Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 2: Otjikunino otjiwa

Ehungi 2: Otjikunino otjiwa

TARA ehi poṋa mba! Oviṋa avihe kaviwa are? Tara kehozu nomiti, ozongara novipuka. Ondjou nongeyama mo vi munu?

Ovipuka motjikunino tjaEden

Otjikunino otjiwa hi tje ya vi? Indjo tu tare kutja Mukuru ehi we tu ṱunina vi.

Rutenga Mukuru wa ungura ehozu engirine okukovera ehi. Eye wina wa ungura omihoko pekepeke vyovikunwa oviṱiṱi novihwa nomiti. Ovihape mbi vya vatera okumunikisa ehi nawa. Nungwari ovyo vi tjita ovingi kombanda yanao. Ovingi vyavyo wina vi tupa ovikurya mbi tjata nawa.

Mukuru kombunda wa ungura omahundju okutjaara momeva nouzera okutuka meyuru. Eye wa ungura ozombwa noumbihi noukambe, novipuka ovinene noviṱiṱi. Ovipuka viṋe mbi vi kara popezu naove? Katu sokutjaterwa are kokutja Mukuru we tu ungurira oviṋa avihe mbi?

Korusenina Mukuru wa ungura orupa rumwe rwehi kokutja ru rire oruveze rwapeke. Eye we ru isana otjikunino tjaEden. Otjo tja ri otjiwa tjinene. Oviṋa avihe mu tjo vya ri oviwa. Nu Mukuru wa vanga kutja ehi arihe ri sane kotjikunino otjiwa hi tja ungura.

Nungwari tara rukwao kotjiperendero tjotjikunino hi. Mukuru wa muna kutja pena otjiṋa tjimwe tji tji he ri po. Ove mo tjiwa kutja otjikeṋa? Indjo tu tare.

Genesis 1:11-25; 2:8, 9.



Omapuriro

  • Mukuru wa rongera vi ehi kutja ri rire omaturiro wetu?
  • Yandja omihoko omingi vyovipuka Mukuru mbya ungura. (Tara kotjiperendero.)
  • Omena ratjike otjikunino tjaEden tji tja ri otjapeke?
  • Mukuru wa vanga kutja ehi arihe ri rire tjike?

Omapuriro omaweziwa

  • Lesa Genesis 1:11-25.

    Mukuru wa mema tjike meyuva oritjatatu roviutwa? (Gen. 1:12)

    Pa tjitwa tjike meyuva oritjaine roviutwa? (Gen. 1:16)

    Ovinamuinyo viṋe Mukuru mbya ungura meyuva oritjatano noritjahamboumwe? (Gen. 1:20, 21, 25)

  • Lesa Genesis 2:8, 9.

    Omiti viṋe vivari nu vyapeke Mukuru mbya twa motjikunino, nu ovyo aavi kuramene po tjike?