Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 73: Ombara yaIsrael osenina nu ombwa

Ehungi 73: Ombara yaIsrael osenina nu ombwa

JOSIJA wa ri nozombura hambondatu uriri indu eye tja rira ombara yomihoko vivari vyaIsrael vyokeyuva kokumoho. Inda ozombura ozonḓiṱi komundu okurira ombara. Okutja rutenga tjiva vovandu imbo ovanene ve mu vatera okuhonaparera otjiwaṋa.

Indu Josija tja ri ombara oure wozombura hambombari eye wa uta okupaha Jehova. Eye wa kongorera otjihorera tjozombara ozombwa tjimuna David, Josafat na Hiskija. Okuzambo Josija ngunda a ri omutanda, eye wa tjita otjiṋa otjipenda.

Ombara novarumendu mave nyanyaura ovisenginina

Oruveze orure Ovaisrael ovengi va ri ovandu ovavi. Owo aave rikotamene koomukuru vovisenginina. Owo aave kumbu koviserekarera vyovisenginina. Okutja Josija wa ya novarumendu ve na kaisapo omerikotameno woposyo mehi. Imbi vya ri oviungura ovingi mena rokutja ovandu ovengi aave rikotamene koomukuru wovisenginina. Tara Josija novarumendu ve tji mave nyanyaura ovisenginina.

Okuzambo Josija wa twapo ovarumendu vetatu kutja ve ṱune ondembeli yaJehova . Ovimariva vya wongwa okuza kotjiwaṋa navi yandjwa kovarumendu mba kutja ve sute navyo oviungura mbyaavi sokuungurwa. Owo ngunda amave ungura kondembeli, omupristeri omunene Hilkija wa vaza mo otjiṋa otjinanḓengu tjinene. Otjo tja ri embo romatwako indi Jehova nda tjangisire ku Moses rukuru. Oro ra pandjarere ozombura ozengi.

Embo ra twarewa ku Josija, nu eye a ningire kutja ri leserwe ye. Indu Josija ngunda ama puratene, eye wa muna kutja otjiwaṋa kaatji ṱakamisa omatwako waJehova. Eye wa ri noruhoze mena rotjiṋa ihi, na nyondorora ozombanda ze otja tji mo munu mba. Eye wa tja: ‘Jehova wa pindika ku na eṱe, mena rokutja ootate kave ṱakamisire omatwako nga tjangwa membo ndi.’

Hilkija nOmbara Josija

Josija wa rakiza omupristeri omunene Hilkija kutja nga konḓonone kutja Jehova ma tjiti tjike ku wo. Hilkija wa ya komukazendu omuprofete Hulda, nu e mu pura. Eye we mu pa ombuze ndji okuza ku Jehova kutja ma yarure ku Josija: ‘Jerusalem novandu vatjo mave verwa mena rokutja owo ve rikotamena koomukuru vovisenginina nu ehi re ura nouvi. Nungwari mena rokutja ove, Josija, wa tjita ouwa, omberero ndji mai ya kombunda yonḓiro yoye.’

2 Ekuruhungi 34:1-28.



Omapuriro

  • Josija wa ri nozombura ngapi tja rira ombara, neye wa uta okutjita tjike kombunda yozombura hambombari zouhonapare we?
  • Otja tji mo munu motjiperendero otjitenga Josija ma ungura tjike?
  • Otjikeṋa omupristeri omunene tja muna indu ovarumendu tjaave ṱunu ondembeli?
  • Omena ratjike Josija tja nyondorora ozombanda ze?
  • Ombuze iṋe okuza ku Jehova omukazendu omuprofete Hulda ndja yandja ku Josija?

Omapuriro omaweziwa

  • Lesa 2 Ekuruhungi 34:1-28.

    Otjihorera tjiṋe Josija tja yandja ku imba ngahino mba munine otuveze otuzeu mouṱiṱi wawo? (2 Ekuruh. 33:21-25; 34:1, 2; Eps. 27:10)

    Omikambo viṋe ominanḓengu Josija mbya toora mokuryamisa omerikotameno wouatjiri komurungu mombura oitja-8, oitja-12, noitja-18 zouhonapare we? (2 Ekuruh. 34:3, 8)

    Otjihorera tjombara Josija notjomupristeri omunene Hilkija mavi tu hongo tjike ohunga nokuṱiza otuveze twetu twomerikotameno mongaro ombwa? (2 Ekuruh. 34:9-13; Omiano 11:14; 1 Kor. 10:31)