OVE mo tjiwa kutja omukazendu ngu u ri motjiperendero hi owaṋi? Ena re oRebeka. Nu omurumendu eye ngu me ya okuhakaena naye oIsak. Eye ma rire omukazendu we. Ihi tja tjitwa vi?

Abraham, ihe yaIsak aa vanga omukazendu omusemba komuzandu we. Eye kena pa vanga omuzandu we ma kupe umwe wovakazendu vaKanaan, mena rokutja ovandu mba aave rikotamene koomukuru wovisenginina. Mena ranao Abraham wa isana omukarere we na tja: ‘Ami me vanga kutja ove u yaruke ku kwatura ovazamumwe vandje ku Haran nu u ke ndji etere omukazendu komuzandu wandje Isak.’

Oruveze tjingero omukarere waAbraham wa toora ozongamero omurongo na kayenda ouyenda oure. Indu eye tja ka vaza popezu noruveze pupa turire ovazamumwe vaAbraham, eye wa kurama pondjombo. Ya ri omapeta wongurova, oruveze ovakazendu wotjihuro puve kateka omeva mondjombo. Mena ranao omukarere waAbraham wa kumba ku Jehova: ‘Ngape kare nao kutja omukazendu ngu me ndji pe omeva na hire ozongamero zandje ma rire ingwi Ove ngwa toorora arire omukazendu waIsak.’

Rebeka ma hakaene na Isak

Tjimanga Rebeka we ya okuteka omeva. Omukarere indu tje mu ningira omeva okunwa, eye we mu pa. Okuzambo eye wa kateka omeva nga yenene kozongamero azehe nḓa ri nonyota. Imbi vya ri oviungura ovingi mena rokutja ozongamero ze nwa omeva omengi tjinene.

Indu Rebeka tja mana okutjita nao, omukarere waAbraham we mu pura ena raihe. Eye wina we mu ningira kutja ma ka rare koyawo ouṱuku mbo. Eye wa tja: ‘Tate o Betuel, nu tu noruveze kove okukara puna eṱe.’ Omukarere waAbraham aa tjiwa kutja Betuel wa ri omuzandu werumbi raAbraham, Nahor. Mena ranao eye wa wora ozongoro na yandja ondangu ku Jehova kokumuurikira ovazamumwe vaAbraham.

Ongurova ndjo omukarere waAbraham wa raera Betuel nomuṱena waRebeka Laban kutja we yere tjike. Aveyevari va itavera kokutja Rebeka ma yende puna ye nu ma ka kupwe i Isak. Rebeka wa zira kutja vi indu tja purwa? Eye wa tja: ‘Ii,’ eye ma vanga okuyenda. Okutja eyuva nda kongorera ko owo va ronda kozongamero nave utu ouyenda wawo oure okuyaruka ku Kanaan.

Owo va ka vaza ozoiri zongurova. Rebeka wa muna omurumendu ngu ma kaenda mokuti. Eye wa ri Isak. Eye wa ri nonyuṋe okumuna Rebeka. Ina Sara wa ṱa ozombura ndatu nda kapita, neye ngundee wa ri noruhoze ohunga notjiṋa hi. Nungwari nai Isak wa uta okusuvera Rebeka tjinene, nu eye wa ri nonyuṋe rukwao.

Genesis 24:1-67.



Omapuriro

  • Omurumendu nomukazendu motjiperendero oowaṋi?
  • Abraham wa tjita tjike kutja ma mune omukazendu komuzandu we nu omena ratjike?
  • Ongumbiro yomukarere waAbraham ya zirwa momuhingo uṋe?
  • Rebeka wa zira kutja vi indu tja purwa kutja ma vanga okukupwa i Isak?
  • Otjikeṋa tji tja yandja onyuṋe ku Isak rukwao?

Omapuriro omaweziwa

  • Lesa Genesis 24:1-67.

    Ovikaro viṋe oviwa Rebeka mbya raisa indu tja hakaena nomukarere waAbraham pondjombo? (Gen. 24:17-20; Omiano 31:17, 31)

    Omuano Abraham mbwa rongerisa Isak mau yandja otjihorera tjiṋe otjiwa kOvakriste ndino? (Gen. 24:37, 38; 1 Kor. 7:39; 2 Kor. 6:14)

    Omena ratjike tji matu sokupaha oruveze rokuripuratena ohunga noviṋa vyaMukuru, tjimuna Isak tja tjita? (Gen. 24:63; Eps. 77:12; Fil. 4:8)