Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 30: Otjihwa tjomakwiya tjaatji pi

Ehungi 30: Otjihwa tjomakwiya tjaatji pi

MOSES we ya ondjira aihe nga kondundu Horeb okupaha ehozu kozonḓu ze. Imba eye wa muna otjihwa tjaatji pi, nungwari kaatji ningirire.

Moses potjihwa tjaatji pi

Moses we rihungirira a tja: ‘Ihi otjihimise. Ami me vanga okuryama kaṱiṱi popezu okukatara.’ Indu eye tja tjita nao eraka otji ra za motjihwa, ari tja: ‘O ryamene ko komeho, hukura ozongaku zoye, orondu poṋa pu wa kurama mbo opopayapuke.’ Mukuru ongwaa hungire okupitira momuengeli, mena ranao Moses wa kutjira omurungu we.

Okuzambo Mukuru wa tja: ‘Ami mba munu nawanawa ouzeu wotjiwaṋa tjandje moEngipte. Okutja ami me i okukevekutura, nove oove ngu me tumu okukapitisa otjiwaṋa tjandje moEngipte.’ Jehova wa ri ama kaeta ovandu ve kehi ewa raKanaan.

Nungwari Moses wa tja: ‘Ami omundu otja ami imbi me vi ungura vi? Nu ngatu tje ami mba i ngo, Ovaisrael tji ve ndji pura nave tja: “Owaṋi ngwe ku hindi?” Kunao ami hi tje vi?’

Mukuru wa zira a tja: ‘Imbi ombi mo ka hungira. “JEHOVA Mukuru waAbraham, na Mukuru waIsak na Mukuru waJakob we ndji hindi ku eṋe.” ’ Nu Jehova wa weza na tja: ‘Indi ena randje nai nga aruhe.’

Moses wa pura a tja: ‘Nu owo tji ve hi nakukambura mu ami tji mbe ke ve raera kutja ove we ndji hindi?’

Mukuru we mu pura a tja: ‘Ihi tji u na tjo meke roye, otjikena?’

Moses wa zira: ‘Okati.’

Mukuru arire tja tja ku Moses: ‘Ke yumba pehi,’. Nu Moses tja tjita nao, okati ake tjituka onyoka. Okuzambo Jehova wa raisira Moses otjihimise tjarwe: ‘Hitisa eke roye mombanda.’ Moses wa tjita nao, nu tja pitisa eke re, oro ra ri evapa twee tjimuna omakende wombepera. Eke aari munika tjimuna ra ri nomutjise omuvi mbu isanewa kutja omutjise wongana. Kombunda yanao Jehova wa yandjere omasa ku Moses okutjita otjihimise otjitjatatu. Korusenina eye wa tjere: ‘Ove tji wa katjita ovihimise imbi Ovaisrael mave kambura kutja ami mbe ku hindi.’

Kombunda yano Moses wa yaruka konganda na katja ku Jitro: ‘Arikana, ndji esa mbi yaruke kovazamumwe vandje mbe ri moEngipte, mbi ke ve tare kutja ingee ve nomuinyo.’ Kunao Jitro wa virikiza Moses nu Moses wa uta ouyenda we okuyaruka koEngipte.

Eksodus 3:1-22; 4:1-20.



Omapuriro

  • Ondundu ndji ri motjiperendero i isanewa vi?
  • Otjiṋa tjiṋe otjihimise Moses tja muna indu tja ire kondundu nozonḓu ze?
  • Eraka nda zire motjimbuku tjaatji pi ra tja vi, nu ra ri eraka rauṋe?
  • Indu Mukuru tja raera Moses kutja ma hongora ovandu vaMukuru okupita moEngipte, Moses we mu zira vi?
  • Mukuru wa raera Moses kutja nga tje tjike indu ovandu tji ve mu pura kutja owaṋi ngwe mu hindi?
  • Moses aa sokuraisa vi kutja Mukuru ongwe mu hinda?

Omapuriro omaweziwa

  • Lesa Eksodus 3:1-22.

    Oviṋa Moses mbya kayenda mo, mavi tu pe vi ongamburiro kutja Jehova me tu yeura nandarire kutja matu rimunu kutja katu ya pwira okuyenenisa oviungura vye? (Eks. 3:11, 13; 2 Kor. 3:5, 6)

  • Lesa Eksodus 4:1-20.

    Omarundurukiro yeṋe nga tjitwa mongaro yaMoses mozombura 40 nḓa ri mu Midian, nu imba mbu mave ramangere otjiungura tjourizirira mombongo mave rihongere ko tjike? (Eks. 2:11, 12; 4:10, 13; Mika 6:8; 1 Tim. 3:1, 6, 10)

    Eṱe matu rihongere tjike kotjihorera tjaMoses indu tji twa vyuurwa i Jehova okupitira motjira tje? (Eks. 4:12-14; Eps. 103:14; Hebr. 12:4-11)