Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 22: Josef ma tuwa mondeko

Ehungi 22: Josef ma tuwa mondeko

INDU Josef tja twarewa koEngipte, eye wa ri nozombura 17. Ingo ve ke mu randisa komurumendu wena Potifar. Potifar aa ungura pombara yaEngipte, ngwaa isanewa Farao.

Josef mondeko

Josef aa ungurire omuhona we, Potifar, tjinene. Okutja Josef tje kura, Potifar we mu pa ousemba wondjuwo ye aihe. Nu omena ratjike Josef imba tje ri mondeko? Omena romukazendu waPotifar.

Josef we kura nu arire omurumendu ngwa hapere nawa, nu omukazendu waPotifar wa vangere kutja eye a rare pu ye. Nungwari Josef aa tjiwa kutja otjiṋa otjivi nu ke tji tjitire ko. Omukazendu waPotifar wa pindika tjinene. Okutja omurumendu we tja kotoka konganda, eye we mu korera ovizeze na tja: ‘Josef omuvi ngo wa vanga okurara pu ami!’ Potifar wa kambura momukazendu we neye a pindikire Josef tjinene. Okutja wa tjita kutja ma tuwe mondeko.

Tjimanga omutjevere omunene wondeko wa muna kutja Josef omurumendu omuwa. Okutja eye we mu pa ousemba kombanda yovakamburwa avehe varwe. Kombunda Farao wa pindikira omunene womavinu we nomutereke we wozomboroto, neve twa mondeko. Ouṱuku umwe auhe wawo wa rota oruroto rwapeke nungwari kaave tjiwa omaheyero woturoto twawo. Eyuva nda kongorera ko Josef wa tja: ‘Ndji raereye oturoto tweṋu.’ Tji ve mu raera, Josef arire tja mangurura oturoto twawo nombatero yaMukuru.

Komunene womavinu, Josef wa tja: ‘Kombunda yomayuva yetatu ove mo pitisiwa mondeko, nu mo rire omunene womavinu wa Farao rukwao.’ Okutja Josef a rire tja weza: ‘Tji wa piti, raera Farao ohunga na ami, nu ndji vatera mbi pite moruveze ndwi.’ Nungwari komutereke wozomboroto, Josef wa tja: ‘Kombunda yomayuva yetatu uriri Farao ma kondisa otjiuru tjoye.’

Kombunda yomayuva yetatu opo pa tji twa otja Josef tja hungirire. Farao wa kondisa otjiuru tjomutereke wozomboroto. Nungwari omunene womavinu wa pitisiwa mondeko na utu okukarera ombara rukwao. Nu eye wa zemba Josef oparukaze! Eye kena pa raera Farao ohunga naye, okutja Josef wa kara mo mondeko.

Genesis 39:1-23; 40:1-23.



Omapuriro

  • Josef wa ri nozombura ngapi indu tja twarewa koEngipte, nu ingo wa katjitwa tjike?
  • Pe ya vi Josef ma kakare mondeko?
  • Josef wa pewa ourizirira watjike mondeko?
  • Indu Josef tja ri mondeko, omutye omunene womavinu nomutereke wozomboroto vaFarao we ve tjitira tjike?
  • Pa tjitwa tjike indu omunene womavinu tja za nokukuturwa mondeko?

Omapuriro omaweziwa

  • Lesa Genesis 39:1-23.

    Nandarire kutja kapa ri etwako nda tjangwa i Mukuru okutjaera omakatukiro worukupo moruveze rwaJosef, otjikeṋa tji tja tunduza Josef ma tupuke okuza po pomukazendu waPotifar? (Gen. 2:24; 20:3; 39:9)

  • Lesa Genesis 40:1-23.

    Handjuṋuna oruroto rwomunene womavinu nomamangururiro Jehova nga yandja ku Josef. (Gen. 40:9-13)

    Omutereke wozomboroto wa rota tjike nu oruroto rwe aaru heye tjike? (Gen. 40:16-19)

    Omukarere omuṱakame nomunazondunge u kongorera vi ongaro yaJosef ndino? (Gen. 40:8; Eps. 36:9; Joh. 17:17; Oviung. 17:2, 3)

    Genesis 40:20 mari yerisa vi oumune Omukriste mbu ma sokukara nawo ohunga nomikandi vyomayuva wongatero? (Omuzuv. 7:1; Mar. 6:21-28)