Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 3: Omurumendu nomukazendu omutenga

Ehungi 3: Omurumendu nomukazendu omutenga

OMBANGU i ri pi motjiperendero hi? Ii, ovandu mbe ri mu tjo. Owo omurumendu nomukazendu omutenga. Owo va ungurwa i uṋe? Va ungurwa i Mukuru. Ena re mo ri tjiwa? Oro o Jehova. Nu omurumendu nomukazendu va rukwa Adam na Eva.

Adam na Eva motjikunino tjaEden

Jehova wa ungura Adam momwano mbwi. Eye wa toora oruuma rwehi na ungura po orutu oruhomonena, rwomurumendu. Okuzambo a suvirire omuinyo meuru romurumendu, nu Adam a rire omunamuinyo.

Jehova Mukuru wa ri noviungura ku Adam. Eye wa raera Adam okuyandja omana kovipuka avihe otja komihoko pekepeke. Adam okutja aa tarere ovinamuinyo oruveze orure kokutja ma yenene okutoorora omana omasembasemba ku vyo avihe. Ngunda Adam ama yandja omana kovipuka eye wa uta okumuna kutja pe notjiṋa tji tji he ri po. Ove mo tjiwa kutja otjikeṋa?

Ovipuka avihe vya ri ovirume novikaze. Pa ri ondjou ondwezu Nonḓenḓu, nu pa ri ongeyama ondwezu nonḓenḓu. Nungwari Adam ka ri nomukwao. Okutja Jehova wa rarisa Adam ozomboṱu ozonḓeu, neye wa homona orupati rwe rumwe. Nu porupati ndwi, Jehova a ungurire Adam omukazendu, neye a rire omukazendu we.

Adam wa ri nonyuṋe tjiri. Nu ripura kutja Eva wa ri nonyuṋe pupe ṱa pi okutuwa motjikunino otjiwa ho nokuhupa mu tjo! Nambano aave yenene okumuna ovanatje nokuhupa pamwe mondjoroka.

Jehova wa vanga Adam na Eva okuhupa ngaaruhe. Eye wa vanga kutja ve ungure ehi arihe ri rire ewa otja otjikunino tjaEden. Adam na Eva tjiri va ri nonyuṋe okuripurira kotjiungura hi. Ove otjo vanga okukara norupa okutjita ehi ri rire otjikunino otjiwa? Nungwari ouṋingandu waAdam na Eva kau na pu wa karerera. Indjo tu konḓonone kutja omena ratjike.

Epsalme 83:19, EEP; Genesis 1:26-31; 2:7-25.



Omapuriro

  • Pe nombangu yatjike pokati kotjiperendero tjEhungi 3 notjiperendero tjEhungi 2?
  • Owaṋi ngwa mema omurumendu omutenga, nena romurumendu ra ri tjikwaye?
  • Oviungura viṋe Mukuru mbya yandja ku Adam okuungura?
  • Omena ratjike Mukuru tja rarisa Adam ozomboṱu ozonḓeu?
  • Adam na Eva atja ve hupa orure ndu ṱa pi, nu Jehova aa vanga kutja ve ungure tjike?

Omapuriro omaweziwa

  • Lesa Epsalme 83:19 (EEP).

    Ena raMukuru otjikwaye, nu otjihako tjiṋe tjapeke tje na tjo kombanda yehi? (Jer. 16:21; Dan. 4:17)

  • Lesa Genesis 1:26-31.

    Otjikeṋa otjinanḓengu Mukuru tja mema meyuva oritjahamboumwe, nu ombangu yaye ndja ri pokati kotjiutwa tji novipuka? (Gen. 1:26)

    Jehova wa yandja tjike kovandu novipuka? (Gen. 1:30)

  • Lesa Genesis 2:7-25.

    Otjiungura tjaAdam tjokuyandja omana kovipuka aatji kamburire mo tjike? (Gen. 2:19)

    Genesis 2:24 mari tu vatere vi okuzuva oumune waJehova korukupo, omahaṋikiro nomateyero worukupo? (Mat. 19:4-6, 9)