Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 60: Abigajil na David

Ehungi 60: Abigajil na David

OVE mo tjiwa omukazendu omuwa ngo ngu me ya okuhakaena naDavid? Ena re oAbigajil. Eye omunazondunge, nu wa tjaera David okutjita otjiṋa otjivi. Nungwari ngunda atu hiye rihonga ohunga na ihi, indjeye tu tare kutja ovikwaye mbya tjitwa ku David.

Kombunda yaindu David tja za nokutupuka okuza ku Saul, wa katara morupoko. Omarumbi we neṱunḓu re arihe va kakara ngo puna ye. Ovarumendu mangara 400 ve ya ku ye, nu eye wa rira omunane wawo.Okuzambo David wa ya kombara yaMoab na tja: ‘Arikana yandjera tate na mama ve kare puna ove ngandu ami tji mba tjiwa kutja mape tjitwa tjike ku ami.’ Kombunda David novandu ve va uta okutara movivanda.

Kombunda yanao David otja hakaena na Abigajil. Omurumendu we Nabal wa ri norutumbo orunene. Eye wa ri nozonḓu 3 000, nozongombo 1 000. Nabal wa ri omurumendu wotjikaro otjivi. Nungwari omukazendu we Abigajil omuwa tjinene. Eye wina ma tjiwa okutjita ouwa. Otjikando tjimwe wa yama omiinyo vyeṱunḓu re. Indjeye tu tare kutja omomuano uṋe.

David novandu ve va ri notjari na Nabal. Owo va vatera okuyama ozonḓu ze. Mena ranao eyuva rimwe David wa hinda ovandu ve tjiva ve kaningire ombatero ku Nabal. Ovandu vaDavid ve ya ku Nabal ngunda eye novavatere ve amave hora ozonḓu. Oro ra ri eyuva romukandi, nu Nabal wa ri noviṋa ovingi noviwa okurya. Mena ranao ovandu vaDavid va tja: ‘Eṱe twa ri notjari na ove. Eṱe katu vakere nandarire onḓu yoye imwe, nungwari twe ze ṱakamisa nawa. Nambano, arikana, tu pa ovikurya.’

Nabal wa zira natja: ‘Ami hi nakuyandja ovikurya vyandje kovarumendu otja eṋe.’ Eye wa hungira momuano omuvi, nu wa hungira oviṋa ovivi ohunga na David. Ovarumendu tji va yaruka ku David nave mu raere ohunga na ihi, David wa pindika tjinene. Nu eye wa raera ovandu ve: ‘Tooreye omangaruvyo yenu!’ Nu owo va uta ouyenda wawo okukazepa Nabal novandu ve.

Umwe wovandu vaNabal, ngwa zuva omambo omavi Nabal nga hungira, wa serekarera ku Abigajil imbi mbya tjitwa. Tjimanga Abigajil wa rongerisa ovikurya. Eye we vi rondisa kousino na utu ouyenda we. Eye tja hakaena na David, wa heruka kokasino ke, we ripeta natja: ‘Arikana, mutengwa, o yandja ko ombango komurumendu wandje Nabal. Eye eyova, nu u tjita oviṋa oviyova. Otjiyandjewa otjohi. Arikana kambura, nu tu isira ku imbi mbya tjitwa.’

Abigajil ma eta ovikurya ku David

David we mu zira na tja: ‘Oove omukazendu onongo. Ove we ndji tjaere kokuzepa Nabal okumusutisa mena rotjikaro tje otjivi. Nambano yaruka konganda mohange.’ Kombunda Nabal tja ṱa, Abigajil wa rira umwe wovakazendu vaDavid.

1 Samuel 22:1-4; 25:1-43.



Omapuriro

  • Ena romukazendu ngu ma kahakaena na David motjiperendero otjikwaye, nu eye omundu wotjikaro tji tja sana pi?
  • Nabal eye owaṋi?
  • Omena ratjike David tja hinda ovandu ve tjiva okukaningira ombatero ku Nabal?
  • Nabal wa tja tjike kovandu vaDavid, nu kunao David wa tjita tjike?
  • Abigajil wa raisa vi kutja eye omukazendu onongo?

Omapuriro omaweziwa

  • Lesa 1 Samuel 22:1-4.

    Eṱunḓu raDavid ra raisa vi otjihorera otjiwa kutja tu sokuvaterasana moungu nourumbi wOukriste? (Omiano 17:17; 1 Tes. 5:14)

  • Lesa 1 Samuel 25:1-43.

    Omena ratjike Nabal tji ma hungirwa mongaro yokuhi nondengero? (1 Sam. 25:2-5, 10, 14, 21, 25)

    Ovakazendu Ovakriste ndino mave rihongere tjike kotjihorera tjaAbigajil? (1 Sam. 25:32, 33; Omiano 31:26; Ef. 5:24)

    Abigajil wa tjaera David kutja aha tjiti oviṋa viṋe vivari ovivi? (1 Sam. 25:31, 33; Rom. 12:19; Ef. 4:26)

    Otjikaro David tja raisa komambo waAbigajil matji vatere vi ovarumendu ndino okuvara ovakazendu otja Jehova tje ve vara? (Oviung. 21:8, 9; Rom. 2:11; 1 Petr. 3:7)