INGA hapo ka kanatje okaṱiṱi nokawa mombuniko are? Ena rako oSamuel. Nu omurumendu ngwa twa eke re kotjiuru tjaSamuel, oEli, omupristeri omunene waIsrael. Imba mbu mave mu eta ku Eli oihe yaSamuel Elkana na ina Hana.

Samuel ma hakaena ku nomupristeri otjiuru wena Eli

Samuel u nozombura ngambeno ine poo ndano uriri. Nungwari eye me yekukara mba pondanda yaJehova yomaturiro puna Eli novapristeri varwe. Omena ratjike Elkana na Hana tji mape ya ave yandja omundu okaṱiṱi otja Samuel kutja me yekukarera Jehova pondanda ye yomaturiro? Indjeye tu tare.

Ozombura ozonḓiṱi uriri komurungu waimbi, Hana wa ri noruhoze tjinene mena rokutja kaa panduka. Nungwari eye aa vanga omuatje tjinenenene. Okutja eyuva rimwe Hana tja karyangera ondanda yomaturiro yaJehova, eye wa kumbire: ‘Jehova, o ndji zembi! Indu ove tji we ndji pe omuatje omuzandu, ami me ku kwizikire kutja me mu yandja ku ove kutja ma karere ove oure womuinyo we auhe.’

Jehova wa zuvira ongumbiro yaHana, nu kombunda yomieze eye wa panduka Samuel. Hana wa suverere okazandona ke okaṱiṱi nga nu wa uta okukehonga ohunga naJehova ngunda aka ri okaṱiṱi tjinene. Eye wa raera omurumendu we: ‘Omuzandu tja zu nokukura okutja tja isakewa komaihi, otji me mu twara kondanda yomaturiro yaJehova ku ma kakara oure womuinyo we auhe.’

Imbi Hana na Elkana ombi mave tjiti otja tji matu munu motjiperendero. Nu mena rokutja Samuel wa hongerwe nawa i ovanene ve, eye wa ri nondjoroka okukakarera Jehova imba pondanda yaJehova. Ombura aihe Hana na Elkana aave ya okurikotamena pondanda yapeke ndji, nokuvarura okazandona kawo okaṱiṱi. Nu ombura aihe Hana aa eterere okavanda kokombanda okape eye ka yatatera Samuel.

Ozombura otja tjaaze kapita, Samuel wa kayenda komurungu okukarera pondanda yomaturiro yaJehova, nu Jehova novandu ve ve musuverere. Nungwari ovazandona vomupristeri omunene Eli, oo Hofni na Pinhas kava ri ovasemba. Owo aave tjiti oviṋa ovingi ovivi, nu aave tjiti kutja ovandu varwe ave ha kara nonḓuviro ku Jehova wina. Eli aa sokuveisa ko kokurira ovapristeri, nungwari eye ka tjitire nao.

Omuzandona Samuel ke na pa yandjera oviṋa ovivi mbyaavi kayenda pondanda yomaturiro okumutjaera okukarera Jehova. Nungwari mena rokutja ovandu ovaṱiṱi uriri mba suverere Jehova tjiri, pa kapita oruveze orure ku Jehova okuhungira ku nomundu kangamwa. Indu Samuel the kura kaṱiṱi imbi ombya tjitwa:

Samuel wa rarere mondanda yomaturiro indu eraka tji re mu pendura. Eye wa zira a tja: ‘Owami ngwi.’ Nu eye wa sekama na tupuka ku Eli, na tja: ‘Owami ngwi, ove we ndji isana.’

Nungwari Eli we mu zira a tja: ‘Hi ku isanene; yaruka u karare.’ Samuel otja yaruka na karara.

Okuzambo ape pose eraka oritjavari: ‘Samuel!’ Samuel wa penduka na tupuka ku Eli rukwao na tja: ‘Owami ngwi. Ove we ndji isana.’ Nungwari Eli we mu zira na tja: ‘Hi ku isanene, muatje wandje, twende karare rukwao.’ Samuel wa yaruka komara we.

Eraka ra isana otjikando otjitjatatu: ‘Samuel!’. Kunao Samuel wa tupuka ku Eli, na tja: ‘Owami ngwi, ove ngahino we ndji isana otjikando hi.’ Eli nambano otja tjiwa kutja nangwari oJehova ngu ma isana. Okutja eye wa tja ku Samuel: ‘Karare rukwao; neye tje ku isana rukwao, itja nai: “Hungira, Jehova, omukarere woye ma zuu.”’

Imbi Samuel ombya hungira Jehova tja isana rukwao. Okuzambo Jehova wa raera Samuel kutja eye ma vere Eli novazandu ve. Kombunda Hofni na Pinhas va ta movita kuna Ovafilisti, nu Eli tja zuva imbi mbya kaenda po eye wa wa ondonya, a teka engoti na tu wina. Kunao omambo yaJehova ya rira ouatjiri.

Samuel we kurire, na rire omupangure omusenina waIsrael. Indu eye tja kurupire, ovandu ve mu ningira: ‘Tu zikira ombara, ndji mai tu honaparere.’ Samuel ka vangere okutjita nao, mena rokutja tjiri Jehova ongwa ri ombara yawo. Nungwari Jehova we mu raera kutja nga puratene kotjiwaṋa.

1 Samuel 1:1-28; 2:11-36; 4:16-18; 8:4-9.



Omapuriro

  • Ena rokazandona okaṱiṱi motjiperendero otjikwaye nu imba ovarwe oowaṋi?
  • Ongumbiro iṋe Hana ndja kumbire eyuva rimwe eye tja karyangere kondanda yomahakaeneno yaJehova, nu Jehova we mu zira vi?
  • Samuel wa ri nozombura ngapi indu tja twarewa okukakarera pondanda yaJehova, nu ina ee mu tjitire tjike ombura aihe?
  • Omana wovazandu vaEli ya ri ootjikwaye nowo va ri ovangendu?
  • Jehova wa isana Samuel vi, nu ombuze iṋe ndje mu pa?
  • Indu Samuel tje kurire eye wa karira ye, nu pa tjitwa tjike indu tja kurupire?

Omapuriro omaweziwa

  • Lesa 1 Samuel 1:1-28.

    Otjihorera tjiṋe otjiwa Elkana tja yandja koviuru vyomaṱunḓu mokuhongora momerikotameno wouatjiri? (1 Sam. 1:3, 21; Mat. 6:33; Fil. 1:10)

    Ehongwa riṋe ndi matu rihongere kotjihorera tjaHana tjokutjinda omauzeu omakurungise? (1 Sam. 1: 10, 11; Eps. 55:22; Rom. 12:12)

  • Lesa 1 Samuel 2:11-36.

    Eli wa yozikire vi ovanatje ve kombanda yokuyozika Jehova, nu ihi matji rire vi erakiza kweṱe? (1 Sam. 2:22-24, 27, 29; Deut. 21:18-21; Mat. 10:36, 37)

  • Lesa 1 Samuel 4:16-18.

    Ozombuze zeṋe ine zotjiwonga nḓa za kovita, nozo za ṱuna vi ku Eli?

  • Lesa 1 Samuel 8:4-9.

    Ovaisrael va pindikisire Jehova vi, neṱe matu yenene okuyandja vi oruvara kOuhona waJehova ndino? (1 Sam. 8:5, 7; Joh. 17:16; Jak. 4:4)