Twende kovidio oini

Twende komurya

Ovahongonone vaJehova

Toorora eraka Otjiherero

Jakob ma i ku Haran: Ehungi 18

Jakob ma i ku Haran: Ehungi 18

OVE mo tjiwa kutja ovarumendu mba Jakob mbu ma hungirisa oowaṋi? Kombunda wouyenda oure womayuva omengi, Jakob wa hakaena kuna wo pondjombo. Owo aave tjevere ozonḓu zawo. Jakob wa pura: ‘Eṋe mamu zu pi?’

Owo va zira: ‘Ku Haran.’

Jakob wa pura: ‘Eṋe mamu tjiwa Laban?’

Owo va zira: ‘Ii, tara omusuko we, Ragel eyengo ma wondjo notupanda twozonḓu ze.’ Ragel mo mu munu tji ma wondjo okuza kokure?

Jakob ma hakaene kuna Ragel

Jakob tja muna Ragel nozonḓu zongundwe Laban, eye wa kaisako ewe kondjombo kutja ozonḓu ze nwe. Okuzambo Jakob wa hupita Ragel ne mu raere kutja eye owaṋi. Ragel wa ri nenyando tjinene nu wa ya konganda okukaraera ihe Laban.

Laban wa ri nenyando tjinene indu Jakob tje ya okukara puna ye. Nu Jakob tja ningira okukupa Ragel, Laban wa tjaterwa. Nungwari eye wa ningira Jakob okuungura mokuti kwe ozombura hambombari mena raRagel. Jakob wa itavera mena rokutja eye wa suverere Ragel tjinene. Ove mo tjiwa kutja pa tjitwa tjike oruveze rorukupo tji rwa tumbuka?

Laban wa yandja omusuko we erumbi Lea ku Jakob moruveze rwaRagel. Indu Jakob tja itavera okuungurira Laban ozombura hambombari okuweza ku inḓo, Laban wina we mu pa Ragel okurira omukazendu we. Oruveze ndo Jehova aa yandjere ovarumendu okukupa ovakazendu kombanda ya umwe. Nungwari nambano, otja Ombeibela tji ma iraisa, omurumendu ma sokukara nomukazendu umwe uriri.

Genesis 29:1-30.



Omapuriro

  • Omusuko ngu ri motjiperendero owaṋi, nu Jakob we mu tjitira tjike?
  • Jakob wa ri nonḓero yokutjita tjike kokutja ma kupe Rahel?
  • Laban wa tjita tjike oruveze tji rwa tumbuka ku Jakob okukupa Rahel?
  • Jakob wa itavera okutjita tjike kokutja ma pewe Rahel okurira omukazendu we?

Omapuriro omaweziwa

  • Lesa Genesis 29:1-30.

    Jakob wa raisa vi kutja omundu wondengero nandarire kutja Laban we mu tjita otjineya, nu matu rihongere ko tjike ku ihi? (Gen. 25:27; 29:26-28; Mat. 5:37)

    Jakob wa raisa vi ombangu pokati korusuvero noruhuro? (Gen. 29:18, 20, 30; Eimb. Rom. 8:6)

    Ovakazendu veṋe vane mba karira oveṱundu raJakob nu mbe ke mu pandukira ovanatje ovazandu? (Gen. 29:23, 24, 28, 29)