Twende kovidio oini

Twende komurya

Ovahongonone vaJehova

Toorora eraka Otjiherero

Ehungi 95: Omuano Jesus mbwaa hongo ovandu

Ehungi 95: Omuano Jesus mbwaa hongo ovandu

EYUVA rimwe Jesus wa raera omurumendu umwe kutja ma sokusuvera omukwao. Omurumendu wa pura Jesus na tja: ‘Nu ingwi omukwetu owaṋi?’ Nungwari Jesus aa tjiwa kutja omurumendu ngwi ee ripura tjike. Omurumendu ngwi ee ripura kutja embo ndi omukwetu mari heye ovandu vomuhoko nongamburiro ye porwe. Nambano indjeye tu tare kutja Jesus wa tja tjike ku ye.

Ovikando tjiva Jesus aa hongo mokuserekarera ehungi. Nu otjikando hi eye otja tjita. Eye wa serekarera ehungi ohunga nOmujuda nOmusamaria. Eṱe twe rihonga rukuru kutja Ovajuda ovengi kaave vanga Ovasamaria. Okutja, ehungi raJesus orondi:

Eyuva rimwe pa ri Omujuda ngwa ri ama kayenda mondjira ndji kapita kondundu okuyenda koJeriko. Ovapunde ve mu wira, ave mu yeka ovimariva vye nave mu tono ngandu tja ri pookukoka.

Kombunda, omupristeri Omujuda wa twara ondjira ndjo. Eye wa muna omurumendu ngwa tonenwe. Eye wa tjita tjike ove otja tji mo ripura? Wa varama posyo kondjira yarwe na kayenda komurungu. Okuzambo omurumendu warwe omukambure tjinene we ere mbo. Eye wa ri Omulevi. Eye u na pa kurama po? Kako, eye wina kena pa kurama okuvatera omurumendu ngwa tonenwe. Tara omupristeri nOmulevi owombena kokure mave kayenda mondjira.

Nungwari tara mba kutja owaṋi ngu ri pu nomurumendu ngwa tonenwe. Eye Omusamaria. Nu eye wa vatera Omujuda. Eye wa twa omiti kovirwaro vye. Okuzambo eye wa twara Omujuda koruveze ku ma yenene okukasuva nokuveruka.

Omusamaria omunatjari

Komaandero wehungi re Jesus wa pura omurumendu ngwe mu pura epuriro: ‘Owaṋi mu imba vetatu mba ngu mo ripura kutja wa ri omukwao waingwi ngwa wira momake wovapunde? Omupristeri poo Omulevi poo Omusamaria?’

Omurumendu we mu zira na tja: ‘Omusamaria, orondu eye wa ṱotjari nomurumendu ngwa tonenwe.’

Jesus arire tja tja: ‘Ove wa sora. Okutja twende nu katjite nao.’

Omuano Jesus mbwaa hongo kau nokukutjatera nao? Eṱe tjiri matu yenene okurihonga oviṋa ovingi tjinene novinanḓengu indu tji twa puratene ku imbi Jesus mbi ma hungire mOmbeibela, katjiperi?

Lukas 10:25-37.



Omapuriro

  • Epuriro riṋe omurumendu umwe nda pura Jesus, nu omena ratjike?
  • Jesus otuveze tjiva aa ungurisa tjike okuhonga ovandu, neṱe rukuru twe rihonga tjike ohunga nOvajuda nOvasamaria?
  • Mehungi Jesus nda serekarera, pa tjitwa tjike kOmujuda ngwa ri mondjira okuyenda koJeriko?
  • Pa tjitwa tjike indu omupristeri Omujuda nOmulevi tji va kayenda mondjira?
  • Otja tji matu munu motjiperendero, owaṋi ngwa vatera Omujuda ngwa tonenwe?
  • Indu Jesus tja mana okuserekarera ehungi, eye wa pura epuriro riṋe, nu omurumendu we mu zira kutja tjike?

Omapuriro omaweziwa

  • Lesa Lukas 10:25-37.

    Komurungu wokuyandja eziriro ohungamo, Jesus wa vatera vi omurumendu ngwaa tjiwa omatwako nawa okuripurira kepu rorive? (Luk. 10:26; Mat. 16: 13-16)

    Jesus wa ungurisa vi omasanekero okuisapo ondoorora okuza kovapuratene ve? (Luk. 10:36, 37; 18:9-14; Titus 1:9)