Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 21: Omarumbi waJosef maye mu tondo

Ehungi 21: Omarumbi waJosef maye mu tondo

TARA omuzandona ngo tja ningisa ondjenda na tja yumana. Eye oJosef. Omarumbi we va zu nokumurandisa kovarumendu mba mbe ri mondjira okuyenda koEngipte. Ingo Josef ma karira omukarere. Omena ratjike omarumbi we tji va tjitire otjiṋa otjivi ihi? Omena rokutja aave ṱeruru na Josef.

Josef ma randisiwa i omarumbi we

Ihe yawo Jakob wa suverere Josef tjinene. Eye we mu raisira orusuvero mokumuyatatera ombanda ombwa nonde. Omarumbi we 10 tji va munine omuano Jakob mbwa suverere Josef, owo va uta okuṱira Josef eruru nokumutonda. Nungwari pa ri epu rarwe wina ndi va tondera Josef.

Josef wa rotere oturoto tuvari. Oturoto twi atuyevari twa raisa kutja omarumbi we aave mu karere. Indu Josef tja raera omarumbi we oturoto twi owo ve mu tondera ko.

Okutja eyuva rimwe ngunda omarumbi waJosef amave risa ozonḓu zaihe, Jakob wa hinda Josef ma katare omarumbi we kutja ve ri vi. Omarumbi waJosef tji ve mu muna ama wondjo, tjiva vawo arire tji va tja: ‘Ngatu mu zepe!’ Nungwari Ruben, erumbi rawo omunene, a tja: ‘Kako, amu tjiti nao!’ Moruveze rwanao va kambura Josef nave mu yumbu mondjombo ndja pwira. Okuzambo va haama ve tye kutja mave mu tjiti vi.

Poruveze ndo pe ya ovarumendu Ovaismael. Juda arire tja tja komarumbi we: ‘Ngatu mu randise kOvaismael.’ Nu otji nga ava tjita. Owo va randisa Josef kotupa 20 twovisilveri. Ihi tjiri tja ri otjiṋa otjivi!

Omarumbi waJosef mave katja vi ku ihe? Owo va zepa ongombo nave tjaveke ombanda ye ombwa mombinḓu yongombo. Okuzambo ave twara ombanda konganda ku ihe Jakob nave tja: ‘Eṱe twa munu ombanda ndji. Tara kutja ombanda oyaJosef poo indee.’

Jakob tja muna kutja oyo, eye wa rira na tja: ‘Josef wa nyondororwa i otjipuka tjokuti.’ Omarumbi waJosef va vangere kutja ihe yawo me ripure nao. Jakob wa ri noruhoze tjinene. Eye wa rira omayuva omengi. Nungwari Josef ke ya koka. Indjo tu tare kutja eye wa katjitwa tjike ingo ka twarewa.

Genesis 37:1-35



Omapuriro

  • Omena ratjike omarumbi waJosef tjaave ṱeruru naye nowo va tjita tjike?
  • Omarumbi waJosef aave vanga okutjita tjike ku ye, nu Ruben wa tja tjike?
  • Pa tjitwa tjike indu ovarandise Ovaismael tji ve ya?
  • Omarumbi waJosef va tjita tjike kutja ihe me ri pure kutja Josef wa tu?

Omapuriro omaweziwa

  • Lesa Genesis 37:1-35.

    Ovakriste mave yenene vi okuhorera otjihorera tjaJosef tjokuhorora ovitjitwa vyourunde mombongo? (Gen. 37:2; Lev. 5:1; 1 Kor. 1:11)

    Ovikeṋa mbya tjitisa omarumbi waJosef kutja ve mu tjite ouvi? (Gen. 37:11, 18; Omiano 27:4; Jak. 3: 14-16)

    Jakob wa raisa vi oruhoze rwe otja ovandu ovengi tji ve tjita undino? (Gen.37:35)