Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 8: Ovarenaka kombanda yehi

Ehungi 8: Ovarenaka kombanda yehi

OVE mo ripura vi tji wa munu omundu woure mbu mau vaza komututu wondjuwo yoye ama wondjo okuya kove? Omundu ngo ma sokurira omurenaka! Oruveze rumwe kombanda yehi tjiri kwa ri ovarenaka. Ombeibela i raisa kutja ooihe yovarenaka mba, va ri ovaengeli mba zire keyuru. Nungwari ihi pe ya vi tji tjitwe?

Ovarenaka ovindandi

Zemburuka, kutja omuengeli omuvi Satana aa kondjisa okueta oumba. Eye wina aa kondjisa okutjita kutja ovaengeli vaMukuru ve rire ovavi. Momakawondjero woruveze tjiva wovaengeli mba va uta okupuratena ku Satan. Owo va isa oviungura Mukuru mbye ve pa okuungura meyuru. Nu owo ve ya kombanda yehi nave ri tanaurire motutu twovandu. Ove mo tjiwa kutja omena ratjike?

Ombeibela mai tja omena rokutja ovazandu vaMukuru mba va muna ovakazendu ovawa kombanda yehi nu aave vanga okukara puna wo. Mena ranao owo ve ya kombanda yehi nu ave kupu ovakazendu mba. Ombeibela mai tja ihi tja ri ouposyo, mena rokutja Mukuru wa ungura ovaengeli kokutja ve hupe meyuru.

Ovaengeli mba novakazendu vawo tji va panduka ounatje, ounatje mbwi wa ri owapeke. Pomautiro ngahino kaau munika peke. Nungwari owo aave kuru okurira ovanene tjinene, nu aave ririreko ovanamasa tjinene, ngandu tjiva rira ovarenaka.

Ovarenaka mba aave tjiti oviṋa ovivi. Nu mena rokutja owo va ri ovanene novanamasa pupeṱa mbo, owo aave hihamisa ovandu. Owo aave ṋiṋikiza ovandu avehe kutja ve rire ovavi tjimuna wo.

Henok wa ṱa, nungwari kwa ri omurumendu umwe kombanda yehi ngwa ri omuwa. Ena romurumendu ngwi ra ri Noa. Eye aruhe aa tjiti ihi Mukuru tjaa vanga kutja ma tjite.

Eyuva rimwe Mukuru wa raera Noa kutja oruveze rwa tumbuka ku ye okuyandeka ovandu avehe ovavi. Nungwari Mukuru atja hupisa Noa, neṱunḓu re novipuka ovingi. Indjeye tu tare kutja Mukuru ihi we tji tjita vi.

Genesis 6:1-8; Judas 6.



Omapuriro

  • Pa tjitwa tjike indu ovaengeli tjiva vaMukuru tji va puratena ku Satana?
  • Omena ratjike tjiva vovaengeli tji va isa oviungura vyawo meyuru nave ya kombanda yehi?
  • Omena ratjike tja ri ouposyo kovaengeli okuya kombanda yehi nokuriungurira otutu twovandu?
  • Ovanatje vovaengeli va pangukire vi novandu varwe?
  • Otja tji mo munu motjiperendero, ovanatje vovaengeli va tjita tjike indu tji va rira ovarenaka?
  • Omurumendu omusemba ngwa hupa kombanda yehi kombunda yondeiro yaHenok owaṋi, nu omena ratjike Jehova tje mu suverere?

Omapuriro omaweziwa

  • Lesa Genesis 6:1-8.

    Genesis 6:6 mari vandurura tjike ohunga nomuano otjikaro tjetu mbu tji ṱuna ku Jehova? (Eps. 78:40, 41; Omiano 27:11)

  • Lesa Judas 6.

    Eṱe kundino matu rihongere ko tjike kovaengeli imba “mbe ha karere pu pa yandera ouvara wawo” momayuva waNoa? (1 Kor. 3:5-9; 2 Petr. 2:4, 9, 10)