Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 35: Jehova ma yandja omatwako we

Ehungi 35: Jehova ma yandja omatwako we

APE omieze vivari kombunda yaindu tji va pita moEngipte, Ovaisrael ve ya pondundu Sinai, wina ndji isanewa Horeb. Imba Jehova opa hungirira kuna Moses okuza motjimbuku tjaatji pi. Ovandu va tona po ozondanda zawo mba nu va kara po okaruveze okaṱiṱi.

Ngunda otjiwaṋa amatji undjire kehi, Moses wa ronda kondundu. Ingo kombanda yondundu, Jehova wa raera Moses kutja Eye ma vanga Ovaisrael ve puratene kuye nu ve rire otjiwaṋa tje tjapeke. Indu Moses tja heruka kondundu, eye wa raera Ovaisrael imbi Jehova mbya hungira. Nu otjiwaṋa tja itavera kutja matji puratene ku Jehova, mena rokutja otjo matji vanga okurira otjiwaṋa tje.

Nambano Jehova wa tjita otjiṋa otjihimise. Eye wa tjita kutja ondundu kombanda i twimise omuise, na tjiti ombosiro onene yoruṱuṱumo. Eye wina wa hungira kovandu a tja: ‘Owami Jehova, Mukuru woye, ngu mbe ku pitisa mehi raEngipte.’ Okuzambo Eye we ve rakiza a tja: ‘Ko na kurikotamena ku Mukuru warwe pendje na Ami.’

Ovitjangero vyomawe vivari

Mukuru wa yandja omatwako poo ozoveta zarwe muvyu kOvaisrael. Otjiwaṋa tja urumine tjinene. Okutja atji raere Moses atji tja: ‘Ove hungira kuna eṱe, orondu eṱe matu tira kutja ngaatu koka Mukuru tja hungire kuna eṱe.’

Kombunda Jehova wa raera Moses a tja: ‘Ronda nguno kondundu ku Ami! Ami me kupe ovitjangero vyomawa vivari ku mba tjanga ko omatwako Ami ngu me vanga kutja otjiwaṋa tji ṱakamise.’ Mena ranao Moses wa ronda rukwao kondundu. Oure womayuva 40 nomauṱuku 40 eye wa kara ngo.

Mukuru wa ri nomatwako omengi tjinene kotjiwaṋa tje. Moses wa tjanga omatwako nga. Mukuru wina wa yandja ovitjangero vivari vyomawe ku Moses. Ku vyo, Mukuru omuini wa tjanga ko ozoveta 10 eye nḓa yandja kotjiwaṋa atjihe. Oyo ye isanewa kutja Omatwako Omurongo.

Moses pondundu Sinai

Omatwako Omurongo oyo ozoveta ozonanḓengu. Nu otjingaperi wina ohunga nomatwako omengi Jehova nga yandja kOvaisrael. Rimwe romatwako nga orondi: ‘Suvera Jehova Mukuru woye nomutima woye auhe nozondunge zoye azehe nomuinyo woye auhe nomasa woye ayehe.’ Nu rarwe orondi: ‘Suvera omukweṋu otja tji we risuvera omuini.’ Omuna waMukuru, Jesus Kristus, wa tja inga onge ri omatwako yevari omanenenene Jehova nga yandja kotjiwaṋa tje Israel. Kombunda matu ke rihonga ovingi ohunga nOmuna waMukuru nomahongero we.

Eksodus 19:1-25; 20:1-21; 24:12-18; 31:18; Deuteronomium 6:4-6; Levitikus 19:18; Mateus 22:36-40.



Omapuriro

  • Kombunda yomieze vivari okuza nokupita moEngipte, Ovaisarel va katona pi ozondanda zawo?
  • Jehova wa tja ma vanga kutja ovandu ve tjite tjike, nu eziriro rawo rari riṋe?
  • Ongwaye Jehova tja yandja omawe yevari omapapi ku Moses?
  • Pendje yOmatwako Omurongo, omatwako yeṋe yarwe Jehova nga yandja kOvaisrael?
  • Omatwako yeṋe yevari Jesus nga tja omanenenene?

Omapuriro omaweziwa

  • Lesa Eksodus 19:1-25; 20:1-21; 24:12-18; na 31:18.

    Omambo nga tjangwa mu Eksodus 19:8 maye tu vatere vi okutjiwa kutja ovikeṋa mbi mavi kamburirwa mo indu omundu tji me riyandja omuini otjOmukriste ku Mukuru? (Mat. 16:24; 1 Petr. 4:1-3)

  • Lesa Deuteronomium 6:4-6; Levitikus 19:18; na Mateus 22:36-40.

    Ovakriste ve raisa vi orusuvero rwawo ku Mukuru na kovakwawo? (Mar. 6:34; Oviung. 4:20; Rom. 15:2)