Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 49: Eyuva ra kurama

Ehungi 49: Eyuva ra kurama

TARA ku Josua. Eye ma tja: ‘Yuva, kurama!’ Nu eyuva ra kurama. Oro ra kurama keyuru oure weyuva arihe. Jehova wa tjita nao! Nungwari indjeye tu tare kutja omena ratjike Josua tji ma vanga kutja eyuva ri hirimane.

Eyuva

Ozombara ozombi ndano mehi raKanaan tji za uta okurwa kuna Ovagibeon, Ovagibeon va tuma omurumendu umwe okukaningira ombatero ku Josua. Eye wa tja: ‘Indjo tjimanga ku eṱe! Tu yama! Ozombara azehe nḓa tura mozondundu ze rikuta kumwe okurwisa ovakarere voye.’

Okutja imbo Josua novarwe ve avehe vovita otjiva ya. Owo va kayenda ouṱuku auhe. Indu tji ve ya ku Gibeon, ovarwe vovita vozombara ndano va tira nave utu okutupuka. Okuzambo Jehova wa rokisa ozombawe zombura ozonene okuza keyuru, nu ovarwe wovita ovengi va ṱa i ozombawe zombura kombanda yaimba mba ṱa i ovarwe vaJosua.

Josua

Josua aa munu kutja eyuva ri ri pookukahita. Mape zorere, nu ovarwe ovengi vovita vozombara ndano ozombi mave taura. Mena ranao Josua wa kumba ku Jehova okuzambo a tja: ‘Yuva, kurama!’ Nu eyuva tji ra hirimana, Ovaisrael va yenena okumana okutaara otjirwa.

Kuna ozombara ozengi wina mu Kanaan nḓa tonda ovandu vaMukuru. Josua norupa rwe rovita va kambura ngambeno ozombura hamoumwe okutaara ozombara 31 mehi. Indu ihi tji tja tjitwa, Josua wa tjita kutja ehi raKanaan ri haṋwe moviwaṋa mbi mavi hepa oruveze.

Ozombura ozengi za kapita, nu korusenina Josua wa ṱa notjiwondo tjozombura 110. Indu ngunda eye nomapanga we ava ri nomuinyo, ovandu va ri nonḓuviro ku Jehova. Nungwari ovarumendu ovasemba mba tji va ṱa, ovandu va uta okutjita oviṋa ovivi nave hiti moumba. Indwi ooruveze tjiri ndwaave hepa ombatero yaMukuru.

Josua 10:6-15; 12:7-24; 14:1-5; Ovapangure 2:8-13.



Omapuriro

  • Motjiperendero, Josua ma tja vi, nu omena ratjike?
  • Jehova wa vatera vi Josua novarwe ve vovita?
  • Josua wa taara ozombara ovanavita vengapi, nu pa kambura orure ndu ṱa pi?
  • Omena ratjike Josua tja haṋa ehi raKanaan?
  • Josua wa ṱa nozombura ngapi, nu pa tjitwa tjike kovandu kombunda yanao?

Omapuriro omaweziwa

  • Lesa Josua 10:6-15.

    Okutjiwa kutja Jehova wa tjita kutja eyuva nomueze vi kurame kOvaisrael, matji tu pe ongamburiro yatjike ndino? (Jos. 10:8, 10, 12, 13; Eps. 18:3; Omiano 18:10)

  • Lesa Josua 12:7-24.

    Owaṋi mouatjiri ngwa taara ozombara 31 mu Kanaan, nu ongwaye ihi tji tji ri otjinanḓengu kweṱe ndino? (Jos. 12:7; 24:11-13; Deut. 31:8; Luk. 21:9, 25-28)

  • Lesa Josua 14:1-5.

    Ehi ra haneṋwe vi mokati komihoko vyaIsrael, nu ihi matji raisa tjike ohunga novirumatwa mOparadisa? (Jos. 14:2; Jes. 65:21; Esek. 47:21-23; 1 Kor. 14:33)

  • Lesa Ovapangure 2:8-13.

    Otja Josua mu Israel, oowaṋi mbe tjevera ovandu ndino kutja ave ha isa omerikotameno wouatjiri? (Ovapan. 2:8, 10, 11; Mat. 24:45-47; 2 Tes. 2:3-6; Tit.1:7-9; Omavan. 1:1; 2:1, 2)