PA KAPITA ozombura ozengi. Ovazandu vaNoa va ri novanatje ovengi. Nu ovanatje vawo ve kura nu va ri novanatje ovengi wina. Okutja kwa ri novandu ovengi kombanda yehi.

Umwe wovandu mba wa ri omuatje wovanatje-vovanatje vaNoa wena Nimrod. Eye wa ri omurumendu omuvi ngwaa yeve nokuzepa ovipuka novandu. Nimrod wina we ritjita omuini ombara okuhonaparera po ovandu varwe. Mukuru ke na pa suverere Nimrod.

Ovandu avehe moruveze ndo aave hungire eraka rimwe. Nimrod aa vanga okuveṱizira pamwe avehe kokutja ma yenene okuvehonaparera po. Ove mo tjiwa kutja eye wa tjita tjike? Eye wa raera ovandu ve tunge otjihuro notjiretundu otjinene mu tjo. Ove mo ve munu tji mave ungura ozohima mo tjiperendero?

Jehova Mukuru ka ri nonyuṋe nomatungiro nga. Mukuru aa vanga kutja ovandu ve rimbare nu ve ture kombanda yehi arihe. Nungwari ovandu va tja: ‘Indjeye! Ngatu tunge otjihuro notjiretundu otjire tjinene nga ohonga yatjo tji mai ka vaza keyuru. Okuzambo eṱe matu rire ovatjiukwa!’ Ovandu aave ripahere oveni ondjozikiro, poruveze rokuyozika Mukuru.

Mena ranao Mukuru wa tjita kutja ve ise okutunga otjiretundu. Ove mo tjiwa kutja omomwano uṋe mbwa tjita nao? Tjimanga eye wa tjita kutja ovandu ve ute okuhungira omaraka pekepeke poruveze rokuhungira eraka rimwe uriri. Ovatunge mba kaave zuvasana rukwao. Mena ranao otjihuro tjawo oputja rukirwa Babel, poo Babilon, ndi mari heye “Ombambaukiro.”

Ovandu nambano va uta okutjinda okuzamo mu Babel. Ovimbumba vyovandu mbaave hungire eraka rimwe va katura pamwe motupa twarwe twehi.

Genesis 10:1, 8-10; 11:1-9.

Ovaungure mave tungu otjiretundu


Omapuriro

  • Nimrod wa ri omungendu, nu Mukuru ee mu vara vi?
  • Motjiperendero omena ratjike ovandu tjaave ungura ozohima?
  • Omena ratjike Jehova tje ha ri nonyuṋe noviungura vyokutunga?
  • Mukuru wa yandisa vi oviungura vyokutunga otjiretundu?
  • Otjihuro tji aatji isanewa vi, nena ratjo aari heye tjike?
  • Ovandu va tjita tjike indu Jehova tja za nokupambaukisa omaraka wawo?

Omapuriro omaweziwa

  • Lesa Genesis 10:1, 8-10.

    Ovitjiukwa viṋe vyoundu Nimrod mbya raisa, nu ihi matji tu pe erakiza riṋe? (Omiano 3:31)

  • Lesa Genesis 11:1-9.

    Ondando yokutunga otjiretundu ya ri iṋe, nu omena ratjike otjiungura tjawo hi tji tja ri ombandjarero? (Gen. 11:4; Omiano 16:18; Joh. 5:44)