Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 46: Omakuma waJeriko

Ehungi 46: Omakuma waJeriko

OTJIKEṊA tji matji wisa omakuma waJeriko nga? Mape munika aayo ya tonwa i otjipamuke otjinene. Nungwari momayuva ngo kakwa ri ovipamuke, nandarire ozondjembo kaku za ri. Ihi otjihimise tjarwe tjaJehova! Indjeye tu tare kutja tja tjitwa vi.

Omakuma waJeriko maye u

Puratena ku ihi Jehova tji ma raere Josua: ‘Ove novarwe voye mamu sokukondoroka otjihuro. Kondorokeye otjikando tjimwe meyuva oure womayuva hamboumwe. Tjindeye otjipwikiro tjomerikutiropamwe puna eṋe. Ovapristeri hambombari mave sokukaenda komurungu watjo nave posisa ozohiva zawo.

‘Meyuva oritjahambombari mamu sokukondoroka otjihuro povikando hambombari. Okuzambo posiseye ombosiro onde kozohiva, nu auhe nga ravaere nombosiro onene yovita. Nu omakuma wotjihuro maye wire pehi!’

Josua notjiwaṋa va tjita otja Jehova pa hungira. Ngunda amave kondoroka, omundu auhe wa ri a mwina. Kape na omundu ngwaa nyamukura. Oviṋa mbyaavi zuvaka ombosiro yozohiva nozonywaa zozombaze. Ovanavita votjiwaṋa tjaMukuru ngahino va urumine. Ove mo munu ongoze oserandu ndji mai rekareka okuza moruiho? Oruiho rwa uṋe ndo? Oro oruiho rwondjuwo yaRahab. Rahab wa tjita otja pa raerwa kozohoze mbari okutjita. Eṱunḓu re arihe ra ri moukoto puna ye amave tarere.

Josua

Korusenina, meyuva oritjahambombari, kombunda yokukondoroka otjihuro povikando hambombari, ozohiva za posa, ovarwe wovita va ravaera, nu omakuma ya wa. Okuzambo Josua wa tja: ‘Zepeye omundu auhe motjihuro nu mu tji nyose. Nyoseye kangamwa otjiṋa. Yameye ovisilveri, ovingoldo, ongoporo novitenda uriri, nu mu vi yandje kotjipwikiro tjovihuze vyondanda yaJehova.’

Kozohoze mbari, Josua wa tja: ‘Hiteye mondjuwo yaRahab, nu ke mu pitiseye puna eṱunḓu re arihe.’ Rahab neṱunḓu re va yamwa, otja ozohoze pu ze mu kwizikira.

Josua 6:1-25.



Omapuriro

  • Jehova wa tja ovarwe novapristeri ngave ungure tjike oure womayuva hamboumwe?
  • Ovarumendu aave sokutjita tjike meyuva oritjahambombari?
  • Otja tji mo munu motjiperendero, mape tjitwa tjike komakuma waJeriko?
  • Ongwaye tji pe nongoze oserandu ndji mai rekareka moruiho?
  • Josua wa tja ovarwe ngave tjite vi kovandu notjihuro, nungwari ovisilveri, ovingoldo, ongoporo novitenda aave sokuvitjita vi?
  • Ozohoze mbari za raerwa kutja ngaze tjite vi?

Omapuriro omaweziwa

  • Lesa Josua 6:1-25.

    Omakondorokero waJeriko i Ovaisrael meyuva oritjahambombari ya sana vi koviungura vyokuzuvarisa vyOvahongonone vaJehova momayuva nga omasenina? (Jos. 6:15, 16; Jes. 60:22; Mat. 24:14; 1 Kor. 9:16)

    Omahunganekero nga tjangwa mu Josua 6:26 ya yenenisiwa vi ape ozombura 500 zokombunda, nu ihi matji tu hongo tjike ohunga nembo raJehova? (1 Ozomb. 16:34; Jes. 55:11)