetatu omitanda mba mo ve zemburuka? Owo omapanga yaDaniel nga panda okurya ovikurya mbi vya ri ovivi ku wo. Ovababilon aave ve isana Sadrak, Mesak na Abed-Nego. Nambano tara ku wo. Omena ratjike owo tji ve hi nokurikotamena kotjiserekarera otjinene hi tjimuna ovandu varwe tji mave tjiti? Indjeye tu konḓonone.

Ove mo zemburuka omatwako Jehova omuini nga tjangere nge isanewa kutja Omatwako Omurongo? Etwako etenga orondi: ‘Ko nokurikotamena koomukuru varwe posi yandje.’ Ovarumendu omitanda mba aave ṱakamisa etwako ndi nandarire kutja kari otjiṋa otjipupu ku wo.

Ombara yaBabilon, Nebukadnesar, ya ṋanga ovandu ovananḓengu kutja ve yekuyandja ondjozikiro kotjiserekarera tje tja zika. Eye wa za nokuraera ovandu avehe kutja: ‘Eṋe tji mwa zuu ombosiro yovanyande vozonya noviharpe novinangoma avihe vyarwe, mamu sokuripeta na mu rikotamene kotjiserekarera tjongoldo tji. Auhe ngu hi nokuripeta nokurikotamena kutjo ma yumbirwa mbo mezuko romuriro.’

Indu Nebukadnesar tja zuva kutja Sadrak, Mesak na Abed-Nego kave rikotamenene kotjiserekarera, eye wa pindika tjinene. Eye wa tja ngave etwe ku ye. Eye we ve pa oruveze rwarwe rwokurikotamena kotjiserekarera. Nungwari omitanda mbi vya ṱakama mu Jehova. Owo va tja ku Nebukadnesar: ‘Mukuru wetu ngu tu karera ma yenene okutuyama. Nu nande he tu yamene, eṱe kamaatu rikotamene kotjiserekarera tjoye tjongoldo.’

Sadrak, Mesak na Abed-Nego

Nu Nebukadnesar tja zuva nai, eye wa pindikira ko. Opo pa ri nezuko romuriro popezu neye wa tja: ‘Rundiseye ezuko potuhambombari kombanda yaindu aruhe!’ Okutja eye wa rakiza kutja ovarumendu ovanamasa tjinene votjimbumba tje tjovita ve pandeke Sadrak, Mesak na Abed-Nego nu ve ve yumbe mezuko romuriro. Ezuko ra rundisirwe tjinene ngandu ovarumendu ovanamasa mba tji va ṱa kotururumo. Nu pa tjitwa tjike komitanda vitatu mbya yumbwa mo

Ombara ya tara mezuko, nu arire tji ya uruma. Neye wa pura na tja: ‘Eṱe ka tu pandekere ovarumendu vetatu natu ve yumbu mezuko romuriro?’

Ovakarere ve ve mu zira nave tja: ‘Ii, otji twa tjiti.’

Neye wa tja: ‘Okutjavi tji me munu ovarumendu vane mbu mave ryanga momuriro. Owo kave pandekerwe, nu kave nokupya. Nu ingwi omutjaine ma munika otja omukuru.’ Nu ombara ya ya popezu nomuvero wezuko nai isana: ‘Sadrak! Mesak! Abed-Nego! Vakarere vaMukuru wokOmbandambanda! Piteye!’

Indu tji va pita, ovandu avehe va muna kutja kava ri notjipo. Okutja ombara ai tja: ‘Mukuru waSadrak, Mesak na Abed-Nego nga hivirikwe! Eye wa hindi omuengeli we nu we ve yama mena rokutja owo va panḓa okuripeta nokurikotamena komukuru warwe pendje na Mukuru wawo.’

Ihi otjihorera otjiwa tjouṱakame ku Jehova kwete okuhorera!

Eksodus 20:3; Daniel 3:1-30.



Omapuriro

  • Ombara yaBabilon Nebukadnesar wa yandja omarakiza yeṋe kovandu?
  • Omena ratjike omapanga waDaniel yetatu tji ya panḓa okurikotamena kotjiserekarera tjotjingoldo?
  • Indu Nebukadnesar tja yandja oruveze rwarwe kOvaheberi vetatu okurikotamena kotjiserekarera, owo va raisa vi kutja ve nongamburiro mu Jehova?
  • Nebukadnesar wa raera kovarumendu ve kutja ngave tjite vi ku Sadrak, Mesak na Abed-Nego?
  • Nebukadnesar wa muna tjike indu tja tara mezuko?
  • Omena ratjike ombara tji ya hivirika Mukuru wooSadrak, Mesak na Abed-Nego, nu owo mave tu pe otjihorera tjaye?

Omapuriro omaweziwa

  • Lesa Daniel 3:1-30.

    Otjikaro tjiṋe tji tja raisiwa i omitanda vyOvaheberi, ovakarere vaMukuru tji mave sokuhorera indu ongamburiro yawo tji mai rorwa? (Dan. 3:17, 18; Mat. 10:28; Rom. 14:7, 8)

    Otjikwaye otjinanḓengu Jehova Mukuru tja honga Nebukadnesar? (Dan. 3:28, 29; 4:34, 35)