Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 4: Otjiṋa tji va pandjarera omaturiro wawo

Ehungi 4: Otjiṋa tji va pandjarera omaturiro wawo

TARA mbi mavi tjitwa nai. Adam na Eva mave isamewa motjikunino otjiwa tjaEden. Ove mo tjiwa kutja omena ratjike?

Adam na Eva mave rambwa motjikunino tjaEden

Omena rokutja owo va tjita otjiṋa otjivi. Mena ranao Jehova me ve vere. Ove mo tjiwa kutja otjiṋa otjivi Adam na Eva tji va tjita otjikeṋa?

Owo va tjita otjiṋa Mukuru tje ve raera kutja ave tjiti. Mukuru we ve raera kutja ngave rye kovihape vyokomiti motjikunino. Nungwari komuti umwe Mukuru we ve raera kutja ave ri ku wo, tjarwe mave koka. Eye we ri toororera omuti mbwi u rire owe omuini. Nu eṱe matu tjiwa nawa kutja ka kokuwa okutoora otjiṋatjomundu warwe, katjiperi? Pa tjitwa tjike?

Eyuva rimwe ngunda Eva a ri erike motjikunino onyoka ye mu hungirisa. Ripurira kotjiṋa hi! Oyo ya raera Eva kutja nga rye ovihape vyomuti Mukuru mbwe ve raera kutja ave ri ko. Indu Jehova tja ungura ozonyoka kena pe ze ungura kutja ze hungire. Okutja ihi matji heye kutja pena omundu ngwaa tjiti kutja onyoka i hungire. Eye wa ri uṋe?

Eye ka ri Adam. Okutja ma sokurira umwe wovandu Jehova mba ungurire rukuru ngunda ee hi ya ungura ehi. Ovandu mbo owo ovaengeli, nu eṱe katu yenene okuvemuna. Omuengeli umwe ngwi wa rira omuritongamise wa tjinene. Eye wa uta okuripura kutja ma sokurira omunane tjimuna Mukuru. Nu eye aa vanga kutja ovandu ve puratene ku ye poruveze rokupuratena ku Jehova. Eye ongwa ri omuengeli ngwa tjita kutja onyoka i hungire.

Omuengeli ngwi wa yenena okupopa Eva. Indu tje mu raera kutja ma sana ku Mukuru tja ri otjihape, eye wa kambura mu ye. Mena ranao eye wa rya, nu Adam wina. Adam na Eva kava ri nonḓuviro ku Mukuru, nu mena ranao opu va pandjarera omaturiro wawo wotjikunino otjiwa.

Nungwari eyuva rimwe Mukuru ma tjiti kutja ehi arihe ri rire ewa otja otjikunino tjaEden. Kombunda matu ke rihonga kutja ove mo kara vi norupa momatjitiro wanao. Nambano indjeye tu tare ihi tji tja tjitwa ku Adam na Eva.

Genesis 2:16, 17; 3:1-13, 24; Omavandururiro 12:9.



Omapuriro

  • Adam na Eva mave tjitwa tjike motjiperendero mba?
  • Omena ratjike Jehova tje ve vera
  • Onyoka ya tja tjike ku Eva?
  • Owaṋi ngwa tjita kutja onyoka i hungire na Eva?
  • Omena ratjike Adam na Eva tjiva pandjara omaturiro wawo woParadisa?

Omapuriro omaweziwa

  • Lesa Genesis 2:16, 17 na 3:1-13, 24.

    Epuriro ronyoka ku Eva ra raisa vi kutja aai twa Jehova poṋa pe he ri? (Gen. 3:1-5; 1 Joh. 5:3)

    Omomuano uṋe otjihorera tjaEva mbu tji ri erakiza kweṱe? (Fil. 4:8; Jak. 1:14, 15; 1 Joh. 2:16)

    Omomuano uṋe Adam na Eva mbu ve hina va toora omerizirira wovitjitwa vyawo? (Gen. 3:12, 13)

    Ovakerubi mba kuramene komukuma wokomuhuka wotjikunino tjaEden aave yandja vi oruvara komuano waJehova womananeno? (Gen. 3:24)

  • Lesa Omavandururiro 12:9.

    Satan wa toṋa pupe ṱa pi okuisa ko ovandu kehi youhanapare waMukuru? (1 Joh. 5:19)