Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 64: Salomo ma tungu ondembeli

Ehungi 64: Salomo ma tungu ondembeli

DAVID ngunda ee hi ya ṱa, eye wa yandja omasanekero womatungiro wondembeli yaJehova ku Salomo. Omasanekero ngo David wa isa ku Jehova. Ombura oitjaine youhonapare we, Salomo wa uta okutunga ondembeli, noyo ye mu kambura ozombura hambombari nohinga okumana. Pa ri ovarumendu omayovi omirongo mba ri norupa mokutunga ondembeli. Omatungiro ya kosa ovimariva ovingi tjinene, mena rokutja kwa ungurisiwa ongoldo nosilveri onyingi.

Ondembeli ya ri nomatuwo yevari omanenenene, tji muna nga ri mondanda yomaturiro. Nungwari omatuwo nga ya ri omanene potuvari pu inga nga ri mondanda yomaturiro. Salomo wa tjita kutja ondanda yomerikutiropamwe i tuwe metuwo romoukoto wondembeli, nu oviṋa vyarwe mbyaa vi ṱizirwa mondanda yomaturiro vya tuwa metuwo rarwe.

Ondembeli tji ya manuka, pa kara omukandi omunene. Salomo wa wora ozongoro komurungu wondembeli na kumbu, otja tji mo munu motjiperendero. Salomo wa kumba ku Jehova na tja: ‘Nandarire eyuru ka ri yenene kOve, nu ondembeli ndji mai yenene vi kOve. Nungwari, Mukuru wandje, arikana puratena kotjiwaṋa tjoye aruhe tji matji tara mba amatji kumbu.’

Ombara Salomo mai kumbu

Indu Salomo tja mana okukumba, omuriro we ya okuza keyuru. Owo wa ningiririsa ozombunguhiro zovinamuinyo nḓa punguhwa. Nu ongeṋangeṋeno yaJehova ye urisa ondembeli. Ihi matji raisa kutja Jehova aa puratene, nokutja eye wa ri nonyuṋe nondembeli na wina nongumbiro yaSalomo. Okutja ovandu kaave kerikotamena kondanda yomaturiro rukwao nungwari aave i kondembeli.

Oruveze orure Salomo wa honapara momuano omusemba, nu otjiwaṋa tja ri nondjoroka. Nungwari Salomo wa kupa ovakazendu ovengi mbu va za komahi yarwe mbaave he rikotamene ku Jehova. Ove mo munu umwe wawo tji me rikotamene kotjisenginina? Korusenina ovakazendu vaSalomo va tjita kutja eye ma ute okurikotamena koomukuru varwe wina. Ove mo tjiwa kutja pa tjitwa tjike indu Salomo tja tjita nao? Eye kaa tjindi otjiwaṋa momuano omuwa rukwao. Eye wa uta okuveṋiṋikiza, nu otjiwaṋa katja ri nondjoroka rukwao.

Ombara Salomo mai rikotamene kotjisenginina

Jehova wa pindikira Salomo tjinene mena rotjiṋa hi, nEye wa tja ku ye: ‘Ami me ku yeka ouhona ne u yandja komurumendu warwe. Ami hi nakutjita nao ngunda au nomuinyo, nungwari me tji tjiti moruveze romahonaparero womuzandu woye. Nu Ami hi nokuisa ko ovandu avehe vouhona komuzandu woye.’ Indjeye tu tare kutja ihi tja tjitwa vi.

1 Ekuruhungi 28:9-21; 29:1-9; 1 Ozombara 5:1-18; 2 Ekuruhungi 6:12-42; 7:1-5; 1 Ozombara 11:9-13.



Omapuriro

  • Salomo wa kambura orure ndu ṱa pi okumana okutunga ondembeli yaJehova, nu omena ratjike tji ya kosa ovimariva ovingi nao?
  • Mondembeli mwa ri nomatuwo yengapi omanenenene, nu metuwo romoukoto mwa tuwa tjike?
  • Salomo wa tja tjike mongumbiro ye indu ondembeli tji ya manuka okutungwa?
  • Jehova wa raisa vi kutja wa ri nohange nongumbiro yaSalomo?
  • Ovakazendu vaSalomo va tjita kutja ma tjite tjike, nu Salomo wa tjitwa tjike?
  • Omena ratjike Jehova tja pindikira Salomo, nu Jehova we mu raera tjike?

Omapuriro omaweziwa

  • Lesa 1 Ekuruhungi 28:9, 10.

    Tji twa tara komambo yaDavid nga tjangwa me 1 Ekuruhungi 28:9, 10, otjikeṋa tji matu sokukondjisa okutjita eyuva arihe mehupo retu? (Eps. 19:14; Fil. 4:8, 9)

  • Lesa 2 Ekuruhungi 6:12-21, 32-42.

    Salomo wa raisa vi kutja kapena ondjuwo ndja tungwa nomake wovandu ndji mai yenene ku Mukuru wokombandambanda? (2 Ekuruh. 6:18; Oviung. 17:24, 25)

    Omambo waSalomo nga tjangwa me 2 Ekuruhungi 6:32, 33, maye raisa tjike ohunga na Jehova? (Oviung. 10:34, 35; Gal. 2:6)

  • Lesa 2 Ekuruhungi 7:1-5.

    Otja tjimuna otjiwaṋa tjaIsrael tji tja uta okutanga Jehova indu tji tja za nokumuna ongeṋangeṋeno ye, ihi matji sokutuhinga okutjita tjike indu tji matu ripurire komwano Jehova mbwe sera ondaya otjiwaṋa tje ndino? (2 Ekuruh. 7:3; Eps. 22:22; 34:1; 96:2)

  • Lesa 1 Ozombara 11:9-13.

    Ongaro yehupo raSalomo mai tu raisire vi ounanḓengu wokukara ovaṱakame nga komaandero? (1 Ozomb. 11:4, 9; Mat. 10:22; Omavan. 2:10)