Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 67: Josafat ma ṱakama mu Jehova

Ehungi 67: Josafat ma ṱakama mu Jehova

OVE mo tjiwa kutja ovarumendu mba oowaṋi nokutja mave ungura tjike? Owo mave i kovita, nu ovarumendu imba mbu ve ri komurungu mave imbura. Nungwari ove ngahino mo ripura kutja:‘Omena ratjike ovaimbure tji ve hi nomangaruvyo nomanga okukarwa nawo?’ Indjeye tu tare.

Ovaisrael mave i kovita

Josafat eye ombara youhona womihoko vivari vyaIsrael. Eye wa hupa moruveze rumwe nombara Ahab na Isebel vouhona womihoko 10 vyokeyuva kokunene. Nungwari Josafat eye wa ri ombara osemba, nu ihe Asa wa ri ombara ombwa wina. Okutja oure wozombura ozengi otjiwaṋa tjouhona womihoko vivari vyokeyuva kokumoho tja yorokera ehupo ewa.

Nungwari pa tjitwa otjiṋa tji tja mumaparisa otjiwaṋa. Ovahindwa va eta ombuze ku Josafat yokutja: ‘Otjimbumba otjinene tjovarwe okuza komahi waMoab na Amon nokondundu Seir mave ya okumurwisa.’ Ovaisrael ovengi va woronganena mu Jerusalem okupaha ombateroyaJehova. Owo va ya kondembeli, nu ingo Josafat wa kumba na tja: ‘Jehova Mukuru wetu, eṱe katu nakutjiwa kutja ngatu tjite vi. Eṱe katu nomasa wokurwisa otjimbumba tjovita otjinene hi. Nungwari eṱe matu undju ombatero kove.’

Jehova wa puratena, nu wa tjita kutja umwe wovakarere ve ma raere otjiwaṋa kutja: ‘Otjirwa hi katjeṋu, nungwari otjaMukuru omuini. Eṋe kamu nakuhepa okurwa. Kurameye uriri nu mu tarere Jehova tji me mu yama.’

Okutja ependukirwa Josafat wa raera kotjiwaṋa: ‘Ṱakameye mu Jehova!’ Okuzambo eye wa twa ovaimbure komurungu wovarwe ve, nu ngunda amave kayenda aave imbura omaimburiro yokutanga Jehova. Ove mo tjiwa kutja pa tjitwa tjike indu tji va vaza popezu notjirwa? Jehova wa tjita kutja ovarwe imba ovanavita ve yarukasane nokurwisasana oveni. Nu Ovaisrael tji va vaza, tjandje ovarwe avehe vovanavita va koka!

Josafat ka raisire ozondunge nao indu tja ṱakama mu Jehova? Eṱe wina matu rire ovanazondunge indu tji matu ṱakama mu Ye.

1 Ozombara 22:41-53; 2 Ekuruhungi 20:1-30.


Omapuriro

  • Josafat wa ri omungendu, nu aa hupu moruveze ruṋe?
  • Omena ratjike Ovaisrael tji va mumaparere, nu otjingi tjawo va tjita tjike?
  • Eziriro riṋe Jehova nda yandja kongumbiro yaJosafat?
  • Jehova wa tjita kutja pe tjitwe tjike komurungu wotjirwa?
  • Eṱe matu rihongere tjike ku Josafat?

Omapuriro omaweziwa

  • Lesa 2 Ekuruhungi 20:1-30.

    Josafat wa raisa vi imbi ovakarere vaMukuru ovaṱakame mbi mave sokutjita indu tji va kuramenwa i ozongaro ozondirise? (2 Ekuruh. 20:12; Eps. 25:15; 62:1)

    Jehova aruhe aa ungurisa omurari wokuhungira novandu ve, nu omurari uṋe eye mbwe ungurisa ndino? (2 Ekuruh. 20:14, 15; Mat. 24:45-47; Joh. 15:15)

    Indu Jehova tji ma eta ‘ovita vyeyuva enene raMukuru Omunamasaaehe,’ ongaro yetu mai sana vi kuna indji oyaJosafat? (2 Ekuruh. 20:15, 17; 32:8; Omavan. 16:14, 16)

    Mokuhorera Ovalevi, ozopionira novahindwa, ndino ve ryamisa vi oviungura vyokuzuvarisa mouye auhe? (2 Ekuruh. 20:19, 21; Rom. 10:13-15; 2 Tim. 4:2)