TARA Moses ma tupuka okupita moEngipte. Ovarumendu mbu mave mu rambere mo ve munu? Ove mo tjiwa kutja omena ratjike tji mave vanga okuzepa Moses? Indjo tu tare kutja naṋi matu munu.

Moses ma taura okupita muEngipte

Moses we kurira mondjuwo yaFarao, omunane waEngipte. Eye wa rira omundu onongo nomunanḓengu tjinene. Moses aa tjiwa kutja eye ka ri Omuengipte, nungwari kutja ovanene ve omuini va ri ovakarere Ovaisrael.

Eyuva rimwe, eye tja ri nozombura omirongo vine, Moses wa tya okuyenda okukatara ovandu ve kutja ve kara vi. Omuano mbwaave tjindwa wa ri omuvi tjinene. Eye wa muna Omuengipte ama tono omukarere Omuisrael. Moses wa tara ongondoroka nu tja muna kutja kape na omundu ngwaa tarere, eye wa tona Omuengipte nga tja zepa. Okuzambo Moses wa sira orutu rwe meheke.

Eyuva ependukirwa Moses wa pita okukatara ovandu ve rukwao. Eye ee ripura kutja me ve vatere kutja owo ave ha rire ovakarere rukwawo. Nungwari eye wa muna ovarumendu vevari Ovaisrael amave ru, okutja Moses a tja nai ku ingwi ngwa zunḓire: ‘Omuzamumwe woye mo mu tonene tjike?’

Omurumendu wa tja: ‘Owaṋi ngwe ku pa ouhona noupangure kombanda yetu? Ove mo vanga kutja u ndji zepe wina tjimuna tji wa zepa Omuengipte ngwina?’

Moses wa hara omburuma. Eye wa muna kutja ovandu va tjiwa oviṋa imbi eye mbya tjita kOmuengipte. Nandarire Farao wa zuva ohunga navyo, nu a hindi ovandu okukazepa Moses. Mena ranao Moses opa taurire okupita moEngipte.

Moses tja za moEngipte, wa ya kokure kehi rOvamidian. Ingo wa kahakaena neṱunḓu raJitro, na kupu umwe wovasukona ve wena Sipora. Moses wa rira omurise naa tjevere ozonḓu zaJitro. Oure wozombura omirongo vine eye wa turire mehi raMidian. Oruveze ndo eye wa ri nozombura omirongo hambondatu. Eyuva rimwe, ngunda Moses ama risa ozonḓu zaJitro, pa tjitwa otjiṋa otjihimise tji tja tanaura omuinyo waMoses auhe. Indjeye tu tare kutja otjiṋa hi otjihimise otjikeṋa.

Eksodus 2:11-25; Oviungura 7:22-29.



Omapuriro

  • Moses we kurira pi, nungwari aa tjiwa tjike ohunga novanene ve?
  • Moses wa tjita tjike indu tja ri nozombura 40?
  • Moses wa tja tjike komurumendu Omuisrael ngwaa ru, nu eziriro riṋe omurumendu nda yandja?
  • Omena ratjike Moses tja tupuka okupita moEngipte?
  • Moses wa tupuka okuyenda pi, nu wa kahakaena na uṋe ngo?
  • Moses aa ungura ye oure wozombura 40 tja za nokutaura moEngipte?

Omapuriro omaweziwa

  • Lesa Eksodus 2:11-25.

    Nandarire kutja Moses wa hongerwe ozombura ozengi mounongo wOvaengipte, eye wa raisa vi ouṱakame we ku Jehova na kovandu ve? (Eks. 2:11, 12; Hebr. 11:24)

  • Lesa Oviungura 7:22-29.

    Eṱe matu rihongere tjike kongondjero yaMoses yokuvanga okuyama Ovaisrael kouhura wOvaengipte momuano we muini? (Oviung. 7:23-25; 1 Petr. 5:6, 10)