Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 45: Omakondero wonḓonḓu Jordan

Ehungi 45: Omakondero wonḓonḓu Jordan

TARA! Ovaisrael mave kondo onḓonḓu Jordan! Nungwari omeva ye ri pi? Mena rokutja ombura i roka tjinene moruveze ndo, onḓonḓu ya ri aye ura tjinene ozominute katjondumba nḓa kapita. Nungwari omeva nambano ya zengi! Nu Ovaisrael mave kondo mehi ekukutu otja tji va tjita pOmurongawotuu! Omeva ayehe ya ya pi? Indjeye tu tare.

Ovaisrael mave kondo onḓonḓu Jordan

Oruveze tji rwe ya kOvaisrael okukonda onḓonḓu Jordan, Jehova wa raera Josua ma raere kotjiwaṋa: ‘Ovapristeri ngave toore otjipwikiro tjomerikutiropamwe nu ve kayende komurungu wetu. Indu tji va twa ozombaze zawo momeva yonḓonḓu Jordan, omeva maye isa okupupa.’

Okutja ovapristeri va toora otjipwikiro tjomerikutiropamwe, nave tji tjindi komurungu wotjiwaṋa. Indu tji ve ya pu Jordan, ovapristeri va yata momeva. Oyo aaye pupu nomasa nu ya ri omakoto. Nungwari indu ozombaze zawo tji za ṱuna komeva, omeva ya uta okuyenda amaye isa okupupa! Ihi otjihimise! Jehova wa tjaera kokutja aye ha pupu. Okutja, tjimanga kamwa ri omeva rukwao monḓonḓu!

Ovapristeri mbaave tjindi otjipwikiro tjomerikutiropamwe va kayenda ngandu mondivitivi yonḓonḓu ndja kaha. Ove mo ve munu motjiperendero? Ngunda ava kurama mbo, Ovaisrael avehe va kayenda okukonda onḓonḓu Jordan pehi ekukutu!

Ovandu avehe tji va konda, Jehova wa raera Josua okuraera ovarumendu ovanamasa 12: ‘Twendeye monḓonḓu ovapristeri pu va kurama notjipwikiro tjomerikutiropamwe. Tooreye omawe 12, nu mu tendeke kumwe poṋa pu mamu kara ongurova ndji. Okutja, moruyaveze ovanatje veṋu tji mave pura kutja omawe nga ye heya tjike, mamu sokuveraera kutja omeva ya isa okupupa indu otjipwikiro tjaJehova tjomerikutiropamwe tjaatji kondo Jordan. Omawe maye mu zemburukisa otjihimise hi.’ Josua wina wa tendeka omawe 12 kumwe poṋa pu pa kuramene ovapristeri mokati konḓonḓu.

Josua

Korusenina Josua wa raera ovapristeri mbaave tjindi otjipwikiro tjomerikutiropamwe: ‘Rondeye mu pite mu Jordan.’ Nu owo tji va tjita nao, onḓonḓu ya uta okupupa rukwao.

Josua 3:1-17; 4:1-18.



Omapuriro

  • Otjihimise tjiṋe Jehova tja tjita kokutja Ovaisrael ve konde onḓonḓu yaJordan?
  • Otjitjitwa tjiṋe tjongamburiro Ovaisrael tji va ri amave sokutjita kokutja ve konde onḓonḓu yaJordan?
  • Ongwaye Jehova tja raera Josua okuwonga omawe omanene 12 mokati konḓonḓu?
  • Pa tjitwa tjike tjimanga indu ovapristeri tji va za nokuronda okupita mu Jordan?

Omapuriro omaweziwa

  • Lesa Josua 3:1-17.

    Otja tji pa raisiwa kehungi ndi, eṱe matu sokutjita tjike indu tji matu vanga okuvaterwa nokuserwa ondaya i Jehova? (Jos. 3:13, 15; Omiano 3:5; Jak. 2: 22, 26)

    Onḓonḓu yaJordan ya ri mongaro ine indu Ovaisrael tji va konda okuhita mEhi rOmakwizikiro, nu ihi tja hivirika vi ena raJehova? (Jos. 3:15; 4:18; Eps. 66:5-7)

  • Lesa Josua 4:1-18.

    Omawe 12 nga toorwa monḓonḓu yaJordan naye tuwa mu Gilgal, ya ri nondando yatjike? (Jos. 4:4-7)