NGUNDA Jesus ama rianga mehi arihe, eye aa verura ovavere. Ombuze ohunga novihimise mbi ya handjauka mouhuro ongondoroka. Okutja ovandu va eta ovirema novapoṱu nozomboro, na varwe ovengi mba verere ku ye. Nu Jesus we ve verukisa avehe.

Pa kapita ape ozombura ndatu kombunda yaindu Johanes tja papitisa Jesus. Nu Jesus aa raere ovaapostele ve kutja moruveze rwopopezu eye ma i ku Jerusalem, eye ku ma kazepewa, nokuzambo a kapendurwa movakoke. Nungwari eye ngunda aa kayenda komurungu okuverura ovavere.

Jesus ma verukisa omukazendu ngwa vera

Eyuva rimwe Jesus aa hongo mEsabata. Esabata eyuva romasuviro kOvajuda. Omukazendu ove ngu mo munu mba wa verere tjinene. Oure wozombura 18 eye wa ri ongota, neye kaa sora okuyeruruka oparukaze. Okutja Jesus wa twa omake we ku ye, neye wa uta okuyeruruka. Eye wa veruka!

Ihi tja pindikisa ovanane wombongo. Umwe wawo wa ravaera na tja: ‘Pena omayuva hamboumwe mu matu sokuungura. Ingo oomayuva mu mamu sokuverukisiwa, nungwari ka mEsabata’

Nungwari Jesus we ve zira na tja: ‘Vanatjavivi eṋe! Kangamwa auhe weṋu ma yenene okukutura okasino ke ne ketwara okukekehira omeva mEsabata. Nambano omukazendu ngwi ngwa verere oure wozombura 18, ka sere okuverurwa mEsabata are?’ Eziriro raJesus ra ṱisa ovarumendu ovavi mba ohoṋi.

Kombunda Jesus novaapostele ve va toora ouyenda okuyenda ku Jerusalem. Owo ngunda ava ri pendje yotjihuro tjaJeriko, ovapoṱu vevari mba haamene meṋe yondjira va zuva kutja Jesus ma kapita mbo. Okutja owo va ravaera nave tja: ‘Jesus arikana tu vatera!’

Jesus wa isana ovarumendu ovapoṱu mba neve pura a tja: ‘Mamu vanga kutja mbi mu tjitire tjike?’ Nowo va tja: ‘Muhona arikana matu vanga kutja tu mune.’ Jesus wa ṱuna komeho wawo nu tjimanga owo va uta okumuna! Ove mo tjiwa kutja omena ratjike Jesus tjaa tjiti ovihimise oviwa mbi? Omena rokutja eye wa suverere ovandu nu aa vanga kutja owo ve kare nongamburiro mu ye. Nu okutja eṱe matu yenene okukara nongamburiro kutja indu eye tja utu okuhonapara otja Ombara kape nomundu kombanda yehi ngu ma vere rukwao.

Mateus 15:30, 31; Lukas 13:10-17; Mateus 20:29-34.



Omapuriro

  • Jesus wa tjita tjike indu tjaa ryanga mehi arihe?
  • Ozombura ape ndatu kombunda yaindu Jesus tja za nokupapitisiwa, eye wa raera tjike kovaapostele ve?
  • Ovandu mbe ri motjiperendero oowaṋi, nu otjikwaye Jesus tja tjitira omukazendu?
  • Omena ratjike omuano Jesus mbwa pimba komatokero wovanane vombongo tji we ve ṱisa ohoṋi?
  • Indu Jesus novaapostele ve tji va ri popezu na Jeriko, otjikeṋa Jesus tja tjitira ovapoṱu vevari mba haamene meṋe yondjira?
  • Omena ratjike Jesus tjaa tjiti ovihimise?

Omapuriro omaweziwa

  • Lesa Mateus 15:30, 31.

    Oviraisiro viṋe oviwa vyomasa waJehova mbya tjiukisirwa mu Jesus, nu mavi sokuṱuna vi kokuzuva kwetu kwaimbi Jehova mbya kwizika kouye oupe? (Eps. 37:29; Jes. 33:24)

  • Lesa Lukas 13:10-17.

    Ouatjiri wokutja Jesus wa tjita ovikumise vye vyapeke mEsabata mau raisa vi onguturiro eye ndji ma eta kovandu mouhonapare we wozombura eyovi? (Luk. 13:10-13; Eps. 46:9; Mat. 12:8; Kol. 2:16, 17; Omavan. 21:1-4)

  • Lesa Mateus 20:29-34.

    Ehungi ndi mari tu raisire vi kutja Jesus aa kondjo okupaha oruveze rwokuvatera ovandu nandarire kutja wa ri noviungura ovingi tjinene, neṱe matu rihongere ko tjike? (Deut. 15:7; Jak. 2:15, 16; 1 Joh. 3:17)